Sim'is 2 - V'nen P'as iv'i Turanien Trtarep' m'a Turanien M'dah

Mavv'ahur nah m'ertu arna v'ahien p'asam'i

¹ Tv'alk, kvv'ah a Mlin Lilad, a Iesu Kristu, iv'i Mlin na si p'sp'as udlani. Mavv'ahur nah m'ertu arna v'ahien p'asam'i.

² Sena ti ipavr ti dui kinkin ipama al nmah sasam'i, kaua rin iv'i kul, m'a klus p'as, v'eti dui uraur ipama kaua klus stu,

³ Ipavr ti kam'i pavv'ahur aula klusan ip'as ra, kavvr ani, kavvr ti a, “Nakm palak arna nut p'as laha,” kavvr an aula sian ihei ha, kavvr ti a, “Nakm pap'tir atlera,” v'aha, “Palak asn tlk atlaha,”

⁴ Ipavr ti kam'i pavani ipanap'i lera, nsarei pavv'ahur nah m'ertu, kavv'ahur m'ertu arna v'ahien stu.

⁵ Tv'alk, nlap'as a kam'i istudau, pav'rn a v'nenak. Atua iv'lair m'ertu siar ihei arna nadep' ka a ti apavlini a v'ahien p'as, dav'a kavlev' v'anu p'asan Atua, la itturan sarei anr nelnal udlani avlap'as ani ha.

⁶ V'eti kam'i kvsip'len m'ertu siar ihei. ?V'eti hir ak avutakm a kam'i, kavrv' kam'i a ti pavrav'a arna kut? Nsarei avv'i m'ertu siar istudau uaki.

⁷ Nsarei hir avsip'len naha p'as lera, la Atua iv'ara a kam'i aranan ha.

⁸ Ipavr ti kam'i pavsapa v'nen hua na v'anuan Atua ipanep'a nut Paivul ivri inap'ei, kavr ti a, “Palap'as a tv'alm inep'a ti iv'ih,” kam'i pavan si p'as.

⁹ V'eti ipavr ti pavv'ahur nah m'ertu, pavan si stu. V'nen huan Atua ipav'iv'en ti kvluvn ani.

¹⁰ Sena ti m'ertu iuada v'nen hua udlani, v'eti kaluvn a nki iamk uaki, hin inep'a ti iluvn a v'nen hua udlani.

¹¹ Sena ti Atua, la ivr ti, “Mav'nah tav'et,” Hin ivri ml, kavr ti a, “Marpep'n m'ertu.” V'eti ipavr ti nakm kaav'nah tav'et, v'eti krpep'n m'ertu, nakm kluvn a v'nen hua.

¹² Kam'i pavv'ana kavan sei ipanep'a m'ertu la Atua ipav'ana hua m'er arna v'nen hua na m'ertu dau.

¹³ Sena ti m'ertu iarn istu a m'ertu uraur, Atua ipav'ana hua m'ei, ikarn istu ani. V'eti m'ertu irn istu a m'ertu, hin ip'as kasiv' m'ertu iv'ana hua m'a m'ertu uaki.

V'ahien p'as, ipavr ti parian ihei, inep'a ti v'ahien nen im'a

¹⁴ ?Tv'alk, ipavr ti m'ertu kinkin ivr ti iv'ah Atua, v'eti iahan si p'as kinkin, hin ipalev' v'ata aranan? ?V'ahien lera ipalev'lei?

¹⁵ Ipavr ti tv'elm'i v'aha a v'nm'i klusar ihei v'aha tim'ahar ihei, nki na napn udlani, ihei asnr,

¹⁶ Laha, ipavr ti kam'i kinkin ipamk pavr anr kavr ti a, “Kam'i pavv'el arna tamat. Mavrn m'la, pavrapd.” ?V'eti ipavr ti kaavtu sei iviviln a p'akr anr, kvan v'ata ip'as?

¹⁷ V'ahien p'as inap'i lera. Ipavr ti parian ihei, iter vn uaki, v'ahien lera inep'a ti im'a.

¹⁸ V'eti nsarei m'ertu kinkin ipavr ti a, “Nakm v'ahien p'as iter asnm, v'eti kana pari p'as iter asnk.” Nakm pav'iv'en a kana v'ahien p'asam parian ihei, v'eti kana p'ev'iv'en v'ahien p'asak anh arna pariak.

¹⁹ Nakm kv'ah ti Atua iamk uaki. Kan si p'as, v'eti m'im'iln stu udlani avv'ah si lera kavvrdedrn sanan.

²⁰ V'eti dui, ptm ihei, kaarndu ti m'ertu pari p'as ihei asnn, hin v'ahien p'asan im'a?

²¹ Nsarei a Epraham, iv'i a tetiad, hin iviviln arna nahn Atua sena pari p'asan, naran ien uvrin katau Aisak iv'i a natn arna nev'etet.

²² Arna si lera, pala ti v'ahien p'asan ip'lt m'a parian. Laha, parian iani ti v'ahienan iv'i v'ahien p'as dau.

²³ Laha, ima kanep'a nut Paivul ivri inap'ei kavr ti a, “A Epraham iv'ah Atua, laha, Atua ilei inep'a ti iviviln arna nahn.” Laha, avr ti a Epraham iv'i tv'aln Atua.

²⁴ Hilaha, pavla ti m'ertu ikaviviln arna nahn Atua sena v'ahien p'asan uaki, v'eti ikp'lt m'a pari nen pr.

²⁵ Inep'a nut a Rehap, iv'i tav'et na navanel, ima kaviviln arna nahn Atua arna parian naran ilav'r dui na v'nenan a Susua, katap'er arhau arna navanel uraur.

²⁶ Sena si lera, ipavr ti pari nen ihei, v'ahien p'as im'a, inep'a nut p'ak m'ertu im'a inap'ei, naran m'im'iln ihei.