Matiu 26 - V'nen P'as iv'i Turanien Trtarep' m'a Turanien M'dah

M'ertu lil a Isrel avvrur navanel a ti apavrpep'n a Iesu

¹ Dav'a, naran a Iesu itvr sera v'nen udlani lera, ivr anr arm'ertuan kavr ti a,

² “Kam'i kvrndu ti paaua ipav'i tim'ah na Pasuva. Laha, apavtu Kana, nv'i Net M'ertu, al lm'ar m'ertu apavlua Kana arna su lamu.”

³ Naran lera arpris lil, artisa na v'nen hua, m'er eltar m'ertu a Isrel avp'lt al nmaha pris lil, nahan iv'i a Kaiavas,

⁴ kavvrur navanel a ti apavsner a Iesu kavrpep'ni.

⁵ V'eti avvr ti a, “Nkavani arna napn na tim'ah, imahei ti arm'ertu apavan der lil sanan.”

Tav'et iamk ihsran sida p'as arna ptn a Iesu

⁶ Naran a Iesu ilak a nut a P'etani, al nmahan a Saimun, la lep'ersi itua sarei tituei ha,

⁷ Tav'et iamk ima asnn, naran ilak asn tiv' kahatat. Hin iua putel iamk aani a nav'et, nahan iv'i alapasta, sida p'as ulien nen ilil istudau iter a nln, laha kahsrani arna ptn a Iesu.

⁸ V'eti naran arm'ertuan avla si lera, nlr irer, laha avvr ti a, “?Inap'i hin iutakm a sida p'as lera?

⁹ Amvr ti amulul a sida p'as lera, amlev' nav'et imstudau sanan, katau anr m'ertu siar ihei.”

¹⁰ V'eti a Iesu irndu sei avvri, kavr anr kavr ti a, “?Kam'i kvv'ana hua m'a tav'et laha sena v'ata? Sena ti hin ien si p'as a Kana.

¹¹ Sena ti m'ertu siar ihei apavlak asnm'i ipel, v'eti Kana nkalak asnm'i ikel.

¹² Naran ihsran sida pas lera arna p'akk, iendedp' p'akk a ti apatini.

¹³ Nvrdaui, nvr a kam'i, arna nut udlani arna nadep' apavrp'ep'a v'nen p'as laha, apavrp'ep'a sei tav'et laha iani, a ti m'ertu apavv'ahuri.”

A Sutas ituran a ti ipatau a Iesu al lm'ar m'ertu avlep'lei

¹⁴ Sarei, lman iru (12) iamk, nahan iv'i a Sutas Iskariut, iv'a asnr arpris lil, kavr anr kavr ti a,

¹⁵ “?Pavtu kana v'ata ipavr ti p'etaui al lm'am'i?” Laha, hir avm'ahu a nav'et ineltl (30) ani.

¹⁶ Itudina hin arna naran lera, a Sutas itala a navanel a ti ipatau a Iesu al lm'ar m'ertu avlep'lei.

A Iesu m'er arm'ertuan avhan tim'ah na Pasuva

¹⁷ Laha, arna napn itauamu a Tim'ah Lil na P'ret Iis Nen Ihei nakl, arm'ertuan avrama asn a Iesu, kavvr ani kavvr ti a, “?Nakm krn ti p'vandedp' a nut ip'i a ti p'vhan tim'ah na Pasuva?”

¹⁸ Laha, a Iesu ivr anr kavr ti a, “Pavrav'a arna v'anu asn dui kinkin iamk kavvr ani kavvr ti a, ‘Tisa ivr ti a, “Hilaha naranak itmima. Kam'em' m'er arm'ertuak p'van Pasuva al nmaham.” ’ ”

¹⁹ Sarei, arm'ertuan avani inep'a nut a Iesu ittu sera v'nen anr inap'ei, kavandedp' tim'ah na Pasuva.

²⁰ Naran nut ilihat, a Iesu ilak kavhatat m'er arm'ertuan arnal lman iru (12).

²¹ Naran avhatat, ivr ti a, “Nvrdaui, nvr a kam'i, kam'i kinkin ipamk ipatu Kana al lm'ar m'ertu avlep'la Kana.”

²² Laha, avrn istu ani istudau. Hir udlani p'sev' avvr ani kavvr ti a, “?Mlin, hin ak? ?Kv'ah ti iv'i kana?”

²³ V'eti hin ivrpranr kavr ti a, “Dui la nrdi p'ret m'ei al dis ha, hin ipatu Kana al lm'ar arm'ertu avlep'la Kana.

²⁴ Kana nv'i Net M'ertu, p'av'a kadam'a pr, inep'a nut atulul sarei ani arna Paivul. V'eti nrn istu a dui ipatu Kana, nv'i Net M'ertu, al lm'ar arm'ertu avlep'la Kana ha. Ip'as mau ipavr ti dui nen idaiak naran kinkin.”

²⁵ Sarei, a Sutas la itaui al lm'ar m'ertu avlep'lei ha, imiman ani, kavr ti a, “?Tisa, hin ak? ?Kv'ah ti iv'i kana?” A Iesu ivrprani, kavr ti a, “Inep'a nut kvri inap'ei.”

A Iesu ien Tim'ah Lil itauamu

²⁶ Naran avlak kavhatat, a Iesu ilev' p'ret kavr ip'as sanan kakausi katau anr arm'ertuan kavr anr kavr ti a, “Pavlav'i kavhani. Si laha iv'i p'akk.”

²⁷ Sarei, ilev' panikin kavr ip'as sanan katau anr kavr ti a, “Kam'i udlani pavm'ni.

²⁸ Sena ti si laha iv'i dik na turanien m'dah la ipararev' sena m'ertu ipastudau ha a ti ipalev'la si stuar.

²⁹ Nvrdaui, nvr a kam'i, Kana nkam'n ui nava nahau laha ml ipaier napn nakd udlani p'vm'n term'dah arna v'anuan a Tetiak.”

³⁰ Laha, avhai a npin iamk kavv'el kavrav'a av'aran asn Ptha na Nai iv'i Uliv.

A Iesu ivr ti a P'ita ipap'ep'ni

³¹ Laha, a Iesu ivr anr kavr ti a, “Arna lihat laha, v'ahienam'i udlani ipars sanak, sena ti atulul sarei ani arna Paivul kavvr ti a, ‘Kana p'erp Dui ip'aur sivsiv, laha sivsiv udlani atvp'lt sarei apavamkma.’

³² V'eti ipatauatah a ti p'ethal ml arna m'ien p'etauamu a kam'i kadav'a a Kalili.”

³³ A P'ita ivrprani, kavr ti a, “Ipavr ti m'ertu udlani v'ahienar ipars sanam, v'eti v'ahienak ikahrs naran kinkin.”

³⁴ A Iesu ivr ani, kavr ti a, “Nvrdaui, nvr anh ti arna lihat laha uaki, naran ntu ikdatiter, nakm pavri ipav'atl kavr ti kaarndu Kana.”

³⁵ A P'ita ivr ani, kavr ti a, “Ipavr ti p'am'a m'ah, v'eti nkahap'il kavr ti narndauh.” Laha, m'ertuan udlani avvri inap'i lera.

A Iesu itu tamat arna nut a Ketsemani

³⁶ Sarei, a Iesu m'er arm'ertuan avv'el kavier a nut iamk, nahan iv'i Ketsemani, kavr anr arm'ertuan kavr ti a, “Kam'i pavlak dei atlaha, Kana p'av'a atlahatu katu tamat.”

³⁷ Sarei, ilev' a P'ita m'er a natn a Sep'eti arru a ti apavsapei, dav'a nln ima karn istu kadadv ihuadau.

³⁸ Laha, ivr anr kavr ti a, “Nlk irn istu ihuadau, inep'a ti p'am'a. Kam'i pavlak dei atlaha kavrasp' m'a Kana.”

³⁹ Laha, iv'el isusupa kadars arna nahn katu tamat kavr ti a, “U, Tetiak, ipavr ti navanel ipaiak, pani ti nkam'nm'n al panikin laha, v'eti narn ti ipanep'a nut Kana nrni ipanap'ei, v'eti ipanep'a nut Nakm uaki krni ipanap'ei.”

⁴⁰ Sarei, ima asnr m'ertuan lahara kala ti avm'atr, kavr an a P'ita kavr ti a, “?Inap'i hin kam'i kaavrndu ti pavrasp' m'a Kana m'etaneiel ipamk uaki?

⁴¹ Kam'i pavrasp' kavtu tamat a ti si stu ikandina kam'i. Sena ti v'ahienam'i ihua, v'eti p'akm'i iahua.”

⁴² Sarei, iv'el ml katu tamat iv'i v'aru nen kavr ti a, “U, Tetiak, ipavr ti mkalev'la panikin laha asnk dav'a ti p'em'nm'n a nln, nrn ti ipanep'a nut uaki Nakm krni ipanap'ei.”

⁴³ Laha, Hin im'alet ml kala ti avm'atr ml, sena ti m'atar idv ihuadau.

⁴⁴ Sarei, ilnr ml kadav'a katu tamat kavr v'nen lahara ml, iv'i v'atl nen.

⁴⁵ Laha, ima asnr m'ertuan kavr anr kavr ti a, “?Hilaha kvm'atr ra kavrnrn kam'i? Pavlei, naran nen itama a ti apatu Kana, nv'i Net M'ertu al lm'ar m'ertu stu.

⁴⁶ Pavthal, p'vrav'a. Pavlei, dui ipatu kana al lm'ar itama sarei.”

A Sutas itau a Iesu al lm'ar m'ertu avlep'lei

⁴⁷ Naran a Iesu idv'ana uam, pavrni, a Sutas, iv'i lman iru (12) ha, ima m'er m'ertu avstudau. Avua tali lilil m'a niam kavandan asnr arpris lil m'er areltar arm'ertu a Isrel.

⁴⁸ Aulera, la irn ti ipatau a Iesu al lm'ar ha, ittu sera v'nen anr kavr ti a, “Dui lera p'evr ip'as ani kasm pla nahn ha, Hin ra, Pavuadei.”

⁴⁹ Iv'amk m'a ti ima asn a Iesu kavr ti a, “Ip'as, Tisa”, kasm pla nahn.

⁵⁰ A Iesu ivr ani, kavr ti a, “?Tv'alk, kma sena v'ata?” Laha, avrama, kavtu lm'ar aranan a Iesu kavuadei.

⁵¹ Laha, pavrni, m'ertu iamk isapei a Iesu irila tali lilan karp dui na m'akarienan a pris lil katrla drlnan.

⁵² Laha, a Iesu ivr ani, kavr ti a, “Patum'alet a tali lilam a m'lnen sena ti m'ertu udlani la avrila tali lil ha, tali lil ipatrp'nr.

⁵³ ?Kv'ah ti Kana narndu ti p'etu tamat asn a Tetiak hilaha? Laha, Hin ipatep'a ensel lilan ipanal lman iparu m'er ensel na naur apavnelnal ipastudau, a ti apavsr lm'ak.

⁵⁴ V'eti ipavr ti Kana p'ani ipanap'i lera, Kana nasapa v'nen la Paivul itvr sarei ha, kavr ti iknap'i lera pr.”

⁵⁵ Arna naran lera a Iesu ivr anr nelnal avp'lt atlera kavr ti a, “?Inap'i hin kvua tali lil m'a vnapau a ti pavuada Kana? ?Kam'i kvv'ah ti nv'i dui nrp m'ertu kav'nv'nah? Kana nlak asnm'i iel al nmah tamat kav'iv'en sei, v'eti kaavuada Kana.

⁵⁶ V'eti si udlani lera ittu sera hin, sena ti sei pruvet atvulul sarei ani ha, ipama katu hin.” Laha, arm'ertuan udlani avlni kavruruh.

A Iesu ip'tir arna nah Kaunsel

⁵⁷ V'eti hir la atvuada sarei a Iesu ra, avuirv'a asn a Kaiavas iv'i pris lil, arna nut artisa na v'nen hua m'er arelta avp'lt atlera.

⁵⁸ A P'ita isapei, v'eti iaihihi, kadav'a al naml na nmahan a pris lil kalak m'er ardu na m'akarien, a ti ipala nut ipahiris ipanap'ei.

⁵⁹ Laha, arpris lil m'er arelta m'er m'ertu udlani avlak arna Kaunsel avtala a m'ertu kinkin apavsip'len a Iesu, a ti ipam'a.

⁶⁰ V'eti ahavpasla si kinkin. M'ertu istudau avrama kavvrur a Iesu kavhap'il uaki, v'eti ahavpasla sei iani istu. Sarei, m'ertu arru arma karvrur a Iesu karhap'il karvr ti a,

⁶¹ “Aulaha itvr sera ti a, ‘Kana nrndu ti p'ekapr nmah tamatan Atua kahluri ml arna napn ipatl.’ ”

⁶² Sarei, pris lil ip'tir kavr ani, kavr ti a, “?Nakm kaavrpren si kinkin? V'nen la arm'ertu arvri ha inap'i?”

⁶³ V'eti a Iesu iavr si kinkin. Laha, pris lil ivr ani, kavr ti a, “Kana nrn ti Nakm pah lm'am asn Atua la isilv' ha, a ti Nakm pavr a kam'em', kv'i a Kristu, a Natn Atua, v'aha ihei?”

⁶⁴ A Iesu ivr ani, kavr ti a, “Inep'a nut nakm kvri inap'ei. V'eti Kana nvr a kam'i, ipatauatah a si laha, kam'i pavla Kana, nv'i Net M'ertu, p'elak arna m'ldaun Atua Lil, nut huan iak, kadama arna p'knaran na nut eia.”

⁶⁵ Laha, pris lil iapr klusan kavr ti a, “!Isip'len Atua! P'vrn v'nen uraur sena v'ata? Pavrni, hilaha kam'i ktvrn sera nut isip'len Atua inap'ei.

⁶⁶ ?Kam'i kvv'ah v'ata?” Avvrprani kavvr ti a, “Hin iviviln a ti ipam'a.”

⁶⁷ Laha, hir avviri nahn kavrpi. M'ertu uraur avusei kavvr ti a,

⁶⁸ “Nakm kv'i a Kristu, pavrp'ep'ei a kam'em' hin ak irph.”

A P'ita ip'ep'n a Iesu katakal istudau sanan

⁶⁹ Laha, a P'ita ilak av'aran a nl naml na nmah lahara. Dav'a vitar na m'akarien iamk ima asnn kavr ti a, “Nakm lera klak m'ei a Iesu iv'i dui a Kalili.”

⁷⁰ V'eti hin ip'ep'ni arna nahr udlani, kavr ti a, “Narndu sei kvri.”

⁷¹ A P'ita iv'el kadav'a arna pn liu na naml. Laha, vitar na m'akarien uraur ilei, kavr anr m'ertu avlak atlera kavr ti a, “Aulaha ilak m'ei a Iesu iv'i Dui a Nasaret.”

⁷² V'eti a P'ita ip'ep'ni ml kah lm'an kavr ti a, “Kana narndu Dui lera.”

⁷³ Iap'arei m'ertu avlak atlera avrama asnn, kavvr an a P'ita kavvr ti a, “Nvvrdaui, nakm laha kv'i hir ki iamk, sena ti v'nenam iv'iv'ani.”

⁷⁴ Laha, iahdina lm'an ml kavri ihua ihuadau, kavr ti a, “Kana narndu Dui lera.” Iv'amk m'a ti ntu ititer.

⁷⁵ Sarei, a P'ita iv'ahur v'nenan a Iesu itvr sarei ani, kavr ti a, “Ipatauamu a ti ntu ipatiter, nakm pap'ep'n Kana kavr ti kaarndu Kana ipav'atl.” Laha, iv'a av'aran katakal istudau.