Sim'is 4 - V'nen P'as iv'i Turanien Trtarep' m'a Turanien M'dah

Atua ilep'la m'ertu ilap'as a sia nadep'

¹ ?Asnm'i, naur m'a v'lv'elien iendan ip'i? Nsarei iendan arna v'ahien stuam'i la ien naur arna p'akm'i ha.

² Kvrn nam'er a sei, v'eti kaavuei. Kvrpep'n m'ertu, kavrn nam'er a sei, v'eti mkavlav'i. Kvv'lv'al kavan naur, v'eti mkavua sei, sena ti kaavmimani.

³ Kvmimani, v'eti kaavlei, sena ti kvmimani istu, sena ti kvrn ti pavuei arna navanel stu, a ti pavsrani sena sei kvrni uaki.

⁴ Kam'i kvv'i m'ertu kvv'nah tav'et kavv'nah dui. ?Kaavrndu ti Atua ilep'la m'ertu ilap'as a sia nadep'? Sena si lera, ipavr ti m'ertu irn ti ipalap'as a sia nadep', Atua ipalep'lei.

⁵ Kvv'ah ti sei Paivul ivri iv'i si kaka uaki, naran ivr ti a, “M'im'ild la ilak a nld ha, irn sia tv'ald nakl, kani ti nld ipr tv'ald.”

⁶ V'eti Atua itu vtmien ilil mau. Sena si lera, Paivul ivr ti a, “Atua imlen m'ertu iukl hin, v'eti itu vtmienan a m'ertu v'len.”

V'ahienam'i ipav'a a nadep' arna nahn Atua

⁷ Sena si lera, kam'i pavlak a nv' Atua. Pavmlen a Sitan, laha, hin iparuh asnm'i.

⁸ Kam'i pavmima asn Atua, laha hin ipamima asnm'i. Kam'i kvv'i m'ertu stu, pavsila lm'am'i. Kam'i v'ahienam'i iru, pavhsrasr a nlm'i.

⁹ Kam'i pavrn istu kavtakal kavvalau. Ip'as a ti vtmienam'i ipama kav'i tklien, laha, nl p'asam'i ipama kadadv.

¹⁰ Kam'i v'ahienam'i ipav'a a nadep' arna nahn a Mlin Eia, laha, hin ipauala kam'i eia.

Mavrur si stua tv'elm'i kavv'ana hua m'er

¹¹ Tv'alk, kam'i mavvrur si stua tv'elm'i. M'ertu ivrur si stua tv'aln kav'ana m'a tv'aln, inep'a ti hin ivrur si stua v'nen huan Atua kav'ana m'a v'nen hua. V'eti ipavr ti nakm pav'ana m'a v'nen hua, nakm kaav'i m'ertu ksapa v'nen hua, v'eti kv'i m'ertu kv'ana m'a v'nen hua uaki.

¹² M'ertu iamk uaki itu v'nen hua, karndu ti ipalev'la m'ertu v'aha kutakm a m'ertu. ?Nakm kv'ah ti kv'i ak, hin pav'ana hua m'a m'ertu uraur?

Mavukl kam'i sena napn uraur

¹³ Nrn ti kam'i pavrn v'nenak, kam'i la kvvr ti a, “Dika v'aha m'ih, p'vrav'a arna v'anu kinkin ipamk, kavlak atlera pai ipamk, kavul sei kavulul a sei kavpasla nav'et aranan ha.”

¹⁴ V'eti kam'i kaavrndu sei ipatu hin m'ih. ?Sena ti silv'ienam'i iv'i v'ata? Inep'a m'elidu, la alei iap'arei ha, sarei iruh ml.

¹⁵ Iviviln a ti pavvr ti a, “Ipavr ti a Mlin Eia iparni, katu nakd silv'ienad, p'van si laha v'aha si lera.”

¹⁶ V'eti hilaha kam'i kvukl kam'i kavrn ip'as. Naran m'ertu avrn ip'as inap'i lera, si lera udlani iv'i si stu.

¹⁷ Sena si lera, ipavr ti m'ertu kinkin irndu navanel na ti ipan si p'as, v'eti iahani, m'ertu nen ien si stu.