Matiu 5 - V'nen P'as iv'i Turanien Trtarep' m'a Turanien M'dah

A Iesu ivrp'ep'a v'nen p'as arna ptha

¹ Naran a Iesu ila nelnal avstudau, iv'a eia arna ptha iamk kalak, laha m'ertuan avrama asnn.

M'ertu la apavrn ipap'as ha

² Sarei, iv'iv'endina sei anr kavr ti a,

³ “M'ertu v'ahienar iter a nadep', apavrn ipap'as, sena ti v'anu eia iv'i nkar.

⁴ M'ertu avtakal, apavrn ipap'as, sena ti Atua ipamhmah anr.

⁵ M'ertu avv'len, apavrn ipap'as, sena ti apavlev' nadep' iv'i nkan a Tetiar.

⁶ M'ertu avrn nam'er kavrn navar sena p'kl viviln, apavrn ipap'as, sena ti apavrapd.

⁷ M'ertu avrn istu a m'ertu uraur apavrn ipap'as, sena ti Atua iparn istu anr.

⁸ M'ertu v'ahienar inep'a nauei ilvlvar, apavrn ipap'as, sena ti apavlei Atua.

⁹ M'ertu avan tamat nakl, apavrn ipap'as sena ti apavr ti avv'i a natn Atua.

¹⁰ M'ertu atp'av'r sena p'kl p'as, apavrn ipap'as, sena ti v'anu eia iv'i nkar.

¹¹ Kam'i pavrn ipap'as naran m'ertu apavsip'len kam'i, kavtp'ev' kam'i, kavvr v'nen stu kavhap'il kavmlen kam'i sena Kana.

¹² Kam'i pavrn ipap'as ipastudau, sena ti ulienam'i ilil iter arna nut eia, sena ti atp'ev' sera pruvet, la avtauamu a kam'i ha, inap'i lera.

Arm'ertu avv'ah a Iesu avv'i sul m'a nut ren

¹³ Kam'i kvv'i sul na nadep'. ?V'eti ipavr ti sul ialalm ml, apani ipalalm ml ipanap'i? Iap'as a si kinkin ml, v'eti m'ertu apavsrani kavpasi uaki.

¹⁴ Kam'i kvv'i nut ren arna nadep'. Akatutuan v'anu lil ip'tir arna ptha.

¹⁵ M'ertu ikatu nap' a lait kinkin kataui a nv' paket, v'eti ipataui eia arna m'lnen a ti iparnren m'ertu udlani avlak al nmah.

¹⁶ Kam'i pavnap'i lera, kavm'ahu a ti laitam'i iparnren nelnal a ti apavla pari p'asam'i kavpatei a Tetiam'i ilak eia.

V'nen huan a Musis

¹⁷ Mavv'ah ti nma a ti p'esran v'nen huan a Musis v'aha v'nenar pruvet. Nahma a ti p'esrani, v'eti nma a ti ipama katu hin.

¹⁸ Nvrdaui, nvr a kam'i, nut eia m'a nadep' ipahiris, v'eti si pa kinkin ikahmk aulul ani arna v'nen hua ikmln, ipaier naran v'nen hua udlani ipama katu hin.

¹⁹ Sena si lera, m'ertu ipakapr v'nen hua lera ipamk, la isusupa mau isiv' v'nen hua udlani ha, kav'iv'en navanel lera anr m'ertu uraur, apavr ti hin isusupa mau kasiv' m'ertu udlani arna v'anu eia. V'eti m'ertu ipasapa mamahi kav'iv'ani anr m'ertu uraur, apavr ti hin ilil arna v'anu eia.

²⁰ Sena ti Kana nvr a kam'i a ti ipavr ti p'klm'i ikap'as kasiv' p'klr artisa na v'nen hua m'er Varisi, mkavrav'a arna v'anu eia naran kinkin.

P'kl m'ertu nln irer

²¹ Kam'i ktvrn sarei a ti avr anr a tetiad tituei kavr ti a, ‘Marpep'n m'ertu’, kavr ti a, ‘M'ertu iparpep'n m'ertu, iviviln a ti apav'ana m'ei arna kut sanan.’

²² V'eti Kana nvr a kam'i, m'ertu udlani nlr irer a tv'aln sena si kaka uaki, iviviln a ti apav'ana hua m'ei arna kut sanan, v'eti m'ertu ipavr a tv'aln kavr ti a, ‘Ptm ihei’, iviviln a ti apav'ana hua m'ei arna kut lil na Kaunsel sanan. V'eti m'ertu ipavr a tv'aln kavr ti a, ‘Nakm kdilin,’ iviviln a ti apasrani al nep'v'en.

²³ Sena si lera, naran kuirv'a sei asn nev'etet al si slm aranan, laha kav'ahur ti tv'alm nln idarer anh uam sena si kinkin,

²⁴ Paln sei krn ti patau an a Mlin Eia asn nev'etet al si slm aranan, kadav'a asn tv'alm ipatauamu kan tamat m'ei, sarei kadama katu sei an a Mlin Eia.

²⁵ Pan tamat m'a m'ertu imlanh ipalahml naran kdrv'el m'ei uam arna navanel. Imahei ti m'ertu imlanh ipatauh arna kut, sarei dui iv'ana hua m'a m'ertu nakl ipatauh arna lm'a pulis a ti ipasranh al p'resin.

²⁶ Nvrdaui, nvr anh, mkaln nut lera naran kinkin, ipaier naran patu m'lna si udlani klav'i asnn.

P'kl m'ertu iv'nah tav'et v'aha dui

²⁷ Kam'i ktvrn sera ti avri tituei, kavr ti a, ‘Mav'nah tav'et, tav'et imav'nah dui.’

²⁸ V'eti Kana nvr a kam'i a ti dui kinkin ip'a tav'et iamk karni, inep'a ti itv'nah sarei arna nln.

²⁹ Sena si lera, ipavr ti m'ldu m'atam ipani ti pars arna si stu, palev'lei kasrani. Ip'as mau a ti pna p'akm iamk ipamln, isiv' ti apasran p'akm udlani al nep'v'en.

³⁰ V'aha ipavr ti m'ldu lm'am ipani ti pars arna si stu, patrusi kasrani. Ip'as mau a ti pna p'akm ipamln, isiv' ti apasran p'akm udlani al nep'v'en.

P'kl m'ertu isran tav'et v'aha dui

³¹ Avri ml tituei, kavr ti a, ‘Ipavr ti dui irn ti ipasran tav'etan, ipulul a v'nen ivrur si lera arna ruplet katau ani.’

³² V'eti Kana nvr a kam'i, a ti dui kinkin isran tav'etan la iav'nah dui uraur ha, itp'i a ti ipav'nah dui. Laha, dui iua tav'et a naun itsran sarei, hin iv'nah tav'et nen.

P'kl m'ertu ivr sei kah lm'an

³³ Kam'i ktvrn sarei ml a ti avr anr a tetiad tituei kavr ti a, ‘Makapr turanienam la ktah sera lm'an sanan ha, v'eti pan sei ktturan sarei ani asn a Mlin Eia.’

³⁴ V'eti Kana nvr a kam'i, Maturan a si kinkin kah lm'am sanan. Mavr naha nut eia, sena ti iv'i napl p'asan Atua,

³⁵ V'aha naha nadep', sena ti iv'i napl Atua itu tln aranan, v'aha naha Serusalem, sena ti iv'i v'anu lilan a Mlin Lil.

³⁶ Mavr ti a, ‘Nvrdaui arna ptk’, sena ti nakm mkahani ti nil ptm ipamk ipatva v'aha ipam't.

³⁷ V'eti kam'i pavrdaui kavvr aau v'aha ihei uaki, sena ti v'nen udlani ihua kasiv' ki lera, idan asn a Sitan uaki.

Pavan si p'as a m'ertu

³⁸ Kam'i ktvrn sarei avri tituei kavr ti a, ‘Uliena m'eta natei iamk iv'i m'eta natei uraur,’ v'aha ‘uliena lu natei iamk iv'i lu natei uraur,’

³⁹ V'eti Kana nvr a kam'i, Mavtukar m'ertu stu, v'eti ipavr ti m'ertu kinkin irn ti ipusah arna m'ldu pla nham, pam'ahu a ti ipusah arna tv'eliel ml.

⁴⁰ Ipavr ti m'ertu kinkin irn ti ipatauh arna kut a ti ipalev'la satam asnm, pam'ahu a ti ipalev'la sat na m'lam aranan ml.

⁴¹ Ipavr ti m'ertu kinkin ipatp'h a ti pasapei arna navanel kilumita ipamk, pasapei ipaier kilumita iparu.

⁴² Patu sei a m'ertu ikrei asnm, mavrkar m'ertu kinkin irn ti ipamiman siam kinkin.

Pavlap'as a m'ertu imlen kam'i

⁴³ Kam'i ktvrn sarei avri tituei kavr ti a, ‘Palap'as a tv'alm v'eti palep'la m'ertu imlanh.’

⁴⁴ V'eti Kana nvr a kam'i, Pavlap'as a m'ertu avmlen kam'i, kavmhmah a m'ertu avvr v'nen stu a kam'i, kavan si p'as a m'ertu avlep'la kam'i, kavtu tamat sena m'ertu avhap'il aranam'i kavanp'ilen kam'i,

⁴⁵ A ti kam'i pavv'i a natn a Tetiam'i ilak eia, sena ti hin iani ti neielan itpeia asnr m'ertu stu m'er m'ertu p'as katep'a nu iu aranar m'ertu p'klr ip'as m'er m'ertu p'klr istu.

⁴⁶ Sena ti ipavr ti kam'i kvlap'as a hir uaki avlap'as a kam'i, kvv'ah ti pavlev' ulien v'ata aranan? Ardu stu avlev' takis nakl avani inap'i lera uaki.

⁴⁷ V'aha ipavr ti pavvr ip'as a tv'elm'i uaki, kam'i pavan sei ipasiv' m'ertu uraur ipanap'i? Sena ti ardu stu avlev' takis nakl avani inap'i lera uaki.

⁴⁸ Sena si lera, p'klm'i ikviviln udlani pr, kanap'ei a Tetiam'i la ilak eia kaviviln udlani ha.