Matiu 3 - V'nen P'as iv'i Turanien Trtarep' m'a Turanien M'dah

Parian a Sun Paptais

¹ Arna naran lera, a Sun Paptais ima kavrp'ep'a v'nen p'as arna nut kaka iter a Sutia, kavr ti a,

² “Pavvav nlm'i, sena ti v'anu eia itmima sarei.”

³ Aulera iv'i dui la Aisaia iv'i pruvet Atua, itvrur sarei ha, kavr ti a, “Dui iamk iv'ana eia arna nut kaka kavr ti a, ‘Pavandedp' a navanelan a Mlin Eia kavan mamh alan ipaviviln.’ ”

⁴ A Sun lera iua nil kam'el iv'i klusan, kav'u sitrav avani arna nila p'ak pluk, suadan iv'i tapat m'a ns sukapak iter al lili.

⁵ Laha, m'ertu avlak a Serusalem m'a nut a Sutia udlani m'a nut udlani iter a p'ak naui a Surtan, avrav'a asnn,

⁶ Kavvrp'ep'a si stuar, laha, hin ien paptais anr al naui a Surtan.

⁷ V'eti naran ila ti Varisi m'a Satiusi avstudau avrama asnn a ti ipan paptais anr, ivr anr kavr ti a, “Kam'i kvv'i net nmat. Hin ak ivr a kam'i a ti pavruh asn nl reran Atua la ipama ha?

⁸ Pavv'iv'en navan a ti ktvvav sera nlm'i.

⁹ V'eti mavvri arna nlm'i kavvr ti a, ‘A Epraham iv'i a tetiam'em'.’ Sena ti kana nvr a kam'i, Atua irndu ti ipalev' nav'et laha kani ti apavv'i a natn a Epraham.

¹⁰ V'eti hilaha tamiuk itater sarei asn uar nai a ti apatrusus nai udlani navan p'as ihei, kasrani al nep'v'en.

¹¹ Aau, kana nen paptais a kam'i a nauei arna ti pavvav v'ahienam'i, v'eti Dui ipatauatah a kana hin nut huan ilil isiv' kana, kana naviviln a ti p'eua susan. Hin ipan paptais a kam'i a M'im'iln P'as m'a nep'v'en.

¹² Hin iua savel na uit aan p'ret ani al lm'an, sena ti ipasran uit nen eia, a ti nalen ipatvla heia m'at nen, sarei, kanen m'at nen kataui al nmah nen, kal heian udlani al nep'v'en ikahiris naran.”

A Sun ien paptais an a Iesu

¹³ Arna naran lera, a Iesu idan a Kalili kadama a naui a Surtan asn a Sun a ti ipan paptais ani.

¹⁴ V'eti a Sun irn ti ipavrkari kavr ti a, “Iviviln a ti Nakm pan paptais a kana. ?Kma asnk sena v'ata?”

¹⁵ A Iesu ivrprani, kavr ti a, “Pam'ahu a ti ipanap'i lera hilaha sena ti iviviln a ti p'van si udlani Atua itaui.” Sarei, a Sun im'ahu ani.

¹⁶ Naran a Iesu itpaptais sarei, kadama aut, pavrni, iv'amk m'a ti nut eia iela hin asnn, laha ila M'im'iln Atua ima a nadep' inep'a navimar, kadap's aranan.

¹⁷ Laha, pavrni, nadl iamk iendan eia kavr ti a, “Aulera iv'i a Natk, nlap'as ani, nrn ip'as ani istudau.”