Rum 15 - V'nen P'as iv'i Turanien Trtarep' m'a Turanien M'dah

P'vua si dvar m'ertu uraur

¹ Iviviln a ti nakd la nvhua ha, p'vua si dvar m'ertu ahavhua. M'avv'ahur nakd uaki.

² Ip'as a ti nakd udlani p'van sei tv'ald irn ip'as ani, ipavr ti iv'i si p'as, a ti v'ahienan ipahua.

³ Sena ti a Kristu inap'i lera. Hin iav'ahur Hin, v'eti v'nen Paivul ivri ittu sera hin asnn, ivr ti a, “M'ertu avsip'lanh, avsip'len Kana inap'i lera.”

⁴ Sena ti si udlani aulul ani tituei arna Paivul iv'i ti ipav'iv'en sei a nakd, a ti nakd nld ipap'arei kavrn ip'as kavtrah turanienan Atua.

⁵ Nrn ti Atua la iani ti nld ip'arei kani ti nvp'tir ihua ha, ipani ti kam'i pavamk arna v'ahienam'i kavnap'ei a Kristu Iesu.

⁶ A ti kam'i udlani pavp'lt arna v'ahienam'i kavpatei Atua, iv'i a Tetian a Mlin Lilad a Iesu Kristu, arna nadl ipamk.

M'ertu a Isrel m'er v'anudl apavp'lt kavpatei Atua

⁷ Sena si lera, kam'i pavlev' tv'elm'i inep'a nut a Kristu ilev' nakd, a ti nahan Atua ipav'a eia.

⁸ Sena ti kana nvr a kam'i ti a Iesu Kristu ima kav'i M'ertu na m'akarienar m'ertu avan p'au a ti ipani ti turanien la Atua ittu sarei anr a tetiad tituei ha, ipatu hin.

⁹ Kadama a ti v'anudl apavpatei Atua sena ti irn istu anr, inep'a nut Paivul ivri inap'ei kavr ti a, “Sena si lera kana p'evrp'ep'ah kahai kapata naham arna nahr v'anudl.”

¹⁰ Paivul ivri ml kavr ti a, “U kam'i kvv'i v'anudl, pavrn ip'as m'er m'ertuan Atua.”

¹¹ Kavri ml kavr ti a, “Kam'i v'anudl udlani, pavpatei a Mlin Eia. M'ertu udlani, pavani ti nahan ipav'a eia.”

¹² Aisaia ivri ml kavr ti a, “Dui ipamk ipadan arna nl nam'elan a Sesi. Atua ipani ti ipap'tir kav'i Mlinar v'anudl. Laha, arv'anudl apavtrahi.”

¹³ Nrn ti Atua, la iani ti nvtrah turanienan ha, ipani ti pavrn ipap'as ipastudau arna nlm'i udlani, kavlini a tamat arna v'ahien p'asam'i, kani ti pavhua arna v'ahienam'i kavtrah turanienan Atua arna nut hua M'im'iln P'as.

A Kristu itau a Pul a ti ipav'i misinari anr v'anudl udlani

¹⁴ V'eti tv'alk, kana nrndu mamh a ti kam'i kvlini a si p'as, kavrndu sei istudau. Nrndu ti kam'i kvrndu ti pavv'iv'en navanel p'as anr tv'elm'i.

¹⁵ V'eti tv'alk, v'nen kinkin nulul ani asnm'i ihua isusupa, a ti kam'i mavvnapn ani, sena ti Atua ittu sera vtmienan a kana.

¹⁶ Kani ti p'ev'i m'ertu na m'akarienan a Iesu Kristu asnr v'anudl, a ti p'en paria pris kavrp'ep'a v'nen p'asan Atua a ti p'etau arv'anudl an Atua. Laha, M'im'iln P'as iani ti avp'as arna nahn.

¹⁷ Nsarei iviviln a ti p'ukl kana sena parei nani sanan Atua, sena ti np'lt m'ei a Iesu Kristu.

¹⁸ Nkavrur si uraur a Kristu iahani, v'eti p'evrur sei uaki a Kristu iani arna pariak m'a v'nenak, a ti v'anudl apavsapei.

¹⁹ Nen si lera arna pari lilil iv'iv'en sei m'a pari lilil m'ertu avtah ani, arna nut huan a M'im'iln Atua, dav'a ti nvrp'ep'a v'nen p'asan a Kristu arna nut udlani. Nvrp'ep'ei arna nut a Serusalem dav'a kaier nut a Ilirikam.

²⁰ Aau, nen si lera sena ti nrn ti p'evrp'ep'a v'nen p'as arna nut adavrn nahan a Kristu naran kinkin. Imahei ti kana p'hl si kinkin ipap'tir arna paria m'ertu uraur.

²¹ Inep'a nut Paivul ivri inap'ei kavr ti a, “M'ertu la adavvrp'ep'a nahan asnr ha, hir apavlei, m'ertu adavrn v'nen p'as naran kinkin, hir apavrndaui.”

A Pul ivrur navanel ipasapei a ti ipalar a Rum

²² Sena si lera, sei istudau itukar kana a ti nkahma asnm'i.

²³ V'eti hilaha, pariak arna nut lera ihiris. Arna pai istudau nrn nam'er a ti p'ama asnm'i.

²⁴ Sena si lera, nsarei p'ela kam'i arna navanelak naran p'av'a arna nut a Spen. Dav'a p'elak m'a kam'i ipasusupa karn ipap'as m'a kam'i. Sarei, kam'i pavmhmah a kana arna navanelak ipav'a atlera.

²⁵ V'eti hilaha nrn ti p'av'a arna nut a Serusalem a ti p'emhmah anr m'ertuan Atua atlera.

²⁶ Sena ti m'ertu a Masetunia m'ei Akaia avrn ip'as a ti apavtep'a nav'et kinkin asnr m'ertuan Atua siar ihei avlak a Serusalem.

²⁷ Aau, avrn ip'as ani. Nvrdaui, iviviln a ti apavtu m'lna sei anr. Sena ti v'anudl avlev' sia M'im'iln P'as asnr. Sena si lera iviviln a ti apavmhmah anr arna sei a nadep'.

²⁸ Laha, naran p'ehiris a pari lera kattu sera nav'et lera anr, iv'i nava pariar, kana p'ama asnm'i arna navanelak naran p'av'a a Spen.

²⁹ Naran p'ama asnm'i, nrndu mamh a ti p'elini a si p'sp'as na v'nen p'asan a Kristu, kauirma asnm'i.

³⁰ V'eti tv'alk, nmiman a kam'i ihua sanan a Mlin Lilad a Iesu Kristu m'a vtmienan a M'im'iln P'as, a ti pavm'akar ipahua m'a kana arna tamatam'i asn Atua sena kana,

³¹ a ti Atua ipalev'la kana al lm'ar m'ertu ahavv'ahi arna nut a Sutia, a ti m'ertuan Atua avlak a Serusalem apavrn ipap'as sena pariak.

³² Sarei, p'ama asnm'i karn ipap'as, ipavr ti iv'i sei Atua irni, karnrn kana asnm'i.

³³ Nrn ti Atua na tamat ipalak m'a kam'i udlani. Amen.