Matiu 28 - V'nen P'as iv'i Turanien Trtarep' m'a Turanien M'dah

A Iesu ithal ml arna m'ienen

¹ Naran Sapat ithiris sarei, naran neiel itv'i ti ipatpeia arna napn itauamu a uik, a Meri a Maktala m'ei a Meri uraur lahara arma a ti aparla navap atin a Iesu a nln.

² Laha, pavrni, nami lil imi, sena ti enselan a Mlin Eia idan a nut eia kadama a nadep' kushla nav'et itukar karliu iv'a au kalak aranan.

³ Nahn inep'a naran nu ilev' m'aten, klusan itva istudau, kanep'a sera snu.

⁴ Laha, m'rnur avp'aus navap avdedrn ani kavvrdedrn kavrama kavnep'a sera m'ertu im'a.

⁵ V'eti ensel ivr anr artav'et lahara kavr ti a, “Mardedrn, sena ti kana nrndu ti krtala an a Iesu la aluei arna su lamu ha.

⁶ Hin ialak atlaha, sena ti itthal ml, inep'a nut itvr sarei inap'ei. Parma karla nut atu p'akn a Mlin Lil.

⁷ Parv'el ipalahml karvr anr arm'ertuan a ti Hin itthal ml arna m'ien. Parrni, Hin itauamu a kam'i a Kalili. Kam'i pavlei atlera. Parrni, ntvr sarei a kam'i.”

⁸ Laha, hir arln navap karv'el ilahml kardedrn karrn ip'as istudau karvrvr a ti aparvrp'ep'a v'nen lera anr arm'ertuan a Iesu.

Tav'et arru arpatei a Iesu

⁹ V'eti naran arv'a a ti aparvrp'ep'a v'nen lera anr arm'ertuan, pavrni, a Iesu ima asnr, kavr ti a, “Ip'as.” Laha, hir arv'a asnn karsisihpu karuada tln karpatei.

¹⁰ Laha, a Iesu ivr anr kavr ti a, “Mardedrn. Parv'a karvr anr artv'alk a ti apavrav'a a Kalili kavla Kana atlera.”

Avtu nav'et anr m'rnur a ti apavhap'il

¹¹ Sarei, naran arv'el, pavrni, m'rnur kinkin avp'aus navap avrav'a ml arna v'anu kavvrp'ep'a si udlani itu hin asnr arpris lil.

¹² Hir avp'lt m'er elta udlani kavvruri, sarei kavtu nav'et istudau anr arm'rnur kavvr anr kavvr ti a,

¹³ “Kam'i pavvr ti a, ‘Arm'ertuan avrama lihat kavv'nah p'akn naran nvm'atr.’

¹⁴ V'eti ipavr ti kavman iparn v'nen lera, kam'em' uaki p'vv'ana mamh m'ei kavani ti der imaier kam'i.”

¹⁵ Laha, arm'rnur avlev' nav'et kavani inep'a nut atvvr sarei anr inap'ei. V'eti ardu a Isrel avvr v'nen lera uam nakl ier dika.

A Iesu itep'a m'ertuan a ti apavrav'a arna nut udlani kavvrp'ep'a v'nen p'asan

¹⁶ Laha, arm'ertuan arnal lman iamk avrav'a a Kalili arna ptha la a Iesu itvr sarei anr ha.

¹⁷ Naran avlei, avpatei, v'eti hir kinkin ahavv'ahi ipahua.

¹⁸ Laha, a Iesu iv'a asnr kav'ana m'er kavr ti a, “Atua itu nut hua udlani a Kana arna nut eia m'a nut a nadep'.

¹⁹ Sena si lera, pavrav'a arna v'anu udlani kavani ti apavv'i m'ertuak, kavan paptais anr arna nahan a Tatei, a Natn m'a M'im'iln P'as.

²⁰ Kavv'iv'en anr a ti apavsapa v'nen udlani nttu sarei a kam'i. Laha, pavrni, Kana nlak asnm'i nakl dav'a ipaier naran nadep' ipahiris.” Amen.