Matiu 8 - V'nen P'as iv'i Turanien Trtarep' m'a Turanien M'dah

A Iesu ien mamh m'ertu iamk lep'ersi iuei

¹ Naran isiris dan arna ptha, m'ertu avstudau avsapei.

² Laha, pavrni, m'ertu iamk lep'ersi iuei, ima kasisihpu asnn kavr ti a, “Mlin, ipavr ti krni, Nakm krndu ti pani kana p'ep'as ml.”

³ Laha, a Iesu ilmlm lm'an kaiari kavr ti a, “Nrni, pap'as arna p'akm.” Laha, ilahml sarei lep'ersi ihiris aranan.

⁴ Sarei, a Iesu ivr ani, kavr ti a, “Mavrp'ep'a si lera anr m'ertu kinkin, v'eti pav'el kadav'a kav'iv'en p'akm a pris, katu sei v'nen huan a Musis ivri ani, a ti ipavrp'ep'a sei anr.”

A Iesu ien mamh m'ertu na pariana mlin na m'rnur a Rum

⁵ Naran a Iesu itama sarei a Kapaniam, mlin a Rum iamk, m'rnuran inelnal iv'amk, ima asn a Iesu kamiman ani ihua kavr ti a,

⁶ “Mlin, dui na m'akarienak im'atr al nmahak, pna p'akn im'a, irn istu istudau.”

⁷ Laha, a Iesu ivr ani, kavr ti a, “Kana p'ev'alet kamhmah ani.”

⁸ Mlin lahara ivrprani, kavr ti a, “Nrn ti naviviln a ti pama al nmahak, v'eti ipavr ti Nakm pavr v'nen uaki, dui na m'akarienak ipama kap'as ml.

⁹ Kana nv'i dui nlak a nv' nut hua mlin uraur, m'rnur kinkin avlak a nv' nut huak. Ipavr ti p'evr a dui ipamk kavr ti a, ‘Pav'el’, v'eti hin ikv'el pr. V'aha ipavr ti p'evr a dui uraur kavr ti a, ‘Pama’, hin ikama pr. Ipavr ti p'evr a dui na m'akarienak kavr ti a, ‘Pan si lera,’ v'eti ikani pr.”

¹⁰ Naran a Iesu irn v'nen lera, itah ani, kavr anr nelnal avsapei kavr ti a, “Nvrdaui, nvr a kam'i, Kana napasla m'ertu iamk v'ahienan ilil inap'ei aulera, nala nki iamk asnr m'ertu a Isrel.

¹¹ V'eti Kana nvr a kam'i a ti m'ertu apavstudau apavrama dan arna Is m'a Ues, kavlak asn tim'ah m'er a Epraham, Aisak m'ei a Sikup arna v'anu eia.

¹² V'eti net v'anu apasranr av'aran al m'alk. Arna nut lera, apavtakal kavhaha lur.”

¹³ Laha, a Iesu ivr a mlin lahara, kavr ti a, “Pahau, si udlani ipatu hin asnm ipanep'a nut kv'ahi inap'ei.” Laha, arna naran nen, m'ertu na m'akarienan ima kap'as ml.

A Iesu ien mamh a rinan a P'ita m'er m'ertu uraur istudau

¹⁴ Dav'a, naran a Iesu ima al nmahan a P'ita, ila ti a rinan a P'ita im'at kam'atr.

¹⁵ A Iesu ier lm'an, laha, m'etien nen ilni, sarei, ithal kap'aurr.

¹⁶ Knarev' auirma m'ertu avstudau m'im'iln stu ilak a nlr, asnn. Laha, isran m'im'iln stu arna v'nenan uaki, kamhmah anr m'ertu udlani avm'at.

¹⁷ Arna ti v'nenan Aisaia, iv'i pruvet, ipama katu hin, ivr ti a, “Hin uaki iua si udlani irp nakd, kaua m'etienad.”

Apasapei a Iesu iv'i si hua

¹⁸ Naran a Iesu ila ti nelnal avstudau avspatkari, itu v'nen a ti apavln nut lera, kavrav'a a tv'eliel na naui lil.

¹⁹ Laha, tisa na v'nen hua iamk ima asnn, kavr ani, kavr ti a. “Tisa, kana p'esapah arna nut udlani pav'a.”

²⁰ V'eti a Iesu ivr ani, kavr ti a, “Lip'ah didi pavr iak, m'anh na p'knaran ninhr iak, v'eti Kana, nv'i Net M'ertu, m'lnak ihei a ti p'em'atr.”

²¹ Laha, dui uraur, iv'i m'ertuan iamk, ivr ani, kavr ti a, “Mlin, pam'ahu a ti p'ahau katin sera lei a tetiak.”

²² V'eti a Iesu ivr ani, kavr ti a, “Pasapa Kana, kaln m'ertu avram'a a ti apavtin m'ertuar avram'a.”

Nalen m'a nauei aran sei a Iesu ivri

²³ Sarei, iv'a al nauak, m'ertuan avsapei.

²⁴ Laha, pavrni, nalen lil irpdinei al naui lil, dav'a ti nahu na naui lil ilinkar nauak, v'eti a Iesu im'etrdul.

²⁵ Laha, arm'ertuan avrama asnn kavsp'ei kavvr ti a, “Mlin, palev'la kam'em', p'vram'a ra.”

²⁶ Ivr anr kavr ti a, “?Inap'i hin kvdedrn? U, v'ahienam'i isusupadau.” Sarei, ithal kav'ana hua m'a nalen m'a naui lil, sarei, nut itamat istudau.

²⁷ Laha, m'ertu lera avtah ani kavvr ti a, “?Aulera iv'i dui v'ata? Hin nalen m'a nauei aran sei ivri.”

A Iesu isran m'im'iln stu asnr dui iru

²⁸ Dav'a, naran a Iesu ier tv'eliel, iv'i v'anuar m'ertu a Katara, dui arru m'im'iln stu ilak a nlr, arandan al navap atintin m'ertu a nln, karma asnn. Ardidi istudau, m'ertu ahavrav'a atlera sanar.

²⁹ Laha, pavrni, arv'ara eia karvr ti a, “?Nakm, Iesu, kv'i a Natn Atua, kma a ti pan v'ata a kam'em'? ?Kma atlaha a ti panp'ilen kam'em' naran idav'i naran nen?”

³⁰ Iav'iv'a par asnr pua istudau avhatat.

³¹ Sena si lera, m'im'iln stu avmiman ani ihua, kavvr ti a, “Ipavr ti pasran kam'em', pam'ahu a ti p'vrav'a a nlr pua lera.”

³² Laha, ivr anr kavr ti a, “Pavrav'a.” Sarei, avrama aut kavrav'a a nl pua. Laha, pavrni, pua udlani avruhdidilin kavsasr dan arna ptha iter a p'ak naui lil, kavram'a al nauei.

³³ Laha, ardu avp'aur pua avruh kavrav'a arna v'anu lilar kavvrp'ep'a si udlani, kavvrur sei itu hin asnr m'ertu m'im'iln stu ilak a nlr.

³⁴ Laha, pavrni, m'ertu udlani arna v'anu lil lera avrama kavlei a Iesu, kavmiman ani ihua a ti iparuh a utar.