Matiu 10 - V'nen P'as iv'i Turanien Trtarep' m'a Turanien M'dah

A Iesu itap'er m'ertuan inal lman iru (12)

¹ Laha, a Iesu iv'ara anr m'ertuan arnal lman iru apavrama asnn, katu nut hua anr a ti apavsran m'im'iln stu, kavmhmah a m'ertu arna m'etienar udlani m'a si udlani ianr.

² Nahar apusel arnal lman iru (12) hilaha. Nki itauamu iv'i a Saimun, avr ti iv'i a P'ita, m'ei Adru, iv'i tv'aln, a Sim'is, iv'i a natn a Sep'eti, m'ei a Sun, iv'i tv'aln,

³ A P'iliv', a Patulumiu, a Tumas, a Matiu, iv'i dui na takis, a Sim'is, iv'i a natn Alvias, m'ei a Lep'ias, tv'el nahan iv'i a Tatias,

⁴ A Saimun, iv'i dui na pati, m'ei a Sutas Iskariut, la itau a Iesu al lm'ar m'ertu avlep'lei ha.

⁵ Hir arnal lman iru a Iesu itap'er, katu v'nen anr, kavr ti a, “Mavrav'a arna navanel iv'a asnr v'anudl, v'aha arna v'anu lil kinkin iter a Sameria.

⁶ V'eti pavrav'a uaki asnr sivsiv avmln avv'i nl nam'el a Isrel.

⁷ Naran pavrav'a, pavvrp'ep'a v'nen p'as kavvr ti a, ‘V'anu eia itmima.’

⁸ Pavmhmah a m'ertu im'at, kavmhmah a m'ertu lep'ersi iuei kavani ti m'ertu itam'a sarei, ipathal ml, kavsran m'im'iln stu. Kam'i ktvlev' vn sarei a nut hua lera, sena si lera, pavtuvn a m'ertu uraur.

⁹ Mavua nav'et kinkin iv'i kul, v'aha silva v'aha nav'et v'il al pahusam'i.

¹⁰ Mavua natenam'i arna navanel, v'aha tv'el klusam'i, v'aha sus, v'aha napilakt, sena ti iviviln a ti apamsnen dui na m'akarien.

¹¹ Naran pavrav'a arna v'anu lil kinkin v'aha v'anu pa kinkin, pavtala a m'ertu kinkin iviviln a ti pavlak asnn, kavlak atlera ipaier naran pavln nut lera.

¹² Naran pavrav'a al nmah kinkin, pavvr ip'as anr.

¹³ Ipavr ti m'ertu avlak al nmah nen avviviln, pam'ahu a ti tamatam'i ipama kadater aranar. V'eti ipavr ti ihei, pavlev'm'alet a tamatam'i ipama ml asnm'i.

¹⁴ Ipavr ti m'ertu kinkin akavlev' kam'i v'aha akavv'rn a v'nenam'i, pavruh al nmah m'a v'anu lera, kavninuan neiev' na tlm'i.

¹⁵ Nvrdaui, nvr a kam'i, arna napn lil Atua ipav'ana hua m'er m'ertu udlani, hin iputakm a m'ertu na v'anu lera ipalil mau kasiv' a Satam m'ei a Kamara.

Apavtp'ev' m'ertuan a Iesu

¹⁶ Pavrni, kana ntep'a kam'i kvnep'a sivsiv avrav'a a p't nut nar lip'ah didi. Sena si lera, kam'i pavrndu sei ipanep'a nmat, kavlak ms ipanep'a navimar ikautakm a si kinkin.

¹⁷ V'eti kam'i pavv'ah kam'i sena m'ertu, sena ti apavtu kam'i arna Kaunsel, kavrp kam'i a nahau al nmah tamatar.

¹⁸ Apavlev' kam'i pavp'tir arna nah kavman m'er mlin lilil sena Kana, a ti pavvrp'ep'a v'nenak arna nahr m'a nahr v'anudl.

¹⁹ V'eti naran apavtu kam'i al lm'ar, mavv'ahur ti pavv'ana ipanap'i kavvr v'ata. Sena ti arna naran nen Atua ipavr kam'i sei pavvri.

²⁰ Sena ti ikav'i kam'i pavv'ana, v'eti M'im'iln a Tetiam'i, hin ipav'ana, kani ti kam'i pavv'i drln.

²¹ Laha, tv'aln ipatu tv'aln al lm'a m'ertu a ti apavrpep'ni, tatei kinkin ipatau a natn, mardel apavp'tir kavmlen a tetiar m'ei a uniar, kavani ti aparpep'nr.

²² Laha, m'ertu udlani apavlep'la kam'i sena nahak, v'eti m'ertu ipap'tir dav'a ipaier naran ipahiris, Atua ipalev'lei.

²³ V'eti naran apavtp'ev' kam'i arna v'anu iamk, pavruh kavrav'a arna v'anu uraur, sena ti nvrdaui nvr a kam'i, mkdavhiris a v'anu udlani a Isrel ipaier naran Kana, nv'i Net M'ertu, p'ama ml.

²⁴ M'ertu ialil kasiv' tisan, v'aha m'ertu na m'akarien ialil kasiv' mlinan.

²⁵ Iviviln a ti m'ertu ipanep'a tisan uaki, v'aha a ti m'ertu na m'akarien ipanep'a mlinan uaki. Ipavr ti atsip'len sera mlin na nmah, kavr ti iv'i Pielsipap, iv'i mlinar m'im'iln stu, apasip'len m'ertuan ipalil mau.

A Iesu iv'iv'en ti p'vdedrn an Atua

²⁶ Sena si lera, mavdedrn anr, sena ti si udlani atnpakar sarei apav'iv'ani, v'aha si udlani attutuan sarei, nelnal apavrndaui.

²⁷ Sei nvr a kam'i lihat, pavvri ren, v'aha sei ananau ani asn drlnam'i, pavvrp'ep'ei arna drl nmah.

²⁸ Kam'i mavdedrn a m'ertu avrpep'n p'ak natei uaki, v'eti akavrpep'n m'im'il natei, v'eti ip'as a ti pavdedrn a Hin la irndu ti iputakm a m'im'il natei m'a p'ak natei al nep'v'en ha.

²⁹ Aulul a m'anh papa iru arna nav'et iamk uaki, v'eti nki ikahmk ikahrs a nadep', ipavr ti a Tetiam'i iam'ahu ani.

³⁰ V'eti Atua itspan sera nil ptm'i udlani.

³¹ Kam'i mavdedrn, sena ti kvlil mau kavsiv' m'anh papa istudau.

Pavvrp'ep'a nahan a Kristu arna nah nelnal

³² Sena si lera, ipavr ti m'ertu kinkin ipavrp'ep'a Kana arna nah m'ertu, Kana p'evrp'ep'a nahan arna nahn a Tetiak ilak eia.

³³ V'eti ipavr ti m'ertu kinkin ipap'ep'n nahak arna nah m'ertu, Kana p'ep'ep'n nahan arna nahn a Tetiak ilak eia.

A Kristu itupr m'ertu

³⁴ Mavv'ah ti nma a ti p'euirma tamat arna nadep'. Kana nahma a ti p'euirma tamat, v'eti tali lil.

³⁵ Sena ti Kana nma a ti dui ipamlen a tetian, a natn tav'et ipamlen a unian, tav'et ipamlen a rinan.

³⁶ M'ertu apavlak al nmah ipamk apavmlmlen hir.

³⁷ M'ertu ilap'as an a tetian v'aha a unian isiv' Kana, iaviviln a ti ipav'i m'ertuak. M'ertu ilap'as an a natn dui v'aha a natn tav'et isiv' Kana, iaviviln a ti ipav'i m'ertuak.

³⁸ M'ertu ialev' su lamu nen kasapa Kana, iaviviln a ti ipav'i m'ertuak.

³⁹ M'ertu ipasla silv'ienan, silv'ienan ipamln, v'eti m'ertu silv'ienan imln sena Kana, hin ipapaslei.

Panikin na naui haha

⁴⁰ M'ertu ilev' kam'i kvrama al nmahan, ilev' Kana. M'ertu ilev' Kana, ilev' Hin la itep'a Kana ha.

⁴¹ M'ertu ilev' pruvet ima al nmahan sena ti iv'i pruvet, hin ipalev' uliena pruvet, v'aha m'ertu ipalev' m'ertu p'as sena ti iv'i m'ertu p'as, hin ipalev' uliena m'ertu p'as.

⁴² Ipavr ti m'ertu kinkin ipatu panikin na naui haha uaki a m'ertu pa lera ipamk, sena ti iv'i m'ertuak, nvrdaui, nvr a kam'i, Atua ipatu ulienan ani.”