Rum 16 - V'nen P'as iv'i Turanien Trtarep' m'a Turanien M'dah

A Pul ivr ip'as anr m'ertu kinkin arna sas

¹ Kana nrn ti p'evrp'ep'ei a kam'i a ti a Vipi iv'i a v'nd, kav'i tav'et na m'akariena sas iter a nut a Kenkria.

² Nrn ti kam'i pavlav'i arna nahan a Mlin Lilad, inep'a nut iviviln a ti m'ertuan Atua apavani ipanap'ei, kavmhmah ani arna si udlani hin irni. Sena ti hin itmhmah sarei a m'ertu istudau, kamhmah a kana ml.

³ Nvr ip'as an a Prisila m'ei Akuila, arsr lm'ak arna parian a Kristu Iesu.

⁴ Hir nut pa ti arpep'nr sena ti arrn ti aparlev'la silv'ienak arna der. Nrn ti p'evr ip'as anr sanan, v'eti iav'i kana uaki, v'eti sasar v'anudl udlani avvr ip'as anr.

⁵ Nvr ip'as a sas iter al nmahar. Nvr ip'as an a Epainetas la nlap'as ani istudau ha. Hin iv'i dui iv'ah a Kristu itauamu arna nut Akaia.

⁶ Nvr ip'as an a Meri la im'akar istudau sanam'em' ha.

⁷ Nvr ip'as anr Adrunikas m'ei a Sunias, arlak arna nl nam'elak karlak m'a kana al p'resin tituei. Hir nahar iv'a eia m'er apusel karv'i Kristin naran kana ndav'ah a Iesu.

⁸ Nvr ip'as an Amplias, nlap'as ani aranan a Mlin Lilad.

⁹ Nvr ip'as an a Urpanas, isr lm'am'em' arna parian a Kristu, kavr ip'as an a Stakis la nlap'as ani ha.

¹⁰ Nvr ip'as an Apeles, la itv'iv'en sera ti iv'i m'ertuan a Kristu ha, kavr ip'as anr m'ertu udlani avlak al nmahan Aristupulas.

¹¹ Nvr ip'as an a Erutian, iv'i nl nam'elak, kavr ip'as anr m'ertuan a Mlin Lilad udlani la avlak al nmahan a Nasisas ha.

¹² Nvr ip'as an a Travina m'ei a Travusa, la arm'akaran a Mlin Lilad ha, kavr ip'as an a Pesis im'akaran a Mlin Lilad istudau.

¹³ Nvr ip'as an a Ruvas, iv'i dui lil iamk arna nahn a Mlin Lilad, kavr ip'as an a unian, hin iv'i a uniak.

¹⁴ Nvr ip'as anr Asinkritas, a Vlekun, a Emas, a Patrupas, a Emis, m'er tv'ald udlani avlak m'er.

¹⁵ Nvr ip'as an a Vilulukas m'ei a Sulia, a Nerias m'ei a v'nn, m'ei a Ulimpas m'er m'ertuan Atua udlani avlak m'er.

¹⁶ Kam'i udlani pavvr ip'as kavkis m'a kam'i, sena ti kvv'i tiamk arna vtmienan Atua. Sasan a Kristu udlani avvr ip'as a kam'i.

Mavp'lt m'er m'ertu avani ti sas itupr hin

¹⁷ Artv'alk, kana nmiman a kam'i ihua a ti pavp'a mamh m'ertu avani ti sas ipatupr hin, kavani ti m'ertu avrars, ahavsapa v'nen atv'iv'en sarei a kam'i. Kam'i mavp'lt m'er.

¹⁸ Sena ti m'ertu avnap'i lera ahavm'akaran a Mlin Lilad a Iesu Kristu, v'eti avm'akar sena v'atr uaki, kavhap'il m'er m'ertu ahavrndu sei arna v'nen la avv'ah ti ip'as ha, kavv'ana mamh m'er.

¹⁹ M'ertu udlani atvrn sera ti kam'i kvsapa mamh v'nen p'as. Kana nrn ip'as a kam'i istudau sanan. V'eti nrn ti kam'i pavrndu mamh si p'as, v'eti mavrndu navanel stu.

²⁰ Ikap'arei, Atua iv'i Mlin na tamat, hin ipani ti kam'i pavutakm an a Sitan kavpasi. Nrn ti vtmienan a Mlin Lilad a Iesu Kristu ipater asnm'i. Amen.

Tv'aln a Pul kinkin avvr ip'as anr m'ertu avlak arna sas a Rum

²¹ Hin a Timuti, nrv'i tiamk arna parei, m'er a Lusias, a Sesun, a Susipata avv'i nl nam'elak, avvr ip'as a kam'i.

²² Kana, nv'i a Tasias, nulul a v'nenan a Pul arna ruplet laha, nvr ip'as a kam'i kap'lt m'a kam'i asn a Mlin Lilad.

²³ Hin a Kaias, ilev' kana nlak al nmahan, m'a sas udlani, avvr ip'as a kam'i. Erastas, iv'i dui ip'aur nav'et arna v'anu, m'ei a Kuatas, iv'i tv'ald, hir arvr ip'as a kam'i.

²⁴ Nrn ti vtmienan a Mlin Lilad a Iesu Kristu ipater asnm'i udlani. Amen.

Nahan Atua ipav'a eia

²⁵ Atua nut huan iak a ti ipani ti pavp'tir arna v'nen p'as nvrp'ep'ei, ivrur a Iesu Kristu. V'nen p'as lera ivrp'ep'a sei itutuah, naran nadep' idahei dav'a ier hilaha.

²⁶ V'eti hilaha Atua, la ilak nakl ha, iani ti ima arna nut m'auar arna sei dui na v'nenan avulul ani, kataui a ti apavvrp'ep'ei arna v'anu udlani a ti apavsapa v'ahien p'as.

²⁷ Atua, Hin uaki irndu sei. Nrn ti nahan ipav'a eia aranan a Iesu Kristu ikahiris naran. Amen.