Rum 6 - V'nen P'as iv'i Turanien Trtarep' m'a Turanien M'dah

Ntvram'a sarei asn si stu, nvsilv' aranan a Kristu

¹ ?Inap'i? ?P'vvr v'ata ml? ?P'van si stu a ti vtmienan Atua ipama kalil mau?

² Ikahei. Nakd ntvram'a sarei asn nut hua na si stu. ?P'vsilv' aranan ml ipanap'i?

³ ?V'aha kaavrndu ti nakd udlani la ntvpaptais sarei m'ei a Iesu Kristu ha, nvpaptais m'ei arna m'ienen?

⁴ Sena si lera, arna paptaisad inep'a ti atin nakd nvram'a m'ei. Nakd nvp'lt m'ei a Kristu arna m'ienen a ti p'vlak arna silv'ien m'dah, inep'a nut a Kristu ithal ml arna m'ienen arna si p'sp'asan a Tatei inap'ei.

⁵ Sena ti ipavr ti nakd ntvp'lt sarei m'ei, inep'a ti nvram'a m'ei, nakd p'vnap'ei arna ti ithal ml arna m'ienen.

⁶ Sena ti nvrndu ti silv'ienad tituei itam'a sarei m'ei a Kristu arna su lamu nen, a ti Atua iputakm a p'akd lera la si stu iv'i mlinan ha, a ti si stu ikav'i mlinad ml.

⁷ Sena ti m'ertu itam'a sarei ialak ml a nv' nut hua na si stu.

⁸ Hilaha, ipavr ti nakd ntvram'a sarei m'ei a Kristu, nvv'ah ti p'vsilv' ml m'ei.

⁹ Sena ti nvrndu ti a Kristu, la ithal ml arna m'ien ha, ikahm'a ml. M'ien nut huan ihei ml asnn.

¹⁰ Sena ti naran im'a, im'a iv'amk uaki sena si stu, v'eti hilaha arna silv'ienan, isilv' sanan Atua.

¹¹ Kam'i pavnap'i lera. Pavla ti ktvram'a sarei asn si stu, v'eti kvsilv' ml sanan Atua aranan a Iesu Kristu, iv'i Mlin Lilad.

¹² Sena si lera, si stu imav'i mlin arna p'akm'i la ipam'a ha, arna ti pavsapei arna sei p'akm'i irni.

¹³ Mavm'ahu a pna p'akm'i a ti ipav'i su pari stu a ti ipan si stu, v'eti pavm'ahu a kam'i asn Atua, ipanep'a m'ertu avsilv' ml arna m'ien, kavm'ahu a pna p'akm'i asn Atua a ti ipav'i su pari p'as.

¹⁴ Sena ti si stu imav'i mlinam'i ml, sena ti kaavlak a nv' v'nen hua, v'eti kvlak a nv' vtmienan Atua.

Itauamu nvv'i m'ertu na m'akariena si stu, v'eti hilaha nvrama kavv'i m'ertu na m'akarienan Atua

¹⁵ ?Inap'i hilaha? ?Nakd p'van si stu sena ti navlak a nv' v'nen hua v'eti nvlak a nv' vtmienan Atua? Ikahei.

¹⁶ ?Kaavrndu ti, ipavr ti pavm'ahu a kam'i a ti pavsapa v'nena m'ertu kinkin kavm'akaran, pavv'i m'ertu na m'akarienan? Ipavr ti pavsapa si stu dav'a kavram'a, v'aha ipavr ti pavsapa v'nenan Atua dav'a kavan sei iviviln.

¹⁷ V'eti nrn ti p'evr ip'as an Atua, sena ti tituei kvv'i m'ertu na m'akariena si stu, v'eti kvrama kavsapa v'nen arna nlm'i, la ntv'iv'en sarei a kam'i hara.

¹⁸ Laha, kam'i kvrama kavv'i m'ertu na m'akariena pari p'as, sena ti kaavp'resin ml, si stu iauada kam'i.

¹⁹ Kana nv'ana inep'a m'ertu uaki, sena ti kam'i kaavhua, kvv'i m'ertu uaki. Tituei kam'i kvm'ahu a pna p'akm'i a ti ipan si stu m'a tav'et, kavluvn a v'nen huan Atua iel. V'eti hilaha kam'i pavm'ahu a pna p'akm'i a ti ipav'i m'ertu na pari p'as arna ti pavp'as udlani.

²⁰ Sena ti naran kam'i kvv'i m'ertu na m'akariena si stu, kaavlak a nv' p'kl p'as.

²¹ ?V'eti arna naran lera kvlev' v'ata arna si lera udlani la hilaha kvmamih sanan ha? Sena ti ual si udlani lera iv'i m'ien.

²² V'eti hilaha kam'i kaavp'resin ml asn si stu, v'eti kvrama kavv'i m'ertu na m'akarienan Atua. Laha, nava silv'ienam'i iv'i p'kl p'as, dav'a ualn iv'i silv'ien ikahiris naran.

²³ Sena ti uliena si stu iv'i m'ien, v'eti sei Atua ituvn a nakd iv'i silv'ien ikahiris naran, aranan a Iesu Kristu, iv'i Mlin Lilad.