Rum 7 - V'nen P'as iv'i Turanien Trtarep' m'a Turanien M'dah

V'nen hua iahuda m'ertuan a Iesu ml

¹ Tv'alk, hilaha nv'ana m'a kam'i kvrndu v'nen hua. ?Kam'i kaavrndu ti v'nen hua iuada m'ertu arna silv'ienan uaki?

² Sena ti tav'et a naun iak, v'nen hua ihudei a ti ipalak asn a naun pr naran isilv'. V'eti ipavr ti a naun dui ipam'a, v'nen hua lera iahudei ml.

³ Sena si lera, ipavr ti ipatr asn dui uraur naran a naun isilv' uam, apavr ti iv'nahi uaki. V'eti ipavr ti a naun ipam'a, v'nen hua lera ikahudei ml. Sena si lera, ipavr ti ipatr asn dui uraur, hin iav'nahi.

⁴ Kam'i, tv'alk, kvnap'i lera. Kvram'a asn v'nen hua arna p'akn a Kristu, a ti pavm'arit m'a Dui uraur, la ithal ml arna m'ien ha, a ti nava silv'ienad ipaiak asn Atua.

⁵ Sena ti naran nvsapa sei p'akd irni uaki, v'nen hua iani ti si stu, la iter arna p'akd ha, im'akar arna p'akd. Dav'a ipatu navan iv'i m'ien.

⁶ V'eti hilaha Atua ilev'la nakd arna nut hua na v'nen hua sena ti nvram'a arna sei iuada nakd, a ti nakd m'avsapa navanel trtarep' na v'nen hua aulul ani uaki, v'eti p'vsapa navanel m'dah na M'im'iln P'as.

Nvrndu si stu sena v'nen hua

⁷ ?Hilaha p'vvr v'ata ml? ?P'vvr ti v'nen hua istu? Ikahei. Sena ti imvr ti v'nen hua ihei, m'arndu si stuak. Sena ti imvr ti v'nen hua iavr ti a, “Marn sia tv'alm”, nkarndu ti iv'i si stu.

⁸ V'eti si stu ipasla navanel arna v'nen hua, kani ti nrn nam'er a sia tv'alk arna navanel istudau. Sena ti naran v'nen hua ihei, si stu im'a.

⁹ Tituei, naran v'nen hua ihei asnk, kana nsilv'. V'eti naran v'nen hua ima, si stu ip'tir, kana nm'a.

¹⁰ Laha, v'nen hua la Atua itaui a ti ipatu silv'ien ha, nla ti ima kav'i m'ien asnk.

¹¹ Sena ti si stu ipasla navanel arna v'nen hua, kahap'il m'a kana karp kana a v'nen hua.

¹² Sena si lera, v'nen huan a Musis ip'as. V'nen hua udlani idan asn Atua kaviviln kap'as.

V'nen hua ikalev'la nakd arna si stu

¹³ ?Inap'i? ?Si p'as itu m'ien a kana? Ihei. V'eti si stu itu m'ien a kana arna si p'as, a ti m'ertu apavrndu mamh si stu iv'i v'ata. A ti si stu ipama kav'i si stu dau mau arna v'nen hua.

¹⁴ Sena ti nvrndu ti v'nen hua iv'i sia M'im'iln P'as, v'eti kana nv'i m'ertu na nadep' uaki, inep'a ti aulul a kana a ti p'ev'i m'ertu na m'akariena si stu.

¹⁵ Sena ti kana narndu sei nani. Sei nrn p'ani nahani, v'eti nen sei nlep'lei uaki.

¹⁶ Sena si lera, ipavr ti kana nen sei narn p'ani, kana nm'ahu a v'nen hua, a ti ip'as.

¹⁷ V'eti hilaha iav'i kana nani, v'eti si stu iter a nlk iani uaki.

¹⁸ Sena ti kana nrndu ti si p'as ihei asnk, la nv'i m'ertu na nadep' ha. Sena ti nrn ti p'en si p'as, v'eti narndu navanel nen.

¹⁹ Sena ti nahan si p'as nrn ti p'ani, v'eti nen si stu la narn ti p'ani ha.

²⁰ V'eti ipavr ti kana nen sei v'ahienak iarni, iav'i kana nani, v'eti si stu la iter a nlk ha.

²¹ Sena si lera, nla p'kl iamk, iv'i ti naran nrn p'en si p'as, v'eti si stu iak nakl asnk.

²² Sena ti kana arna nlk nrn ip'as a v'nen huan Atua istudau.

²³ V'eti nla p'kl uraur iter al pna p'akk ien naur m'a p'kl iter arna v'ahienak, kani ti nma kav'i m'ertu na m'akariena p'kl stu la iter arna pna p'akk ha.

²⁴ U, kana nv'i m'ertu nrn istu istudau. ?Hin ak ipalev'la kana arna nut hua na p'akk la irn ti ipasapa navanel na m'ien ha?

²⁵ Kana nvr ip'as an Atua sena ti hin ipalev'la kana aranan a Iesu Kristu, iv'i Mlin Lilad. Inap'i lera, arna v'ahienak, kana nv'i m'ertu na m'akariena v'nen huan Atua, v'eti arna p'akk nv'i m'ertu na m'akariena si stu.