Rum 10 - V'nen P'as iv'i Turanien Trtarep' m'a Turanien M'dah

Arm'ertu a Isrel avrn ti apavviviln arna nahn Atua arna pari p'asar uaki

¹ Tv'alk, kana nrn nam'er ani ihuadau arna nlk, katu tamat asn Atua sena m'ertu a Isrel a ti ipalev'lar.

² Ntla sera ti avrn ti apavan parian Atua istudau, v'eti ahavrndu navanel nen.

³ Sena ti ahavrndu navanel na ti Atua iani ti nvviviln arna nahn, v'eti avsapa v'ahienar uaki a ti apavpasla navanel nen, ahavlak a nv' p'kl Atua itaui a ti p'vviviln arna nahn.

⁴ V'eti v'nen hua ihiris aranan a Kristu, a ti m'ertu udlani apavv'ahi apavviviln arna nahn Atua.

⁵ Sena ti a Musis iv'iv'en nut m'ertu ipaviviln arna nahn Atua arna navanel na v'nen hua inap'ei kavr ti a, “M'ertu ien sei v'nen hua ivri, ipasilv' aranan.”

⁶ V'eti Paivul ivrur nut m'ertu ipaviviln arna nahn Atua arna v'ahien p'as inap'ei kavr ti a, “Mavri arna nlm kavr ti a, ‘?Hin ak ipav'a a nut eia?’ ” Inep'a ti ivr ti ipalev' a Kristu ipama a nadep'.

⁷ V'aha, “ ‘Hin ak ipav'a arna m'lna m'ertu im'a?’ ” Inep'a ti ivr ti ipalev' a Kristu ml arna m'lna m'ertu im'a.

⁸ ?V'eti ivr v'ata? Ivr ti a, “V'nenan Atua imima asnm. Aau, iter arna pnm m'a nlm.” Iv'i v'nen na v'ahien p'as la nvvrp'ep'ei ha, ivr ti a,

⁹ “Ipavr ti pavrp'ep'ei arna pnm a ti a Iesu iv'i Mlin, kav'ahi arna nlm a ti Atua iani ti ithal ml arna m'ienen, Atua ipalev'lah.”

¹⁰ Sena ti m'ertu iv'ahi arna nln kaviviln arna nahn Atua, kavrp'ep'ei arna pnn, a ti Atua ipalev'lei.

¹¹ Sena ti Paivul ivr ti a, “M'ertu udlani avv'ahi akavmamih ani.”

¹² Sena ti m'ertu a Isrel m'er m'ertu a Kris avnap'amk uaki. Sena ti a Mlin Lilar iamk uaki katuvn sei istudau anr m'ertu udlani avv'ara ani.

¹³ “Sena ti a Mlin Lilad ipalev'la m'ertu udlani avv'ara a nahan.”

M'ertu a Isrel ahavv'ah v'nen p'as

¹⁴ ?V'eti apavv'ara a M'ertu ahavv'ahi ipanap'i, kavv'ah M'ertu ahavrn nahan ipanap'i, kavrn v'nen p'as ipanap'i, ipavr ti m'ertu ahavvrp'ep'ei anr?

¹⁵ ?V'eti hir apavvrp'ep'a v'nen p'as ipanap'i, ipavr ti ahatap'er? Inep'a nut Paivul ivri inap'ei kavr ti a, “M'ertu la avvrp'ep'a v'nen na tamat m'a v'nen p'as ha, m'ertu avrn ip'as anr. U tlr ip'as istudau.”

¹⁶ V'eti iav'i hir udlani a Isrel avsapa v'nen p'as, sena ti Aisaia ivr ti a, “?U Mlin Eia, hin ak iv'ah v'nenam'em'?”

¹⁷ Sena si lera, v'ahien p'as ima naran m'ertu avrn v'nen p'as, m'a v'nen p'as ima naran avrp'ep'a v'nen p'asan Atua.

¹⁸ V'eti hilaha nrn p'emimani, ?Ahavrn v'nen p'as? Aau, avrni. Inep'a nut Paivul ivri inap'ei kavr ti a, “Avrn drlr arna nadep' udlani. V'nenar ier nut udlani.”

¹⁹ V'eti nmimani ml, ?M'ertu a Isrel ahavrndaui? Itauamu, a Musis ivr ti a, “Kana p'ani ti nlm'i ipapr m'ertu ahavv'i v'anu dau, kani ti nlm'i iparer a v'anu iamk ahavrndu sei.”

²⁰ V'eti Aisaia ivri ihuadau mau kavr ti a, “M'ertu ahavtala a Kana avpasla Kana. Nv'iv'en Kana anr m'ertu ahavmiman Kana naran kinkin.”

²¹ V'eti naran ivrur a Isrel ivr ti a, “Kana nlmlm lm'ak m'etav'aran ier lihat asnr m'ertu avluvn a v'nenak kavsip'len Kana.”