Rum 9 - V'nen P'as iv'i Turanien Trtarep' m'a Turanien M'dah

Hin a Pul irn istu sena ti nelnal a Isrel ahavrn v'nen p'as

¹ Kana nvr v'nen viviln aranan a Kristu. Nahap'il. M'im'iln P'as iv'iv'en si lera arna v'ahienak.

² A ti kana nlk idv ihuadau, karn istu dav'a.

³ Aau, imvr ti navanel imiak, m'rn imp'as a ti a Kristu ipasran kana a ti p'emln sena tv'alk, la avv'i nl nam'elak arna nadep' ha, a ti apavp'as.

⁴ Sena ti hir avv'i m'ertu a Isrel, la Atua ilav'r a ti apavv'i a natn ha, kavla si p'sp'asan Atua. Atua itu turanienan anr, katu v'nen huan, katu navanel na ti apavpatei Atua, katuran a sei istudau asnr.

⁵ Hir avv'i a natr a tetiad itauamu tituei. Arna p'akn, a Kristu ima arna nl nam'elar. Hin iv'i Atua kasiv' si udlani, apapatei dav'a ikahiris naran. Amen.

Atua iv'lair m'ertu hin irni uaki

⁶ Iav'i ti v'nenan Atua iaan si kinkin. Sena ti iav'i m'ertu a Isrel udlani avv'i Isrel dau.

⁷ Inap'i lera, iav'i m'ertu udlani avlak arna nl nam'elan a Epraham avv'i a natn, sena ti Atua ivr ti a, “A natn Aisak uaki apavv'i nl nam'elam dau.”

⁸ Inep'a ti ivr ti a, Iav'i mardel tav'et uaki ilav'i avv'i a natn Atua, v'eti mardel aviak arna turanienan Atua avv'i nl nam'elan a Epraham.

⁹ Sena ti turanienan Atua ivr si laha kavr ti a, “Arna naran laha arna pai lahadei Kana p'ama, laha a Sera ipalev' a natn dui.”

¹⁰ V'eti iav'i si lera uaki. Sena ti a Ripeka ilev' m'alev' arru asn a tetiad iv'i Aisak.

¹¹ V'eti sei Atua irni ipatu hin pr. Hin iv'lair m'ertuan, iav'i sena parei avani, v'eti sena ti Hin iv'ara anr uaki. Sena si lera, naran mardel arru adariak, adaran si p'as v'aha si stu kinkin, Atua ivr an a Ripeka kavr ti a,

¹² “Titiamu ipav'i dui na m'akariena titiatah.”

¹³ Inep'a nut Paivul ivri inap'ei kavr ti a, “Kana nlap'as an a Sikup kalep'lei a Isau.”

Atua iv'iv'en ti Hin iviviln naran iv'ara a m'ertuan kani ti m'ertu uraur apavrama kavhua arna ptr

¹⁴ ?Ipavr ti inap'i lera, p'vvr v'ata ml? ?Atua p'kln iaviviln? Ihei.

¹⁵ Sena ti Hin ivr an a Musis kavr ti a, “Kana p'etu vtmienak anr m'ertu uaki nrn ti p'etau anr, karn istu anr m'ertu uaki kana nrni.”

¹⁶ Sena si lera, iav'i sena sei m'ertu irni v'aha sena sei m'ertu iani, v'eti iv'i sena vtmienan Atua uaki.

¹⁷ Sena ti Paivul ivr ti Atua ivr an a Veru kavr ti a, “Kana nani ti kp'tir sena si iamk uaki, a ti p'ev'iv'en nut huak aranam, a ti apavrp'ep'a nahak arna nadep' udlani.”

¹⁸ Sena si lera, Atua itu vtmienan karn istu anr m'ertu uaki hin irni, kani ti m'ertu uraur ihua arna ptn, inep'a nut Hin irni inap'ei.

¹⁹ V'eti nsarei pavr a kana kavr ti a, “?Ipavr ti ipanap'i lera, inap'i hin Atua ipasla si stuad ml? ?Sena ti hin ak itukar sei Atua irni?”

²⁰ ?V'eti dui, nakm kv'i ak a ti pavrpren Atua kav'ana hua m'ei? ?Kv'ah ti iviviln a ti sei m'ertu iani ipavr ani, kavr ti a, “?Inap'i hin kan kana inap'i laha?”

²¹ M'ertu ien ssv'en a vdrei nut huan iak a ti ipani inep'a nut hin irni inap'ei. Arna pna vdrei ipan terp'as nen sena pari p'as, arna pnen uraur ipan terstu nen sena pari stu.

²² Atua inap'i lera. Hin irn ti ipav'iv'en nl reran, irn ti m'ertu apavrndu nut huan. Laha, iuada nln ip'arei asnr m'ertu iviviln a ti iputakm anr arna nl reran.

²³ Laha, irn ti m'ertu apavrndu ti si p'sp'asan ilil istudau, katu vtmienan anr m'ertu irn ti ipav'iv'en vtmienan anr, avv'i m'ertu itendedp' sarar a ti apavlak arna si p'sp'asan.

²⁴ Aau, Iv'ara a nakd inap'i lera. Navv'i m'ertu a Isrel uaki, v'eti v'anudl ml aranan.

²⁵ Inep'a nut ivri inap'ei arna pukan a Usia kavr ti a, “Kana p'ev'ara anr m'ertu apavv'i m'ertuak, la tituei ahavv'i m'ertuak ha, kav'ara a v'anu la nalap'as ani ha, kavr ti nlap'as ani.

²⁶ Laha, arna nut nvr anr kavr ti a, ‘Kam'i kaavv'i m'ertuak,’ arna nut lera apavr ti kvv'i a natn Atua la isilv' ha.”

²⁷ Aisaia iv'ara eia ml kavrur a Isrel kavr ti a, “Ipavr ti m'ertu a Isrel apavstudau kavnep'a nun a p'ak nata, v'eti Atua ipalev'la pnen pa uaki arna si stuar.

²⁸ Sena ti a Mlin Eia ipan sei itvr sarei kahiris a parian ipalahml arna p'kl vivilnan, sena ti ipan parian ipap'hp'h arna nadep'.”

²⁹ Inep'a nut Aisaia itvr sarei tituei inap'ei kavr ti a, “Imvr ti Mlin na m'rnur imaln a natd kinkin, m'vnep'a nut a Satam, kavrama kavnep'a nut a Kamara.”

M'ertu a Isrel ahavv'ah v'nen p'as

³⁰ ?Hilaha p'vvr v'ata? Nvla ti v'anudl tituei la ahavsapa p'kl viviln ha, avrama kavviviln arna p'kl viviln na v'ahien p'as.

³¹ V'eti m'ertu a Isrel, la avsapa p'kl viviln na v'nen hua ha, ahavier sei v'nen hua lera ivri.

³² ?Sena v'ata? Sena ti ahavtala ani arna v'ahien p'as, v'eti arna pari na v'nen hua. Sena ti avtitihap'el arna nav'et la Paivul ivruri ha, kavr ti a,

³³ “Pavrni, kana p'etu Nav'et ipamk arna Saiun, ipav'i nki m'ertu apavtitihap'el aranan. V'eti m'ertu udlani apavv'ahi akavmamih.”