Matiu 7 - V'nen P'as iv'i Turanien Trtarep' m'a Turanien M'dah

Mavv'ana hua m'a m'ertu

¹ Mavv'ana hua m'a m'ertu, imahei ti Atua ipav'ana hua m'a kam'i.

² Sena ti Atua ipav'ana hua m'a kam'i ipanap'amk m'a nut kam'i kvv'ana hua m'a m'ertu uraur inap'ei, katina kam'i arna tintin kvtinei a m'ertu uraur.

³ ?Inap'i hin kp'a niv'es nai iter al m'eta tv'alm, v'eti kaarndu ti nai lil iter al m'atam?

⁴ ?Inap'i hin krndu ti pavr a tv'alm kavr ti a, ‘Pam'ahu a ti p'elev'la niv'es nai iter al m'atam,’ v'eti palei, nai lil iter al m'atam uam?

⁵ Nakm kp'ip'en lamuru, palev'la nai lil iter al m'atam ipatauamu, sarei, parndu ti pala mamh niv'es nai iter al m'eta tv'alm, kalev'lei.

⁶ Mavtu sian Atua anr lip'ah, v'aha mavsran neiau p'as tva, asnr pua. Imahei apavpasi kavvav hir kavtr kam'i.

Sei pavmimani, Atua ipatu kam'i

⁷ Sei pavmimani, Atua ipatu kam'i. Sei pavtala ani, pavpaslei. Pavspspa liu, laha, Atua ipaielei.

⁸ Sena ti m'ertu udlani imiman sei, ipalav'i, m'ertu itala a sei, ipapaslei, m'ertu ispspa liu, Atua ipaielei asnn.

⁹ ?Hin ak asnm'i, ipavr ti a natn ipamiman p'ret ani, ipatu nav'et ani uaki?

¹⁰ ?V'aha, ipavr ti a natn ipamiman tilau ani, ipatu nmat ani?

¹¹ Sena si lera, ipavr ti kam'i, la kvv'i m'ertu stu ha, kvrndu ti pavtu si p'as anr a netm'i, a Tetiam'i ilak eia, irndu ti ipatu si p'sp'as mau anr m'ertu avmiman sei ani.

¹² Sena si lera, si udlani kvrn ti m'ertu uraur apavan a kam'i, kam'i pavan anr ipanap'i lera, sena ti ki lera iv'i pla v'nen hua m'a v'nenar pruvet.

Pavandan arna pn liu pa

¹³ Pavandan arna pn liu pa, sena ti pn liu ilil m'a navanel ilil ipav'a a nut m'ertu apavmln. M'ertu istudau avandan atlera.

¹⁴ V'eti pn liu isusupa m'a navanel isusupa ipav'a a nut silv'ien iter, m'ertu idakr uaki avpaslei.

Pavrndu m'ertu arna nava pariar

¹⁵ Pavv'ahur dui avhap'il kavvr ti avv'i pruvet. Hir avrama asnm'i inep'a ti avua heia sivsiv, v'eti arna nlr avv'i lip'ah didi avrn nam'er.

¹⁶ Pavrndaur arna nava pariar. M'ertu ikasva krep arna lu makau, v'aha ikasva p'alak arna hrhrid.

¹⁷ Inap'i lera, arna nai p'as, navan ipap'as, v'eti arna nai stu navan ipastu.

¹⁸ Nai p'as, navan ikastu, v'aha nai stu, navan ikap'as.

¹⁹ Nai udlani la navan p'as ihei ha, apatrusus udlani kasranr al nep'v'en.

²⁰ Sena si lera, pavrndaur arna nava pariar.

Narndu kam'i naran kinkin

²¹ Ikav'i m'ertu udlani avvr a Kana kavvr ti a, ‘Mlin, Mlin,’ apavrav'a arna v'anu eia, v'eti hir uaki la avan sei a Tetiak ilak eia irni ha.

²² M'ertu apavstudau apavvr a Kana arna napn lera kavvr ti a, ‘Mlin, Mlin, kam'em' ntvvrp'ep'a sera v'nen p'as arna naham, katvsran sera m'im'iln stu arna naham, katvan sera pari p'as istudau arna naham.’

²³ V'eti arna naran lera p'evrp'ep'ei anr kavr ti a, ‘Kana narndu kam'i naran kinkin. Kam'i kvan si stu nakl, pavruh asnk.’

Pahl nmaham arna nav'et

²⁴ Sena si lera, m'ertu irn v'nenak laha kan sei nvri, Kana p'evr ti hin inep'a dui ptn iak, la ihl nmahan arna nav'et ha.

²⁵ Dav'a nu iu, uiniv' iv'el, nalen itvtv karp nmah lera istudau, v'eti iahrs, sena ti ahli arna nav'et.

²⁶ V'eti m'ertu udlani avrn v'nenak laha, v'eti ahavani, hir avnep'a dui ptn ihei, la ihl nmahan arna nun ha.

²⁷ Dav'a nu iu, uiniv' iv'el, nalen itvtv karp nmah lera istudau, laha irs, kamrmaur udlani.”

²⁸ Laha, naran v'nenan a Iesu ihiris, m'ertu avtah ani istudau.

²⁹ Sena ti iv'iv'en sei anr inep'a m'ertu nut huan iak, iav'iv'en anr inap'ar artisa na v'nen hua.