Rum 14 - V'nen P'as iv'i Turanien Trtarep' m'a Turanien M'dah

Mavv'ana hua m'er tv'elm'i

¹ Ipavr ti m'ertu kinkin iahua arna v'ahienan, pavlav'i uaki asnm'i, v'eti imav'i ti pavv'lv'al m'ei sena v'ahienan.

² Sena ti m'ertu kinkin iv'ah ti iviviln a ti ipahan si udlani, v'eti tv'aln la iahua ha, ihan sei isi al pitvet uaki.

³ M'ertu ihan si udlani imasip'len m'ertu la iahan si udlani ha, v'aha m'ertu iahan si udlani imav'ana hua m'a m'ertu ihan si udlani, sena ti Atua itlev' sarei.

⁴ ?Nakm kv'i ak, hin kv'ana hua m'a m'ertu na m'akariena m'ertu uraur? Sena ti hin ipap'tir v'aha ipars arna nahn a mlinan uaki. Hin ipap'tir, sena ti a Mlinad irndu ti ipani ti ipap'tir.

⁵ M'ertu iamk iv'ah ti napn iamk ilil mau kasiv' teruraur, v'eti tv'aln iv'ah ti napn udlani inap'amk uaki. Ip'as a ti m'ertu udlani p'sev' iparndu mamh v'ahienan.

⁶ M'ertu iv'ah ti napn kinkin ilil, iani ilil a ti nahan a Mlin Lilad ipav'a eia, v'aha m'ertu iav'ah ti napn kinkin ilil kasiv' teruraur, ien si lera a ti ipani ti nahan a Mlin Lilad ipav'a eia. M'ertu ihatat, ihatat a ti nahan a Mlin Lilad ipav'a eia, sena ti ivr ip'as an Atua sanan. V'eti m'ertu iahatat, hin iahatat, a ti ipani ti nahan a Mlin Lilad ipav'a eia, kavr ip'as ani.

⁷ Sena ti m'ertu kinkin iahmk asnd isilv' sena hin uaki, v'aha im'a sena hin uaki.

⁸ Sena ti ipavr ti nvsilv', nvsilv' sanan a Mlin Lilad, v'aha ipavr ti nvram'a, nvram'a sanan a Mlin Lilad. Sena si lera, ipavr ti nvsilv', v'aha nvram'a, nvv'i m'ertuan a Mlin Lilad.

⁹ Sena ti a Kristu im'a sena si lera, kathal ml kasilv', a ti ipav'i Mlinar m'ertu avram'a m'er m'ertu avsilv'.

¹⁰ ?V'eti nakm kv'ana hua m'a tv'alm sena v'ata, v'aha ksip'len tv'alm sena v'ata? Sena ti nakd udlani p'vp'tir arna nahn a Kristu naran ipav'ana hua m'a m'ertu.

¹¹ Sena ti Paivul ivr ti a, “A Mlin Eia ivr ti a, Nvrdaui, inep'a nut nsilv' inap'ei, m'ertu udlani apavsisihpu asnk kavvrp'ep'ei arna nm'ar a ti Kana nv'i Atua.”

¹² Sena si lera, nakd udlani p'vamk p'sev' p'vvr an Atua nut nvsilv' inap'ei.

¹³ Sena si lera m'avv'ana hua m'a nakd ml, v'eti p'vv'ahur si laha, a ti m'ertu kinkin imatu sei arna navanela tv'aln a ti ipatitihap'el aranan kadars.

Mautakm a tv'alm

¹⁴ Kana nrndu ti np'lt m'ei a Mlin Lilad a Iesu, sena si lera nkalalau a tim'ah kinkin. V'eti ipavr ti m'ertu kinkin iv'ah ti ipalalau a tim'ah kinkin, hin ipalalau ani pr.

¹⁵ V'eti ipavr ti tv'alm irn istu sena ti nakm khan tim'ah kinkin, nakm kaasapa navanel na vtmien ml. Mautakm a tv'alm, la a Iesu itam'a sarei sanan ha, sena ti nakm khan tim'ah kinkin uaki.

¹⁶ Sena si lera, mam'ahu a ti m'ertu apavla pari p'asam kavvr ti iv'i si stu.

¹⁷ Sena ti v'anuan Atua iav'i tim'ah v'aha nauei, v'eti iv'i p'kl viviln m'a tamat, kav'i ti m'ertu apavrn ipap'as arna M'im'iln P'as.

¹⁸ Sena ti naran m'ertu kinkin ien pariana Kristu arna si lera, Atua irn ip'as, laha m'ertu avv'ah ti ien si p'as.

¹⁹ Sena si lera, nakd p'vsapa navanel ipani ti tamat ipap'tir, kavsapa sei ipamhmah a tv'ald.

²⁰ Mautakm a parian Atua sena tim'ah uaki. Tim'ah udlani ip'as uaki, v'eti ipavr ti m'ertu kinkin ipars sena tim'ah ihani, iv'i si stu asnn.

²¹ Ip'as a ti mahan m'it, v'aha mam'n naui m'iel, v'aha si kinkin la ipani ti tv'alm ipars, v'aha ipatitihap'el aranan, v'aha ipani ti ikahua ml ha.

²² ?Nakm v'ahienam ip'tir ihua arna si lera? Ip'as a ti nakm uaki parndu v'ahienam lera m'ei Atua. M'ertu la iav'ana hua m'a hin arna sei im'ahu ani ha, iparn ipap'as.

²³ V'eti m'ertu iarndu nut inap'ei, kahani uam, hin Atua ipav'ana hua m'ei, sena ti iahani arna v'ahien p'as. Sena ti si udlani navani arna v'ahien p'as iv'i si stu.