Rum 12 - V'nen P'as iv'i Turanien Trtarep' m'a Turanien M'dah

P'vtu p'akd an Atua

¹ Sena si lera, tv'alk, nmimani ihua a kam'i, sena ti Atua irn istu a kam'i, a ti kam'i pavtu p'akm'i la isilv' ha, asn Atua, kavv'i m'ertu p'asan la Atua iparn ip'as a kam'i ha. Ki lera iv'i m'akarienduan Atua, la pavpatei aranan ha.

² Mavnep'a m'ertu na nadep' ka, v'eti pavuraur udlani, sena ti v'ahienam'i im'dah, a ti pavrndu sei Atua irni, iv'i si p'as, kav'i sei Atua irn ip'as ani, kaviviln udlani.

Nut hua Atua ituvn a m'ertuan a ti apavan parian

³ Sena ti kana nvr a kam'i udlani arna vtmienan Atua la itu kana ha, a ti mavv'ah ti kvlil kavsiv' nut iviviln a kam'i inap'ei. V'eti pavv'ahur kam'i arna navanel viviln, inep'a nut Atua itu v'ahien p'as a kam'i udlani p'sev' inap'ei.

⁴ Sena ti p'akd iamk uaki, v'eti nin istudau. Nin udlani lera, pariar iururaur.

⁵ Nakd nvnap'i lera. Nvstudau, v'eti nvp'lt m'ei a Kristu arna p'akn iamk, kavp'lt m'er tv'ald inep'a nut nid udlani avp'lt arna p'akd inap'ei.

⁶ Atua ituvn a si ururaur ip'sev' a nakd udlani arna vtmienan. Sena si lera, ipavr ti itu nut hua a m'ertu kinkin a ti ipavrp'ep'a v'nenan, ipavrp'ep'ei pr ipaviviln a nut Atua ittuvn sarei a v'ahien p'as ani inap'ei.

⁷ V'aha ipavr ti itu nut hua a m'ertu kinkin a ti ipasr lm'a tv'aln, ipasr lm'a tv'aln pr, v'aha ipavr ti iv'i ti ipav'iv'en sei anr, ipav'iv'ani pr.

⁸ V'aha ipavr ti Atua itu nut hua a m'ertu kinkin a ti ipav'ana m'a tv'aln kani ti ipap'tir arna v'ahienan, ipani pr. V'aha ipavr ti iv'i ti ipatuvn a sei a tv'aln, ipatau ani arna vtmien. V'aha ipavr ti iv'i ti ipap'aur sas, ipam'akar ani ipahua pr. V'aha ipavr ti iv'i ti ipamhmah a tv'aln, ipani karn ip'as ani pr.

P'kl Kristindau

⁹ Mavlap'as a tv'elm'i kavhap'il ani uaki. Pavlep'la si stu kavuada si p'as.

¹⁰ Pavlap'sp'as a kam'i inep'a ti kvv'i tiamk aranan a Kristu, kavani ti nahar tv'elm'i ipav'a eia kasiv' nkam'i.

¹¹ Np'm'i imastu arna pariam'i. Pavrn nam'er arna nlm'i a ti pavm'akaran a Mlin Lilad.

¹² Kam'i pavrn ip'as sena ti kvtrah turanienan Atua. Nlm'i ipap'arei naran der ipaier kam'i, pavuada p'kl ti pavtu tamat ipel.

¹³ Pavvsvsen sei anr m'ertuan Atua ahaviak a sei, kavlev' tv'elm'i apavrama al nmaham'i.

¹⁴ Pavmiman an Atua a ti ipamhmah anr m'ertu avtp'ev' kam'i. Aau, pavmimani a ti ipamhmah anr, v'eti mavmimani a ti iputakm anr.

¹⁵ Pavrn ip'as m'er m'ertu avrn ip'as, kavtakal m'er m'ertu avtakal.

¹⁶ Kam'i pavamk arna v'ahienam'i m'er tv'elm'i. Mavukl kam'i sena ti kvrndu sei, v'eti pavp'lt mamh arna pariar m'ertu ahavlil. Mavv'ah ti kvrndu sei istudau.

¹⁷ Ipavr ti m'ertu kinkin iutakm a kam'i, mavtum'alet a si stu ani ml, v'eti pavv'ahur ti pavsapa navanel iviviln arna nah nelnal.

¹⁸ Ipavr ti navanel iak, pavandinei a ti pavlak arna tamat m'er m'ertu udlani.

¹⁹ Tv'alk nlap'as a kam'i istudau, ipavr ti m'ertu kinkin iputakm a kam'i, mavtum'alet a si stu ml ani, v'eti pavlni a ti Atua ipatum'alet ani ml, sena ti Paivul ivr ti a, “Iv'i pariak uaki a ti p'etu m'lna si stu,” a Mlin Eia ivri.

²⁰ Sena si lera, “Ipavr ti m'ertu ilep'lah irn nam'er, pamsnani. Ipavr ti irn navan, patu nauei ani. Sena ti ipavr ti pan si lera, inep'a ti kutakm ani katu var nap' iv'en arna ptn.”

²¹ Mavm'ahu a ti si stu ipasiv' kam'i, v'eti pavsiv' si stu arna si p'as.