Nehum 2 - V'nen P'as iv'i Turanien Trtarep' m'a Turanien M'dah

A Mlin Eia iparp v'anu lil a Nineva

¹ Hin la irpep'nr m'ertu ha itp'tir sarei arna nahm. !Pap'aur mamh nmah hua lil! !P'ap'tir kap'a navanel! !Pani ti v'atm ipahua! Aau, pani ti nut huam ipama eia ipastudau.

² Sena ti a Mlin Eia ipani ti nut huan a Sikup ipam'alet ml, ipanep'a sera nut huan a Isrel, sena ti arm'ertu avlev'la sei nakl atvlev'la si udlani atlera, katvutakm sarei anr nahau na krepar.

³ Silar ardu huar atvm'iel sarei. Ardu ahavdedrn a sei nakl atvram'a sarei katvm'iel. Kat na naur atvrama sarei, nap' iv'en aranar--arna napn na ti itendedp' sera sei, aau, arna naran na ti atuada sera namas eia.

⁴ Kat na naur avkakar arna navanel, avrprp hir arna navanel lilil. Avnep'a sera nap', avvrvr kavnep'a sera naran nav'l ilev' m'aten.

⁵ Iavnapn anr m'ertu lilil na nut lera, avv'el sarei kavtitihap'el. Avrakn a ti apaviarr naml hua lil na v'anu lil, kavandedp' sei sena naur.

⁶ Atiela sarar pn liu na naui lilil, laha nmah p'asan a mlin ipars a nadep' kardapri udlani.

⁷ Attu sera v'nen hua: apalev'lar m'ertu a Nineva, aau, apav'av'ar apavp'resin arna v'anu uraur. Apani ti apavv'el kavrav'a eia. Laha, vitar na m'akarienar apavtauamu, kavvalau kavnep'a sarar navimar, apavrprp mrr.

⁸ Itauamu, a Nineva inep'a sera naui lil iamk, v'eti hilaha, avruh arna nut lera. Avv'ara eia, kavvr ti a, “!Pavp'tir uaki, pavp'tir uaki!” v'eti m'ertu kinkin iavav hin kam'alet.

⁹ !Pavlev' silva sanam'i! !Pavlev' kul sanam'i! Nav'et istudau iter uam, akaspani. Aau, si p'sp'as udlani, la av'ah ti apalav'i ha, iter uam.

¹⁰ M'ertu kinkin ialak ml arna v'anu lil, atutakm sarei ani, aau, itstu sarei. Laha, nlr m'ertu itars sarei, plk tlr m'ertu atvdudul sarei. M'ertu arna tv'eliel udlani atvrn istu istudau, laha, nahr atvrars sarei, inep'a ti atvram'a sarei.

¹¹ ?Utar laiun hin ip'i? ?Nut arnet laiun avhatat hin ip'i--la iv'i nut laiun, m'a prapar na laiun, m'er net laiun, avv'el aranan ha, si kinkin iahani ti avdedrn?

¹² Itauamu, laiun iapr p'ak sei, laha, tim'ah iak sanar a natn. Ihap'n sei sanar prapar na laiun, kani ti navap ilak a nln ilini a tim'ah, nav'et ilak a nln ilini a m'it.

¹³ A Mlin na m'rnur iv'ana, kavr ti a, “Palei, Kana nlmanh. P'etu nap' anr kat na nauram, ienap' ipastudau aranar. Tali han ipatrpep'nr net laiun. P'etrpep'nr si dm, la ktkr ani nakl ha, sarei akarn drlr m'ertu avv'i v'nenam naran kinkin.”