Matiu 27 - V'nen P'as iv'i Turanien Trtarep' m'a Turanien M'dah

Avtau a Iesu al lm'an a Pailat

¹ M'ih nen m'etav'aran nrnren arna m'itinar arpris lil m'er areltar m'ertu, avtaui ti apavrpep'n a Iesu.

² Sarei, kavhuda lm'an a Iesu kavuirv'a kavtaui al lm'an a Punsias Pailat iv'i kavman.

A Sutas isrp'n hin

³ V'eti a Sutas, la itau a Iesu al lm'ar m'ertu stu ha, naran iledu ti apavrpep'n a Iesu, irn istu istudau kauirv'a nav'et ineltl (30) lahara asnr pris lil m'er elta udlani, kavr anr kavr ti a,

⁴ “Kana nen si stu. Nttu sera dui iaan si stu al lm'am'i.” V'eti hir avvr ti a, “Kam'em' navv'ahur si lera. Nakm uaki pav'ahuri.”

⁵ Sarei, a Sutas isran nav'et udlani a nadep' al nmah tamat, kav'el kadav'a kasrp'n hin.

⁶ Laha, arpris lil avlev' nav'et nen kavvr ti a, “Iaviviln a ti p'vtaui asn nav'et na nmah tamat, sena ti iv'i uliena di m'ertu.”

⁷ Sarei, avv'nv'ana sanan kavul nadep' iamk, iv'i nadep' a dui ien ssv'en a vdrei, sena ti apatin v'anudl a nln nakl.

⁸ Sena si lera atu naha nadep' lera iv'i Nadep' na Di M'ertu. Nahan lera iter ier dika.

⁹ Si lera itu hin, iviviln a sei pruvet tituei iv'i a Seremaia, ivri kavr ti a, “Laha, avlev' nav'et ineltl (30), iv'i uliena Dui, inep'a ti arm'ertu a Isrel avtaui iv'i ulien nen.

¹⁰ Katu nav'et lera kul a nadep' a m'ertu ien ssv'en a vdrei, inep'a sera ti a Mlin Eia itu v'nen a kana.”

A Iesu ip'tir arna nahn a Pailat

¹¹ Dav'a, a Iesu ip'tir arna nah kavman. Kavman imimani, kavr ti a, “?Nakm kv'i Mlinar ardu a Sutia?” A Iesu ivrprani, kavr ti a, “Aau, inep'a nut kvri inap'ei.”

¹² V'eti naran arpris lil m'er elta udlani avv'ana hua m'ei, Hin iavrpren si kinkin.

¹³ Laha, a Pailat ivr ani, kavr ti a, “?Kaarn si udlani avv'ana hua m'ah sanan?”

¹⁴ V'eti Hin iavrpren v'nenan kinkin ipamk kani ti kavman itah ani istudau.

A Iesu ilev' m'lnen a Parapas

¹⁵ Laha, arna tim'ah lera kavman isapa p'kln a ti ipam'ahu a ti m'ertu ipamk ilak al p'resin iparuh, ipav'i m'ertu nelnal apavrni.

¹⁶ Arna naran lera, dui iamk ien si stu lil, ilak al p'resin, nahan iv'i a Parapas.

¹⁷ Sena si lera, naran avp'lt atlera a Pailat ivr anr kavr ti a, “?P'em'ahu an ak iparuh kav'alet asnm'i, a Parapas v'aha a Iesu avr ti iv'i a Kristu ha?”

¹⁸ Sena ti hin irndu ti atvtu sarei al lm'an sena ti nlr ipri uaki.

¹⁹ Naran a Pailat ilak arna naplan, a nut ipav'ana hua m'a m'ertu, a naun itep'a v'nen asnn, kavr ti a, “Nakm man si kinkin a Dui p'as lera, sena ti nrn istu istudau sanan Aulera naran nm'atr kala sei hatuei.”

²⁰ V'eti arpris lil m'er arelta avani ti nelnal udlani apavmiman a Parapas kavvr ti apavrpep'n a Iesu.

²¹ Laha, kavman ivr anr ml kavr ti a, “?Dui iru hilera, kvrn ti p'em'ahu an a hin ak a kam'i?” Avvr ti a, “A Parapas.”

²² A Pailat ivr anr kavr ti a, “?V'eti p'en v'ata an a Iesu la avvr ti iv'i a Kristu ha?” Hir udlani avvr ani kavvr ti a, “Paluei arna su lamu.”

²³ V'eti kavman ivr ti a, “?Sena v'ata? ?Sena ti ien si stu v'ata?” V'eti hir avv'ara eia istudau kavvr ti a, “Paluei arna su lamu.”

²⁴ Laha, a Pailat ila ti ikasiv'r kala ti inep'a ti apavan der, kalev' nauei kinkin kasila lm'an arna nah nelnal udlani, kavr ti a, “Iav'i pariak a ti di Dui P'as lera ipararev'. Kam'i uaki pavp'aur si lera.”

²⁵ Laha, m'ertu udlani avvrprani kavvr ti a, “Din ipama aranam'em' m'er a netm'em'.”

²⁶ Sarei, im'ahu a ti a Parapas ipav'a, katau a Iesu al lm'ar m'rnuran a ti apavrpi a nam'et, sarei a ti apavluei arna su lamu.

Arm'rnur avsip'len a Iesu

²⁷ Laha, m'rnura kavman avlev' a Iesu kavuirv'a al naml na nmah a kavman kavlev' m'rnur uraur udlani kavtaur avp'tirtalu ani.

²⁸ Kavlev'la klusan kavtu klus m'ielan a mlin lil aranan.

²⁹ Kavlev' makau lun iak kavv'ati ima kanep'a manuan a mlin lil kavtaui arna ptn, kavtu nai iamk al m'ldu lm'an kavsisihpu asnn kavsip'lani kavvr ti a, “Ip'as, Mlinar m'ertu a Isrel.”

³⁰ Kavtup'ai kavlev' nai lahara kavrp a ptn.

³¹ Naran atvsip'len sarei avlev'la klusa mlin aranan kavtu klusan aranan kavv'av'ei aut a ti apavluei arna su lamu.

A Mlin Lil ilal arna su lamu

³² Naran avv'el avpasla dui a Sairini iamk, nahan iv'i a Saimun, kavtp'i a ti ipaua su lamu nen a Iesu.

³³ Dav'a, avier nut iamk, nahan iv'i a Kulkuta, arna v'nenar iv'i nut a Su Pt M'ertu.

³⁴ Avtu naui m'iel ihaau ani, avuhei m'a naui haau kinkin, v'eti naran im'ndinei iarn ti ipam'ni.

³⁵ Naran avluei arna su lamu, avlev' klusan kavan hlhal sanan kavvsvsani.

³⁶ Sarei, avlak atlera kavp'auri.

³⁷ Eia na ptn avtu v'nen ivrp'ep'a sei iani istu kavr ti a, “Aulaha iv'i a Iesu kav'i Mlinar arm'ertu a Isrel.”

³⁸ Laha, avlua dui na v'nv'nahien arru arna su lamu nar asnn, nki iamk arna m'ldaun, tv'aln arna m'ir nen.

³⁹ V'eti m'ertu avv'siau asnn kavsip'lani kavvividen ptr kavvr ti a,

⁴⁰ “U, Nakm la kvr ti pakapr nmah tamat kahluri arna napn ipatl ha, pamhmah anh hilaha. Ipavr ti kv'i a Natn Atua, pasisi arna su lamu.”

⁴¹ Laha, arpris lil ml, m'er tisa na v'nen hua, m'er elta avsip'lani inap'i lera kavvr ti a,

⁴² “?Hin itmhmah sarei a m'ertu uraur, v'eti inap'i iarndu ti ipamhmah a Hin ml? Ipavr ti Hin iv'i Mlin lil a Isrel, ipasisi arna su lamu hilaha, sarei p'vv'ahi.

⁴³ Hin iv'ah Atua. Ip'as a ti Atua ipalev'lei hilaha, ipavr ti irni, sena ti Hin itvr sera ti a, ‘Kana nv'i a Natn Atua.’ ”

⁴⁴ Inap'i lera ml, ardu na v'nv'nahien lahara aluar arna su lamu m'ei hara, arsip'lani.

A Iesu im'a arna su lamu

⁴⁵ Laha, nut ima kadam't arna v'anu lera udlani itudina hin arna lihalm'au kaier m'etaneiel itl.

⁴⁶ Naran ihih m'etaneiel itl, a Iesu iv'ara eia kavr ti a, “?Eli, Eli, lama sapahtani?” Inep'a ti ivri arna v'nenan kavr ti a, “?Atuak, Atuak, inap'i hin ktln sera Kana?”

⁴⁷ V'eti m'ertu kinkin avp'tir atlera kavrn v'nen lera, kavvr ti a, “Aulera iv'ara an a Ilaitsa.”

⁴⁸ Iv'amk m'a ti hir kinkin iamk ivrvr kalev' kalik iamk kataui al naui haau kataui arna nai iamk katau ani a ti ipam'ni.

⁴⁹ V'eti tv'alr avvr ti a, “Palni, p'vla ti Ilaitsa ipama kalev'lei v'aha ikahei.”

⁵⁰ V'eti a Iesu iv'ara eia ml, sarei katu m'im'iln al lm'an Atua.

⁵¹ Laha, pavrni, kalik itukar nutet al nmah tamat ha iapr hin iru, dan dan eia kaier auei. Laha, nami imi kamienpapr nav'et.

⁵² Navap atintin m'ertu a nln aviela hir, laha m'ertuan Atua avstudau, la atvram'a sarei ha, avthal ml arna m'ien.

⁵³ Laha, naran a Iesu ithal ml arna m'ien, avrama aut dan dan al navap atinr a nln, kavv'el kavrav'a al v'anu p'as a Serusalem kavv'iv'en hir asnr m'ertu avstudau.

⁵⁴ Mlin na m'rnur m'er hir kinkin avp'tir m'ei kavp'aus nut asn a Iesu, naran avla ti nami imi m'a si ururaur udlani itu hin, hir avdedrn ani istudau kavvr ti a, “Nvvrdaui, Aulaha iv'i a Natn Atua.”

⁵⁵ Tav'et istudau atlera la avsapei a Iesu dan a Kalili kavmhmah ani ha, avp'tir v'iv'a au kavp'ei.

⁵⁶ Naha tav'et kinkin avp'tir avv'i a Meri, idan a Maktala, a Meri, iv'i a unian a Sim'is m'ei a Suses, m'ei a uniar a natn a Sep'eti.

Avtu p'akn a Iesu al navap

⁵⁷ Dui iamk ima dan Arimatia sian istudau, iv'i m'ertuan a Iesu, nahan iv'i a Susev'.

⁵⁸ Naran nut itv'i ti ipam't, hin iv'a asn a Pailat kamiman ani ihua a ti ipalev' p'akn a Iesu. Sarei, a Pailat itu v'nen a ti apalav'i katau ani.

⁵⁹ A Susev' ilev' p'akn a Iesu kanpei al kalik tva m'dah iamk.

⁶⁰ Sarei, kataui al navap m'dahan iamk ihli ser, katp' nav'et lil iamk imlden hin kap'leskar navap ani, sarei karuh.

⁶¹ Laha, a Meri Maktala m'ei a Meri uraur lahara arlak asn navap.

A Pailat itu m'rnur a ti apavp'aus navap

⁶² V'eti arna m'ih na napn avandedp' si udlani sena Sapat, arpris lil m'er arvarisi avrama kavp'lt asn a Pailat kavvr ti a,

⁶³ “Mlin, kam'em' nvv'ahur ti Aulera ihap'il naran idsilv' uam kavr ti a, ‘Arna nitla napn Kana p'ethal ml arna m'ien.’

⁶⁴ Sena si lera patu v'nen a ti apavp'aus nut asn navap avtini a nln dav'a ipaier nitla napn. Imahei ti m'ertuan apavrama lihat kavv'nahi kavvr anr m'ertu udlani kavvr ti a, ‘Hin ithal ml arna m'ien.’ Ipavr ti ipanap'i lera hap'ilien lera ipastu kasiv' nki itauamu.”

⁶⁵ A Pailat ivr anr kavr ti a, “M'ertu apavp'aus nut hilera ra. Pavv'el kavrav'a kavp'tirkari ipahua ipanep'a nut kvrndaui ipanap'ei.”

⁶⁶ Sarei, hir avv'el kavp'tirkar navap avtini a nln kavtu mak arna nav'et lera a ti ipav'iv'en nut naran m'ertu kinkin ipatp'i, kavtu m'rnur kinkin atlera a ti apavp'tirkar navap kavp'aus nut.