Matiu 2 - V'nen P'as iv'i Turanien Trtarep' m'a Turanien M'dah

Ardu avrndu p'kl msi avandan arna Is

¹ A Iesu iak arna nut a P'etliem iter a Sutia, naran a Erut iv'i mlin lil, laha, pavrni, dui kinkin avrndu p'kl msi avandan arna Is kavier a Serusalem.

² Kavmimani kavvr ti a, “?Mardel iak a ti ipav'i mlin lilar m'ertu a Isrel ilak ip'i? Sena ti nvla msi nen arna Is kavrama a ti p'vpatei.”

³ Naran a mlin a Erut m'er m'ertu udlani a Serusalem avrn v'nen lera, avrn istu sanan.

⁴ Sarei, a Erut itep'a v'nen a ti pris lilil udlani m'er artisa na v'nen hua apavrama kavp'lt asnn, laha, imiman anr kavr ti a, “?A Kristu ipaiak ip'i?”

⁵ Avvrprani kavvr ti a, “Ipaiak a P'etliem a Sutia, sena ti pruvet itulul sarei ani, kavr ti a,

⁶ ‘Nakm, P'etliem, arna nut a Sutia, nakm kaasusupa aranar mlin lilil a Sutia, sena ti Mlin Lil ipamk ipandan asnm, kap'aur m'ertuak a Isrel.’ ”

⁷ Laha, a Erut iv'ara anr ardu lahara avrndu p'kl msi, a ti hin uaki ipav'ana m'er, kamiman mamh anr naran msi lera imadinei itauamu.

⁸ Sarei, itap'er a ti apavrav'a a P'etliem kavr ti a, “Pavrav'a kavtala mamh nut mardel pa ilak. Naran pavpaslei, pavtep'a v'nen ipama asnk a ti kana p'av'a kapatei ml.”

⁹ Naran avrn v'nen a mlin lil, avv'el. Laha, pavrni, msi atvla sarei arna Is iv'el katauamu anr dav'a dav'a kaier nut mardel pa ilak, kap'tir eia nen.

¹⁰ Naran avla msi lera, avrn ip'as istudau.

¹¹ Avrav'a eim al nmah lera, laha, kavla mardel pa m'ei a Meri, iv'i a unian, kavsisihpu asnn kavpatei, sarei aviela natenar kavtuvn a sei ani, iv'i kul, m'a sida p'as avali al nmah tamat nakl, iv'i vrankinsens, m'a ueil m'in ip'as, iv'i mir.

¹² Naran avm'atr, avla ti Atua iv'iv'en anr a ti amavm'alet ml asn a Erut, sarei, avsapa navanel uraur kavrahau a utar.

A Susev' m'ei a Meri arruh karv'a a Itsip

¹³ Naran atvruh sarei, pavrni, a Susev' im'atr kala ti enselan a Mlin Eia ima asnn kavr ti a, “Pathal kalev' mardel pa m'ei a unian kavruh kavrav'a a Itsip kavlak atlera ipaier naran p'etep'a v'nen asnm sena ti a Erut ipatala ani a ti iparpep'ni.”

¹⁴ Laha, ithal kalev' mardel pa m'ei a unian lihat nen, kavruh kavrav'a a Itsip.

¹⁵ Kavlak atlera dav'a ier naran a Erut im'a. Laha, v'nen a Mlin Eia itvrp'ep'a sarei arna pn dui na v'nenan, ima katu hin, ivr ti a, “Kana nv'ara an a Natk dan a Itsip.”

Arpep'n mardel papa

¹⁶ Naran a Erut ila ti ardu na msi avhap'il m'ei, nln irer istudau, katep'a m'rnur a ti apavrp udlen mardel dui a P'etliem m'a nut udlani itertalu ani, paiar iru v'aha idahei, sena ti itmiman mamh sera naran nen asnr dui avrndu p'kl msi lahara.

¹⁷ Arna naran lera, v'nen la a Seramaia, iv'i pruvet, itvr sarei ha, ima katu hin, ivr ti a,

¹⁸ “Arn drl m'ertu a Rama avrn istu kavvalau kavtakal istudau. A Retsel itakal sanar a natn. Iarn ti m'ertu kinkin ipav'ana mamh m'ei, sena ti a natn ihei ml.”

A Susev' m'ei a Meri arln nut a Itsip karv'a a Nasaret

¹⁹ V'eti naran a Erut itam'a sarei, pavrni, arna nut a Itsip, a Susev' im'atr kala ti enselan a Mlin Eia ima asnn kavr ti a,

²⁰ “Pathal kalev' Mardel pa m'ei a unian, kavrav'a ml arna nut a Isrel, sena ti m'ertu udlani la avrn ti apavrp Mardel pa ra atvram'a sarei.”

²¹ Sarei, ithal kalev' mardel pa m'ei a unian kavrahau arna nut a Isrel.

²² V'eti naran irn ti Akileias iv'i mlin lil a Sutia kaua m'lnen a tetian, iv'i a Erut, a Susev' idedrn a ti ipav'a atlera. Naran im'atr, ila ti Atua iv'ana m'ei, laha, iruh kadav'a arna nut a Kalili.

²³ Kadav'a kalak arna v'anu iamk iv'i Nasaret, a ti sei pruvet atvvrp'ep'a sarei, ipama katu hin, ivr ti a, “Apavr ti iv'i dui a Nasaret.”