Rum 4 - V'nen P'as iv'i Turanien Trtarep' m'a Turanien M'dah

A Epraham iviviln arna nahn Atua sena v'ahien p'asan

¹ ?V'eti ipavr ti ipanap'i lera, p'vvr ti a Epraham, iv'i a tetiad, ipasla v'ata arna silv'ienan?

² Sena ti ipavr ti a Epraham iviviln arna nahn Atua sena parian, hin irndu ti ipukl hin sanan. V'eti iarndu ti ipukl hin arna nahn Atua.

³ ?Sena ti Paivul ivr v'ata? Ivr ti a, “A Epraham iv'ah Atua, laha Atua ilei inep'a ti iviviln arna nahn.”

⁴ Naran aul m'ertu ien parei, ulienan iav'i vtmien, sena ti itm'akar sarei sanan.

A Divt ivri inap'amk kavr ti m'ertu ipaviviln arna nahn Atua sena v'ahien p'asan

⁵ V'eti m'ertu iam'akar, v'eti iv'ah Atua uaki, la iani ti m'ertu stu iviviln arna nahn ha, Atua ipavr ti hin iviviln sena v'ahien p'asan.

⁶ Inap'i lera a Divt ivrur m'ertu Atua iani ti iviviln arna nahn karn ip'as, v'eti iav'i sena parian, kavr ti a,

⁷ “M'ertu la Atua itmhmah sarei ani arna si stuan ha, katinkar udlani, iparn ipap'as.

⁸ M'ertu la Atua iav'ahur si stuan kaspani ha, hin iparn ipap'as.”

A Epraham itviviln arna nahn Atua naran idahan p'au

⁹ ?Si p'as lera ipaiarr m'ertu avan p'au uaki, v'aha m'ertu ahavan p'au? Sena ti nvvr ti Atua ila ti v'ahien p'asan a Epraham iani ti iviviln arna nahn.

¹⁰ ?A Epraham inap'i, naran Atua ivr ti iviviln arna nahn? ?Iv'i dui ien p'au, v'aha dui iahan p'au? Iav'i dui ien p'au, v'eti dui iahan p'au.

¹¹ Laha, ien p'au, iv'i mak iv'iv'en ti iviviln arna nahn Atua arna v'ahien p'asan, la iv'ahi naran idahan p'au ha. A ti hin ipav'i a tetiar m'ertu udlani apavv'ah Atua la ahavan p'au ha. A ti Atua ipalar kavr ti avviviln arna nahn.

¹² Kav'i a tetiar m'ertu avan p'au, v'eti iav'i ti avan p'au uaki, v'eti avsapei a Epraham iv'i a tetiad arna navanel na v'ahien p'asan la iv'ahi naran idahan p'au ha.

A Epraham ilev' turanienan Atua sena v'ahien p'asan

¹³ Sena ti Atua ituran asn a Epraham a ti nadep' udlani ipav'i nkan, m'er nkar a natn. V'eti iaturan a si lera arna v'nen hua, v'eti arna v'ahien p'as la iani ti iviviln arna nahn Atua ha.

¹⁴ Sena ti ipavr ti turanienan Atua ipav'i nkar m'ertu avsapa v'nen hua, v'ahien p'as ima kav'i si kaka uaki, turanienan Atua ikaan si kinkin.

¹⁵ Sena ti nl reran Atua ier m'ertu arna v'nen hua. Ipavr ti v'nen hua ihei, m'ertu iarndu ti ipaluvn ani.

¹⁶ Sena si lera, turanienan Atua ip'tir arna v'ahien p'as, a ti Atua ipatuvn a sei itturan sarei ani asnr a natn a Epraham udlani. Iav'i asnr m'ertu avsapa v'nen huan a Musis uaki, v'eti asnr m'ertu la avsapa v'ahien p'asan a Epraham, iv'i a tetiad udlani ha.

¹⁷ Inep'a nut Paivul ivri inap'ei kavr ti a, “Kana nani ti pav'i a tetiar v'anu istudau.” Hin iv'i a tetiad arna nahn Atua, la iv'ahi ha, Atua la iani ti m'ertu ithal ml arna m'ien ha, kani ti sei iahiak ima katu hin arna v'nenan uaki.

¹⁸ Naran a Epraham idala si kinkin a ti sei iv'ahi ipatu hin, v'eti iv'ahi uam, katrahi. A ti hin ipama kav'i a tetiar v'anu ipastudau, inep'a nut Atua itvr sarei ani inap'ei kavr ti a, “A natm apavnelnal kavnap'i lera.”

¹⁹ Laha, hin ihua uam arna v'ahien p'asan. Iav'ah ti p'akn inep'a ti itam'a sarei, naran paian ihih ti ipanelnal ipav'amk (100) Iav'ahur ti naten na mardelan a Sera inep'a ti itam'a sarei.

²⁰ V'ahienan iahrs arna turanienan Atua a ti iav'ahi ml, v'eti ima kahua mau kapatei Atua.

²¹ Sena ti hin irndu mamh ti Atua irndu ti ipan si udlani itturan sarei ani.

²² Sena si lera Atua ilei inep'a ti iviviln.

²³ Ahaulul a v'nen lera, kavr ti iviviln arna nahn Atua, sanan a Epraham uaki.

²⁴ V'eti aulul ani sena nakd ml. Sena ti Atua ipala nakd inep'a ti nvviviln, ipavr ti p'vv'ah Hin la iani ti a Mlin Lilad a Iesu ithal ml arna m'ien ha.

²⁵ Atua itau a Iesu al lm'ar m'ertu avlep'lei, sena ti nakd nvluvn a v'nen huan, kani ti ithal ml arna m'ien, sena ti nakd p'vviviln arna nahn.