Rum 8 - V'nen P'as iv'i Turanien Trtarep' m'a Turanien M'dah

M'im'iln P'as ilev'la m'ertuan a Iesu Kristu arna nut hua na si stu

¹ Sena si lera, hilaha Atua ikav'ana hua m'er m'ertu la ahavsapa sei p'akr irni uaki ha, v'eti avsapa M'im'iln P'as kavp'lt m'ei a Kristu Iesu.

² Sena ti v'nen hua na M'im'iln a silv'ien iani ti kana la np'lt m'ei a Kristu Iesu ha, nkalak ml a nv' nut hua na si stu m'a m'ien.

³ Atua ien sei v'nen hua iarndu ti ipani, sena ti p'akd iahua. Hin itap'ei a Natn dudau ima kaua p'ak m'ertu stu a ti iputakm a si stu arna p'ak m'ertu, kalev'la si stuar,

⁴ a ti nakd p'vsapa p'kl viviln na v'nen huan Atua. A ti nkavsapa sei p'akd irni uaki, v'eti p'vsapa sei M'im'iln P'as irni.

⁵ Sena ti m'ertu avsapa sei p'akr irni avv'ahur sia nadep'. V'eti m'ertu avsapa sei M'im'iln P'as irni avv'ahur sia M'im'iln P'as.

⁶ Sena ti ipavr ti m'ertu avv'ahur sei p'akr irni, si lera iv'i m'ien, v'eti ipavr ti m'ertu avv'ahur sia M'im'iln P'as, iv'i silv'ien m'a tamat.

⁷ Sena ti v'ahienar m'ertu avv'ahur sei p'akr irni imlen Atua, sena ti ialak a nv' v'nen huan Atua. Aau, ikarndu ti iklak a nv'n.

⁸ Sena si lera, m'ertu avsapa sei p'akr irni, Atua ikarn ip'as anr.

⁹ V'eti kam'i kaavsapa sei p'akm'i irni v'eti kvsapa sei M'im'iln P'as irni, ipavr ti M'im'iln Atua ilak a nlm'i. V'eti ipavr ti m'ertu kinkin, M'im'iln a Kristu ihei a nln, iav'i nkan.

¹⁰ V'eti ipavr ti a Kristu ilak a nlm'i, p'akm'i ipam'a sena si stu, v'eti pavsilv' arna M'im'iln P'as sena p'kl vivilnan a Kristu.

¹¹ V'eti ipavr ti M'im'iln Atua, la iani ti a Iesu ithal ml arna m'ien ha, ilak a nlm'i, hin la iani ti a Kristu ithal ml arna m'ien ha, ipani ti p'akm'i, la irn ti ipam'a ha, ipasilv' ml arna M'im'iln ilak a nlm'i.

M'im'iln P'as iani ti nvv'i a natn Atua

¹² Sena si lera, tv'alk, nakd navkaun asn p'akd a ti nkvan sei p'akd irni.

¹³ Sena ti ipavr ti arna silv'ienam'i pavsapa sei p'akm'i irni uaki, pavram'a, v'eti ipavr ti pavrpep'n paria p'akm'i arna nut hua M'im'iln P'as, pavsilv'.

¹⁴ V'eti m'ertu udlani, la M'im'iln P'asan Atua iv'av'ar ha, avv'i a natn Atua.

¹⁵ Sena ti kam'i kaavlev' m'im'iln stu kinkin a ti ipahuda kam'i pavdedrn ml, v'eti kvlev' M'im'iln P'as iani ti kvv'i a natn Atua kani ti nvvr ti a, “Tatei, Tatei.”

¹⁶ M'im'iln P'as lera, hin iv'iv'en a m'im'ild a ti nvv'i a natn Atua.

¹⁷ V'eti ipavr ti nvv'i a natn, dav'a p'vlev' sian a Tetiad. Aau, p'vlev' sian Atua. P'vlav'i m'ei a Kristu, ipavr ti p'vp'lt m'ei arna deran, dav'a ti p'vp'lt m'ei arna si p'sp'asan.

Si p'sp'as udlani la ipaier m'ertuan a Iesu ha

¹⁸ Sena ti kana nv'ah ti der ier nakd hilaha isusupadau uaki arna si p'sp'as Atua ipav'iv'en a nakd ipatauatah.

¹⁹ Sena ti si udlani Atua iani itrahi ihuadau a ti ipala naran Atua ipav'iv'en a natn.

²⁰ Sena ti si udlani Atua iani, hin itaui a ti ipama kastu. Iav'i sena ti sei iani avrni, v'eti sena ti Atua uaki itaui. V'eti avtrah naran si udlani ipama kap'as ml.

²¹ Sena ti Atua ipalev'la si udlani iani, la ip'resin arna p'kl ti ipama kastu ha. A ti ipani ti si udlani iani ipap'lt m'er a natn arna si p'sp'asar, si kinkin ikauadar.

²² Sena ti nakd nvrndu ti si udlani Atua iani ivalau karn istu inep'a tav'et ilev' sei, dav'a ier hilaha.

²³ V'eti iav'i si lera uaki avrn istu. V'eti nakd ml ntvlev' sera M'im'iln P'as, la iv'i pla si p'as ipaier nakd uam ha, nakd nvrn istu arna nld, kavtrah naran Atua ipav'iv'en a ti nvv'i a natn, iv'i naran Atua ipalev'la p'akd.

²⁴ Sena ti Atua ilev'la nakd arna ti p'evtrah turanienan. V'eti ipavr ti ntvla sera sei nvtrahi, nkavtrahi ml. ?Sena ti m'ertu itla sera sei, ipatrahi ipanap'i?

²⁵ V'eti ipavr ti p'vtrah sei nvv'ahi v'eti ndavlei, p'vtrahi ipap'arei.

²⁶ Inap'i lera, M'im'iln P'as ima kap'lt m'a nakd kasr lm'ad naran navhua. Sena ti navrndu nut p'vtu tamat ipanap'ei, v'eti M'im'iln P'as itu tamat sanad kavalau ihua isiv' v'nen udlani.

²⁷ Laha, Atua, la ila si udlani iter arna nld ha, hin irndu v'ahiena M'im'iln P'as, sena ti itu tamat sena m'ertu p'asan inep'a nut Atua irni inap'ei.

²⁸ Laha, nakd nvrndu ti arna si udlani itu hin, Atua iani ti ipamhmah anr m'ertu avlap'as ani, la itv'ara sarei anr ha, inep'a nut Hin uaki irni inap'ei.

²⁹ Sena ti m'ertu udlani Atua itv'li sarar a ti apavv'i nkan, Hin ittu sarar a ti apavnap'ei a Natn, a ti Hin ipav'i titiamu asnr tv'aln apavnelnal.

³⁰ Laha, iv'ara anr m'ertu ittu sarar a ti apavv'i nkan, kani ti nelnal itv'ara sarei anr, avrama kavviviln arna nahn, kani ti nelnal iani ti avviviln arna nahn, apavlev' si p'sp'asan.

Vtmienan Atua ikahiris naran

³¹ ?Hilaha p'vvr v'ata ml? ?Ipavr ti Atua ilak m'a nakd, hin ak ipamlen nakd?

³² Atua, la iauadei a Natn dudau ha, kataui sena nakd udlani, inap'i hin ikatuvn a si udlani a nakd?

³³ ?Hin ak ipan v'nen sanar m'ertu Atua itv'li sarar? Iv'i Atua uaki iani ti m'ertu ipaviviln arna nahn.

³⁴ ?Hin ak ipav'ana hua sena si stuad? Hin a Kristu im'a, aau, katthal ml kalak asn m'ldu lm'an Atua katu tamat sena nakd.

³⁵ ?Hin ak ipalev'la nakd arna vtmienan a Kristu? ?Ipav'i der, v'aha si dv kinkin, v'aha m'ertu apavtp'ev' nakd, v'aha m'em'erien, v'aha ti klusad ihei, v'aha si kinkin irn ti iputakm a nakd, v'aha apatrp'n nakd a talei? Ikahei.

³⁶ Inep'a nut Paivul ivri inap'ei kavr ti a, “Nut pa ti aparpep'n kam'em' m'etav'aran ipaier lihat arna napn udlani sanam'i. Av'ah ti nakd nvnep'a sivsiv apatrp'nr.”

³⁷ Ihei, nakd nvsiv' si udlani lera arna nut huan a Iesu la ilap'as a nakd ha.

³⁸ Sena ti kana nrndu mamahi ti si kinkin ihei irndu ti ipalev'la nakd arna vtmienan Atua. Ikav'i m'ien, v'aha silv'ien, v'aha ensel kinkin, v'aha m'im'iln kinkin, v'aha nut hua lil kinkin. Ikav'i sei iter arna naran laha, v'aha sei ipama uam.

³⁹ Ikav'i sei iter eia, v'aha sei iter a nadep', v'aha si kinkin uraur Atua iani, ipalev'la nakd arna vtmienan Atua, la iter aranan a Iesu Kristu ha, iv'i Mlin Lilad.