Matiu 24 - V'nen P'as iv'i Turanien Trtarep' m'a Turanien M'dah

A Iesu ivrp'ep'a ti nmah tamat ipars

¹ A Iesu iv'el kaln nmah tamat, laha, m'ertuan avrama asnn a ti apavv'iv'en ani nmah udlani iter al naml na nmah tamat.

² V'eti a Iesu ivr anr kavr ti a, “?Kam'i kvla nmah lera udlani? Nvrdaui, nvr a kam'i, apakapapr udlani, nav'et kinkin ikap'lt m'a nav'et uraur ml.”

Sei ipatu hin naran itv'i ti nadep' ipahiris

³ Naran a Iesu ilak arna Ptha na Nai iv'i Uliv, arm'ertuan avrama asnn naran iamamk kavvr ti a, “Pavrp'ep'ei a kam'em'. ?Si lera ipatu hin v'aran? ?V'ata ipav'iv'en naran pama ml? ?Nadep' udlani ipahiris v'aran?”

⁴ A Iesu ivrpranr kavr ti a, “Mavv'ah hap'iliena m'ertu kinkin apavvr a kam'i.

⁵ Sena ti m'ertu apavstudau apavrama arna nahak kavvr ti a, ‘Kana nv'i a Kristu.’ Laha, m'ertu apavstudau apavv'ah hap'ilienar.

⁶ Kam'i pavrn ti m'ertu avan naur kavrn v'nen ivrur naur, v'eti pavv'ah kam'i a ti mavdedrn ani, sena ti si udlani lera ipatu hin pr ipatauamu, v'eti nadep' ikdahiris uam.

⁷ Sena ti v'anu kinkin ipap'tir kan naur m'a v'anu uraur, mlin kinkin ipan naur m'a mlin uraur. M'em'erien kinkin ipaiak, m'etien stu kinkin iparp m'ertu ipastudau, nami ipami arna nut kinkin.

⁸ Si udlani lera inep'a tav'et la irn ti v'atn ip'hrer a ti ipalev' sei ha.

⁹ Arna naran lera, apatu kam'i al lm'ar m'ertu kinkin a ti apavutakm a kam'i kavrpep'n kam'i, laha, m'ertu udlani apavlep'la kam'i sena nahak.

¹⁰ Arna naran lera, m'ertu apavstudau apavrars arna v'ahien p'asar, tv'aln ipatu tv'aln al lm'ar m'ertu avlep'lei kavlep'lep'la hir.

¹¹ M'ertu apavstudau apavhap'il kavvr ti avv'i pruvet, laha, m'ertu apavstudau apavv'ahr.

¹² Laha, m'ertu ipastudau apavluvn a v'nen huan Atua, dav'a nelnal akavlap'as an a Mlin Eia ml.

¹³ V'eti m'ertu ipap'tir dav'a ipaier naran nadep' ipahiris, Atua ipalev'lei.

¹⁴ Laha, m'ertu apavvrp'ep'a v'nen p'as na v'anuan Atua arna nadep' udlani kavv'i v'nenan arna nah m'ertu arna v'anu udlani, sarei, nadep' ipahiris.

Der lil ipama

¹⁵ Sena si lera, naran pavla ti si stu la iputakm a nmah tamat ha, ipap'tir a nutet, inep'a nut a Taniel, iv'i pruvet, ivruri inap'ei, (iviviln a ti m'ertu ipav'ana arna v'nen laha, iparndaui),

¹⁶ arna naran lera, ip'as a ti m'ertu apavlak a Sutia apavruh kavrav'a arna ptha.

¹⁷ Ipavr ti m'ertu kinkin ipalak arna nmah eia, imahv'a a nadep' ml a ti ipalev' si kinkin al nmahan,

¹⁸ V'aha m'ertu ilak al pitvet imahhau ml kalev' klusan.

¹⁹ Nrn istu a tav'et apavtkar arna napn lera m'er tav'et apavtu nunu a mardel uam.

²⁰ V'eti pavtu tamat a ti mkavruh naran na m'la, v'aha arna Sapat.

²¹ Sena ti arna naran lera der ipalil kasiv' der udlani itudina hin naran Atua ien nadep', ier dika. Ikalil ml kanap'i lera naran kinkin.

²² Advr ti Atua imakausla naran na der lera, m'ertu kinkin idahamk idsilv', v'eti ipakaus naran na der lera sena m'ertuan itv'li sarar.

²³ Arna naran lera, ipavr ti m'ertu kinkin ipavr a kam'i kavr ti a, ‘!Pavlei, a Kristu hilaha!’ v'aha ‘!Hin atlera!’ v'eti kam'i mavv'ahi.

²⁴ Sena ti m'ertu kinkin apavp'tir kavhap'il kavvr ti avv'i a Kristu v'aha pruvet kavan pari lilil iv'iv'en sei m'a sei m'ertu apavtah ani. Ipavr ti navanel imiak, hir amvutakm a v'ahien p'asar m'ertu Atua itv'li sarar.

²⁵ Pavrni, Kana ntvr sarei a kam'i itauamu.

²⁶ Sena si lera, ipavr ti apavr a kam'i kavr ti a, ‘!Pavlei, ilak arna nut kaka!’ v'eti kam'i mavrav'a. V'aha kavr ti a, ‘!Pavlei, Hin ilak aphat!’ v'eti kam'i mavv'ahr.

²⁷ Sena ti Kana nv'i Net M'ertu p'ama, ipanep'a sera nut nav'l ilev' m'aten inap'ei, ipadan arna Is katpeia kaier Ues.

²⁸ Sena ti arna nut p'ak si kinkin im'a iter, trvn avhan sei im'a apavp'lt atlera.

Net M'ertu ipama ml

²⁹ V'eti iv'amk m'a ti der na naran lera ipahiris, neiel ipam't, nal ikar ml, msi apavrars dan eia, si hua udlani arna liha masamas ipadudul.

³⁰ Sarei, apala sei ipav'iv'en Kana, nv'i Net M'ertu, arna nut eia. Laha, m'ertu arna v'anu udlani arna nadep' apavtakal kavla Kana nv'i Net M'ertu p'ama arna p'knaran arna nut eia, arna nut huak m'a si p'sp'as lililak.

³¹ Laha, Kana p'etep'a enselak apaviv natav drln ipalil, kavtup'lten m'ertuak Atua itv'li sarar, apavandan arna nut iv'a nalen itvtv dan. Apavandan arna pna nut eia kavier pnen.

A Iesu isran v'nen ivrur p'alak

³² V'eti kam'i pavrndu sei arna p'kl p'alak. Naran ranan idv'i sln katu raun, pavrndu ti naran na neiel itmima.

³³ Kam'i pavnap'i lera. Naran pavla si udlani lera, pavrndu ti naran nen imima, inep'a ti iter asn karliu.

³⁴ Nvrdaui, nvr a kam'i, m'ertu avlak hilaha akdavram'a ipatauamu a ti si udlani lera ipatu hin.

³⁵ P'knaran m'a nadep' ipahiris v'eti v'nenak ikahiris.

M'ertu kinkin iarndu napn nen

³⁶ V'eti m'ertu kinkin ikahmk ikarndu napn nen v'aha m'etaneiel nen, aau, ensel arna nut eia ahavrndaui, v'eti a Tetiak uaki irndaui.

³⁷ V'eti naran kana, nv'i Net M'ertu, p'ama ml, ipanep'a sera naranan a Nua.

³⁸ Sena ti naran si udlani idatpl, m'ertu avhatat kavm'nm'n kavan lheien kavtlen tav'et ier napn a Nua iv'a al nauak lil.

³⁹ V'eti ahavrndu si kinkin ier naran nauei ima kalinkar nadep' kalev'lar udlanr. Naran Kana, nv'i Net M'ertu, p'ama, ipanap'i lera.

⁴⁰ Arna naran lera, dui aparru aparm'akar al pitvet, apalev'la tv'aln, kaln tv'aln.

⁴¹ Tav'et aparru aparhitav' uit al nmah nen, apalev'la tv'aln kaln tv'aln.

⁴² Sena si lera, kam'i pavrasp', sena ti kaavrndu naran a Mlinam'i ipama.

⁴³ V'eti pavrndu mamh si laha. Imvr ti mlin na nmah imrndu m'etaneiel na ti dui na v'nv'nahien imama, imp'aus nut, ikam'ahu a ti dui na v'nv'nahien ipakapr nmahan.

⁴⁴ Sena si lera pavandedp' silv'ienam'i, sena ti Kana, nv'i Net M'ertu, p'ama arna m'etaneiel kinkin mkavv'ahuri.

Dui na m'akarien iru, tv'aln ip'as, tv'aln istu

⁴⁵ ?Hin ak asnm'i iv'i dui na m'akarien v'ahienan ip'as kasapa mamh v'nenan a mlinan, la itaui iv'i mlinar m'ertu na m'akarienan, katu tim'ah anr arna naran iviviln ani ha?

⁴⁶ Dui na m'akarien lera iparn ipap'as naran mlinan ipam'alet kala ti ien si udlani lera.

⁴⁷ Nvrdaui, nvr a kam'i, a mlinan ipani hin ipav'i mlin na sian udlani.

⁴⁸ V'eti ipavr ti dui na m'akarienan iv'i dui stu, kavri arna nln kavr ti a, ‘Mlinak ikahma iklahml.’

⁴⁹ Laha, karpdina tv'el dui na m'akarien, kahatat kam'n nauei m'er dui avm'nm'n,

⁵⁰ Laha, mlina dui na m'akarien lahara ipama arna napn kinkin naran iav'ah ti ipalei, arna m'etaneiel kinkin iav'ahuri,

⁵¹ Katrpri, sarei, kataui al m'lna m'ertu avp'ip'en lamuru. Arna nut lera, apavtakal kavhaha lur.