Malakai 4 - V'nen P'as iv'i Turanien Trtarep' m'a Turanien M'dah

Napn lilan Atua

¹ A Mlin na m'rnur iv'ana, kavr ti a, “Sena ti, palei, napn ipama ra, nut ipav'en kanep'a sera nep'v'en lil ipamk. Laha, arm'ertu la avukl hir ha, aau, arm'ertu, la avan si stuet ha, apavv'i nina m'lih. Laha, napn, la itv'i ti ipama ha, ipav'i nap' ipakap'nr udlani. Uar nai ikahei ml sanar, rana nai ikahei ml sanar.

² V'eti Neiel, la p'kln iviviln ha, ipatpeia sanam'i, kam'i la kvdedrn a nahak ha. Nil heian ipani ti p'akm'i apavp'as ml. Laha, pavv'el kavrav'a av'aran kavrama kavmrmr kavnep'a sarar net pluk, la amsnanr al nmahar ha.

³ Arna napn a ti p'en si laha, kam'i pavpasr m'ertu na si stu, apavnep'a sera tih nap' a nv' nut auei na tlm'i.” A Mlin na m'rnur iv'ana, kavr si lera.

⁴ “Mavnapn a v'nen huan a Musis, iv'i m'ertu na m'akarienak. Nv'ana hua m'ei katu v'nen hua ani arna ptha a Hurep, sanar m'ertu udlani a Isrel, aau, v'nen hua lera, m'er sei nttu sarei, m'er v'nen hua uraur nttu sarei.

⁵ Pavlei, p'etap'ei a Ilaitsa, iv'i pruvet, ipama ipatauamu a napn lilan a Mlin Eia, la ipani ti m'ertu apavdedrnet ha.

⁶ Laha, hin ipavav nlr tatei, apavlap'as anr a natr, sarei kavav nlr mardel, apavlap'as anr a tetiar, imahei ti Kana p'ama karp nadep' ka m'a v'nen ipamk ipav'iv'en nl rerak.”