Rum 3 - V'nen P'as iv'i Turanien Trtarep' m'a Turanien M'dah

Atua iv'ana hua arna p'kl viviln

¹ ?Ipavr ti inap'i lera, m'ertu a Isrel avlev' v'ata mau sena ti avv'i m'ertu a Isrel, v'aha avlev' v'ata mau sena ti avan p'au?

² Hir avlev' sei istudau arna navanel inelnal. Si lil iv'i ti Atua ittu sera v'nenan al lm'ar.

³ ?Ipavr ti hir kinkin ahavv'ahi, kvv'ah ti si lera ipani ti v'ahien p'asan Atua ikaan si kinkin ml?

⁴ Ikahei. Ipavr ti m'ertu udlani apavhap'il, Atua ipaviviln uam. Inep'a nut Paivul ivri inap'ei kavr ti a, “V'nenam udlani ipav'iv'en ti kviviln. Nakm pasiv'r m'ertu udlani apavv'ana hua m'ah.”

⁵ ?V'eti ipavr ti p'kl stuad ipav'iv'en p'kl p'asan Atua, p'vvr v'ata? ?Kvv'ah ti p'kln Atua iaviviln naran nln iparer a nakd? (Kana nv'ana inep'a m'ertu uaki.)

⁶ Ikahei. ?Sena ti ipavr ti ipanap'i lera, Atua ipav'ana hua m'er m'ertu udlani arna nadep' ipanap'i?

⁷ ?Sena ti ipavr ti v'nen duan Atua m'a si p'sp'asan ipama arna nut m'auar sena ti nhap'il, hin ipav'ana m'a kana kavr ti nv'i m'ertu stu sena v'ata?

⁸ Inep'a ti avr ti a, “P'van si stu a ti si p'as ipama.” M'ertu kinkin avvr ti kam'em' nvvr si lera. Iviviln a ti Atua ipav'ana hua m'er sanan.

Mertu udlani atvan sera si stu

⁹ ?Inap'i? ?Nakd nvp'as kavsiv'r v'anudl? Ihei. Ikahei. Sena ti ntvv'iv'en sarei ti m'ertu a Isrel m'er v'anudl hir udlani avlak a nv' nut hua na si stu.

¹⁰ Inep'a nut Paivul ivri inap'ei kavr ti a, “M'ertu kinkin ihei iviviln. Aau, m'ertu nen ihei.

¹¹ M'ertu kinkin ihei irndu sei. M'ertu kinkin ihei itala an Atua.

¹² Hir udlani atvln sera navanel p'as. Hir udlani ahavp'as a si kinkin ml. M'ertu kinkin ihei ien si p'as. Aau, m'ertu nen ihei.

¹³ Nl navar inep'a tah atin m'ertu a nln. Hap'ilien idan arna nm'r. V'nen idan al pnr inep'a sera pusen idan al pn nmat.

¹⁴ Nl navar ilini a lslsien m'a v'nen ihaau.

¹⁵ Avvrvr arna tlr a ti apavani ti di m'ertu ipararev'.

¹⁶ Avutakm a m'ertu kavtu der anr nakl arna navanelar.

¹⁷ Ahavrndu navanel na tamat nakl.

¹⁸ Ahavdedrn an Atua arna v'ahienar naran kinkin.”

¹⁹ Laha, nakd nvrndu ti si udlani v'nen hua ivri, ivr anr m'ertu avlak a nv' v'nen hua, a ti Atua ipap'leskar pnr m'ertu udlani. Laha, m'ertu udlani arna nadep' apavrama kavstu arna nahn Atua.

²⁰ Sena si lera, m'ertu kinkin ikaviviln arna nahn Atua sena ti isapa v'nen hua. V'nen hua iani ti m'ertu irndu si stuan.

Nvviviln arna nahn Atua sena v'ahien p'as uaki

²¹ V'eti hilaha Atua iv'iv'en p'kl vivilnan, iav'i sena ti m'ertu avsapa v'nen hua. V'nen hua m'er pruvet atvvr sera si lera arna Paivul.

²² P'kl viviln lera iv'i ti m'ertu udlani apavv'ah a Iesu Kristu apavviviln arna nahn Atua, sena ti avv'ahi uaki. Sena ti m'ertu udlani avnap'amk uaki.

²³ Sena ti m'ertu udlani atvan sera si stu. Ahavier si p'sp'asan Atua.

²⁴ Avrama kavviviln arna nahn Atua arna vtmienan, sena ti a Kristu Iesu itulla sarar.

²⁵ Atua itaui a ti ipakasr nl reran, kulla m'ertu avv'ahi, a din. Si lera iv'iv'en p'kl vivilnan, sena ti v'ahienan ip'arei, sena ti iutakm a m'ertu atvan sera si stu tituei.

²⁶ Arna si lera, Atua iv'iv'en p'kl vivilnan hilaha a ti Hin iviviln kani ti m'ertu iv'ah a Iesu ipaviviln arna nahn.

Nkavukl nakd arna si kinkin

²⁷ ?Ipavr ti inap'i lera, m'ertu irndu ti ipukl hin ipanap'i? Ikahei. ?V'ata itukari a ti ikaukl hin? ?Iv'i navanel na pari p'as? Ihei, iv'i navanel na v'ahien p'as.

²⁸ Sena si lera, nvla ti m'ertu iviviln arna nahn Atua arna v'ahien p'as, iav'i sena ti ien pari na v'nen hua.

²⁹ ?Inap'i? ?Atua iv'i Atuar m'ertu a Isrel uaki? ?Iav'i Atuar v'anudl? Ihei, Hin iv'i Atuar v'anudl ml aranan.

³⁰ Sena ti Atua iamk iani ti m'ertu avan p'au apavviviln arna nahn arna v'ahien p'as, kani ti m'ertu ahavan p'au apavviviln arna nahn arna v'ahien p'as.

³¹ ?Inap'i? ?Nvani ti v'nen hua ima kav'i si vn sena v'ahien p'as? Ikahei, v'eti nvani ti v'nen hua ip'tir.