Matiu 4 - V'nen P'as iv'i Turanien Trtarep' m'a Turanien M'dah

A Sitan ihlhalei a Iesu

¹ Sarei, M'im'iln P'as iv'av'ei a Iesu iv'a eia arna nut kaka a ti a Sitan ipahlhalei.

² Laha, a Iesu iln tim'ah arna napn inelv'a (40), ren m'a lihat, sarei, karn nam'er.

³ Laha, a Sitan iv'i m'ertu ihlhala m'ertu, ima asnn kavr ti a, “Ipavr ti Nakm kv'i a Natn Atua, pavr a nav'et laha apavrama kavv'i p'ret.”

⁴ V'eti a Iesu ivrprani, kavr ti a, “Paivul ivr ti a, ‘M'ertu ikasilv' a tim'ah uaki, v'eti ipasilv' a v'nen udlani idan al pnn Atua.’ ”

⁵ Sarei, a Sitan ilav'i kauirv'a a Serusalem, iv'i v'anu p'asan Atua, kataui arna drl nmah tamat, kavr ani, kavr ti a,

⁶ “Ipavr ti Nakm kv'i a Natn Atua, pasihavs a nadep', sena ti Paivul ivr ti a, ‘Hin ipatu v'nen anr enselan sanam, laha, apavuadah al lm'ar, imahei ti paspan tlm arna nav'et kinkin.’ ”

⁷ A Iesu ivrprani, kavr ti a, “Paivul ivri ml kavr ti a, ‘Mahlhalei a Mlin Eia iv'i Atuam.’ ”

⁸ Laha, a Sitan ilav'i ml kauirv'a arna ptha lil iamk kav'iv'en v'anu udlani iter arna nadep' m'a si p'sp'as udlani nen ani, kavr ani, kavr ti a,

⁹ “P'etu si udlani lera anh ipavr ti pasisihpu kaiaul asnk kapata kana.”

¹⁰ Laha, a Iesu ivr ani, kavr ti a, “Sitan, paruh, sena ti Paivul ivr ti a, ‘Papatei a Mlin Eia, iv'i Atuam, kan parian uaki.’ ”

¹¹ Sarei, a Sitan ilni, laha, pavrni, ensel avrama kavp'auri.

A Iesu ivrp'ep'adina v'nen p'as arna nut a Kalili

¹² Naran a Iesu irn v'nen a ti attu sarei a Sun al p'resin, iruh kadav'a ml a Kalili.

¹³ Kaln nut a Nasaret kadama kalak a Kapaniam iter a p'ak naui lil, iv'i nadep'ar m'ertu a Sepulun m'ei a Navtali,

¹⁴ A ti sei Aisaia, iv'i pruvet, itvrp'ep'a sarei, ipama katu hin, ivr ti a,

¹⁵ “Nut a Sepulun m'a nut a Navtali, iter arna navanel iv'a asn nata, iter a tv'eliel na naui a Surtan, iv'i Kalili, la iv'i utar v'anudl ha.

¹⁶ Arm'ertu avlak al m'alk avla nut ren lil, hir avlak arna nut iv'i m'lk m'ien, nut ren ier asnr.”

¹⁷ Arna naran lera, a Iesu ivrp'ep'adina v'nen p'as kavr ti a, “Pavvav nlm'i, sena ti v'anu eia itmima.”

A Iesu iv'ara anr m'ertuan iv'a a ti apavsapei

¹⁸ Naran a Iesu iv'el a p'ak naui lil a Kalili ila dui iru arv'i tiamk, tv'aln nahan iv'i a Saimun, avr ti iv'i a P'ita, tv'aln nahan iv'i Adru. Hir arru arsran nit al naui lil, sena ti arv'i dui arrv' tilau nakl.

¹⁹ Laha, ivr anr kavr ti a, “Parsapa Kana, laha p'ani ti parrv' m'ertu.”

²⁰ Iv'amk m'a ti arln nitar karsapei.

²¹ Sarei, iv'el isusupa ml kala tiamk arru uraur, tv'aln iv'i a Sim'is, iv'i a natn a Sep'eti, tv'aln iv'i a Sun. Arru arlak al nauak iamk m'ei a Sep'eti, iv'i a tetiar, kavmhmah a nitar. Laha, a Iesu iv'ara anr.

²² Iv'amk m'a ti arln nauak karln a tetiar, karsapei.

A Iesu ien mamh m'ertu inelnal

²³ Laha, a Iesu iv'a arna nut udlani a Kalili, kav'iv'en sei al nmah tamatar, kavrp'ep'a v'nen p'as na v'anuan Atua, kamhmah a m'ertu arna m'etienar udlani m'a si udlani iutakm a p'akr.

²⁴ Dav'a v'nen ivruri ier nut udlani a Siria. Alev' m'ertu udlani m'etienar iururaur, m'er nki p'akr irer, kauirv'a asnn. Hir kinkin m'im'iln stu ilak a nlr, hir kinkin avm'em'a, hir kinkin pna p'akr im'a, v'eti hin imhmah anr udlani.

²⁵ M'ertu istudau avsapei, avandan a Kalili m'a nut iamk v'anu lil inal iter atlera, kavandan a Serusalem, a Sutia, m'a tv'eliel na nauei a Surtan.