Matiu 6 - V'nen P'as iv'i Turanien Trtarep' m'a Turanien M'dah

Pari p'as

¹ Pavv'ahur kam'i a ti mavtuvn a sei anr m'ertu siar ihei arna nah nelnal kavrn ti apavp'a kam'i, imahei ti a Tetiam'i ilak eia ikaul kam'i sanan.

² Sena si lera, naran patuvn a sei anr m'ertu siar ihei, maiv natav sanan kanep'a m'ertu avp'ip'en lamuru al nmah tamat, v'aha arna navanel, kavrn ti m'ertu apavani nahar ipav'a eia. Nvrdaui, nvr a kam'i, hir atvlev' sera ulienar.

³ V'eti naran nakm patuvn a sei anr m'ertu siar ihei, m'ir na lm'am imarndu sei m'ldu lm'am iani,

⁴ Arna ti patutuan pari p'asam. Laha, a Tetiam la ila si udlani itutuah ha, hin ipulh sanan arna nah nelnal.

Tamatan a Iesu

⁵ Naran nakm patu tamat, manep'a m'ertu avp'ip'en lamuru, sena ti hir avrn ip'as naran avp'tir kavtu tamat al nmah tamat v'aha arna nut navanel iru ip'lt, a ti m'ertu apavp'ar. Nvrdaui, nvr a kam'i, hir atvlev' sera ulienar ra.

⁶ V'eti nakm, naran patu tamat, pav'a a m'lnam kap'leskar liu, katu tamat asn a Tetiam, la ilak a nut tutuah ha, laha, a Tetiam la ila si udlani itutuah ha, ipulh sanan arna nah nelnal.

⁷ V'eti kam'i, naran pavtu tamat, mavspsapa m'lv'i v'nenam'i ipanep'a nut v'anudl avani inap'ei, sena ti hir avv'ah ti atuar iparn v'nenar sena ti avv'ana istudau.

⁸ Kam'i mavnap'ar, sena ti a Tetiam'i itrndu sera si udlani ihei asnm'i, naran kdavmiman ani.

⁹ Sena si lera, kam'i pavtu tamat ipanap'i laha, kavvr ti a, Tetiam'em' klak eia, nvrn ti naham ipav'a eia.

¹⁰ Nvrn ti v'anuam ipama. Nvrn ti sei krni ipaiak arna nadep' kanap'ei eia.

¹¹ Patu kam'em' dika tim'ah ipaviviln a kam'em'.

¹² Kamhmah a kam'em' arna si stuam'em' inep'a ti nvmhmah a m'ertu uraur arna si stu avan a kam'em'.

¹³ Mam'ahu a ti si kinkin ipandina kam'em', v'eti palev'la kam'em' arna nut huan a Sitan. Sena ti v'anu p'as iv'i nkam, nut hua iv'i nkam, si p'sp'as iv'i nkam, ikahiris naran.

¹⁴ Sena ti ipavr ti kvmhmah a m'ertu arna si stu avan a kam'i, a Tetiam'i ilak eia ipamhmah a kam'i arna si stuam'i.

¹⁵ V'eti ipavr ti kaavmhmah a m'ertu arna si stu avan a kam'i, a Tetiam'i ikamhmah a kam'i arna si stuam'i.

Naran pavln tim'ah

¹⁶ Naran kam'i pavln tim'ah a ti pavtu tamat, mavnep'a m'ertu avp'ip'en lamuru kavm'er nahr sena ti m'ertu apavla ti avln tim'ah. Nvrdaui, nvr a kam'i, hir atvlev' sera ulienar ra.

¹⁷ V'eti nakm, naran paln tim'ah a ti patu tamat, patu pumat arna nilm, kasila nahm.

¹⁸ A ti m'ertu akavrndu ti kln tim'ah a ti patu tamat, v'eti a Tetiam la ilak arna nut tutuah ha, hin uaki iparndaui. Laha, a Tetiam la ila si udlani itutuah ha, ipulh sanan.

Pavtupien si p'sp'asam'i arna nut eia

¹⁹ Mavtupien si p'sp'asam'i arna nadep' ka, sena ti arna nut laha kakrus ihapapr sei nakl, v'aha nadei iua aian, v'aha m'ertu na v'nv'nahien avkapr nmah kavv'nah sei.

²⁰ V'eti kam'i pavtup'lten si p'sp'asam'i arna nut eia. Arna nut lera kakrus ikahapapr sei nakl, v'aha nadei ikaua aian, v'aha m'ertu na v'nv'nahien akavkapr nmah kavv'nah sei.

²¹ Sena ti nut si p'sp'asam'i iter, iv'i nut v'ahienam'i ipater nakl.

²² M'eta natei iv'i lait na p'ak natei. Sena si lera, ipavr ti m'atam ilvlvar, p'akm ipalini a nut ren.

²³ V'eti ipavr ti m'atam ipastu, p'akm udlani ipalini a m'alk. Ipavr ti pla nut ren iter a nlm iv'i m'alk uaki, m'alk lera im't ihuadau.

²⁴ M'ertu kinkin ikav'i m'ertu na m'akarienar mlin iru, sena ti ipalep'la tv'aln, kalap'as a tv'aln, v'aha ipasapa tv'aln, v'eti ikav'ah tv'aln. Mkav'i m'ertu na m'akarienan Atua kav'i m'ertu na m'akariena nav'et.

Mavv'ahur parndau a sei

²⁵ Sena si lera, nvr a kam'i, mavv'ahur par a silv'ienam'i kavvr ti a, ‘?P'vhan v'ata?’ v'aha ‘?P'vm'n v'ata?’ Mavv'ahur par a p'akm'i ml kavvr ti a, ‘?P'vua v'ata ipav'i klusad?’ Sena ti silv'iena natei ilil mau kasiv' tim'ah, p'ak natei ilil mau kasiv' heia natei.

²⁶ Pavp'a m'anh avtetv eia arna p'knaran. Hir ahavlu sei, ahavlev' sei al pitvet, ahavtupiani al nmah nen, v'eti a Tetiam'i ilak eia imsnanr nakl, v'eti kam'i kvlil mau istudau kavsiv'r.

²⁷ ?Hin ak asnm'i irndu ti ipav'ahuri kani ti silv'ienan ipap'arei mau napn ipamk?

²⁸ ?Kam'i kvv'ahur klusam'i sena v'ata? Pavv'ahur plaua iter al lili. ?Isi inap'i? Hir ahavm'akar ki, ahavlili klusar.

²⁹ V'eti Kana nvr a kam'i, hin a Sulumun arna si p'sp'asan udlani, iaua klus kinkin ip'as inep'a plaua lera.

³⁰ Sena si lera, ?Ipavr ti Atua itu heia nina iter al lili ip'as inap'i lera, la iter dika v'eti apasrani al nep'v'en m'ih ha, kvv'ah ti ikatu klus a kam'i? U, kam'i v'ahienam'i isusupadau.

³¹ Sena si lera, mavv'ahur par ani, kavvr ti a, ‘?P'vhan v'ata, v'aha p'vm'n v'ata, v'aha p'vua klus v'ata?’

³² Sena ti v'anudl avtala a si udlani lera nakl, v'eti a Tetiam'i ilak eia irndu ti kvrn si udlani lera.

³³ V'eti kam'i pavtala a v'anuan Atua m'a p'kl p'asan ipatauamu, laha, Atua ipatu si udlani lera a kam'i ml.

³⁴ Sena si lera, mavv'ahur par a m'ih, sena ti m'ih iv'i naran na ti pavv'ahur sei ipatu hin aranan. Der ier kam'i arna napn iamk iviviln a napn lera uaki.