Mak 9 - V'nen P'as iv'i Turanien Trtarep' m'a Turanien M'dah

¹ Laha, ivr anr kavr ti a, “Nvrdaui, nvr a kam'i, kam'i kinkin kvlak atlaha hilaha, mkdavram'a ipatauamu a ti pavla ti v'anuan Atua ipama arna nut huan.”

P'akn a Iesu ima kuraur

² Dav'a napn ilm'sei iv'siau, a Iesu ilev' a P'ita, a Sim'is, m'ei a Sun, kav'av'ar kavrav'a eia arna ptha lil iamk, hir arv'a uaki avududl, kavla ti a Iesu p'akn ima kuraur arna nahr, kanep'a sera snu.

³ Laha, avla ti klusan ima ker katva istudau kanep'a sera snu. M'ertu ihei arna nadep' irndu ti ipan kaliku ipatva ipanap'ei.

⁴ Laha, avlar a Ilaitsa m'ei a Musis arv'ana m'ei a Iesu.

⁵ Laha, a P'ita ivr an a Iesu kavr ti a, “Tisa, nut nvlak atlaha ip'eset. P'vhl tvtv ipatl, nkam ipamk, nkan a Musis ipamk, nkan a Ilaitsa ipamk.”

⁶ Ivr si lera sena ti iarndu sei ipavri, sena ti avrdus nlr ani.

⁷ Sarei, p'knaran tva iamk ima katukarr, avrn nadl iaan al p'knaran lera kavr ti a, “Dui lera iv'i a Natk dau, pavv'rn ani pr.”

⁸ Iv'amk m'a ti avklau ispat, v'eti ahavla m'ertu kinkin ml, a Iesu uaki ilak m'er.

⁹ Naran avv'el kavsasr arna ptha, a Iesu ivr anr ihua a ti amavvrp'ep'a si udlani atvla sarei asnr m'ertu kinkin, dav'a dav'a ipaier naran Hin a Iesu, iv'i Net M'ertu ipathal ml arna m'ien.

¹⁰ Laha, avsapa v'nen lera, kavvrvr a hir kavvr ti a, “?Inap'i hin ivr ti ipathal ml arna m'ien?”

¹¹ Sarei, avmiman ani kavvr ti a, “?Inap'i hin tisa na v'nen hua avvr ti a Ilaitsa ipama pr ipatauamu?”

¹² Ivrpranr kavr ti a, “Aau, a Ilaitsa ikama pr iktauamu a ti ipamhmah a si udlani ipap'as ml. ?V'eti inap'i hin Paivul ivr ti der ipastudau ipaier Kana, nv'i Net M'ertu, kavr ti apasip'len Kana inep'a ti nv'i si kaka uaki?

¹³ V'eti Kana nvr a kam'i, a Ilaitsa itama sarei. M'ertu avan sei avrni uaki ani, inep'a nut Paivul ivri inap'ei.”

A Iesu ien mamh dui pa iamk m'im'iln stu iuei

¹⁴ Naran im'alet ml asnr m'ertuan udlani, ila ti m'ertu avstudau avlaktalu anr, tisa na v'nen hua avv'lv'al m'er.

¹⁵ Ilahml sarei, naran nelnal avlei a Iesu, avtah ihuadau kavvrvr, kavrama asnn kavvr ip'as ani.

¹⁶ Laha, imiman anr tisa na v'nen hua kavr ti a, “?Kvv'lv'al kavvrur v'ata m'er?”

¹⁷ Laha, hir kinkin iamk asnr nelnal ivrprani, kavr ti a, “Tisa, nuirma a natk dui asnm, sena ti m'im'iln stu iamk ilak a nln kani ti iv'i napt.

¹⁸ Arna nut udlani m'im'iln stu iani, iuadei kasrani a nadep', kani ti ui dav'n irarev', ihaha lun, p'akn itetaprn. Kana ntmiman sera m'ertuam a ti apavsrani, v'eti ahavrndu ti apavani.”

¹⁹ Ivrprani, kavr ti a, “U, kam'i kvsilv' hilaha, v'ahien p'asam'i ihei. ?Kana p'elak m'a kam'i ipaier v'aran? ?Kana p'ern istu sena kam'i ipaier v'aran? Pavuirma asnk.”

²⁰ Laha, avlav'i kavuirv'a asnn. V'eti iv'amk m'a ti ilei, m'im'iln stu lahara iani ti im'em'a kadars a nadep' kalilipar, ui dav'n irarev'.

²¹ Laha, a Iesu imiman an a tetian kavr ti a, “?Si lera iendinei v'aran?” Ivrprani, kavr ti a, “Naran iv'i mardel uaki.

²² Israni al nep'v'en iel, kasrani al nauei a ti iputakm ani, v'eti ipavr ti Nakm krndu ti pan si kinkin, parn istu a kam'em', kamhmah a kam'em'.”

²³ A Iesu ivr ani, kavr ti a, “Ipavr ti nakm krndu ti pav'ah Kana, nvr anh, m'ertu avv'ah Kana avrndu ti apavan si udlani.”

²⁴ Iv'amk m'a ti ivr si lera, a tetia mardel iv'ara eia katakal kavr ti a, “Kana nv'ahah, v'eti Mlin, v'ahienak iahua. Nakm pani ti ipahua.”

²⁵ Naran a Iesu ila ti m'ertu avstudau avvrvr kavp'lt atlera, iv'ana hua m'a m'im'iln stu lahara, kavr ti a, “Nakm, kv'i m'im'iln stu kani ti m'ertu iv'i napt, drlnan iprs, Kana nvr anh, paruh a nln aulera, mam'alet ml a nln naran kinkin.”

²⁶ Laha, m'im'iln lahara iv'ara eia kani ti dui lera im'em'a istudau, karuh a nln. Laha, aulera inep'a ti itam'a sarei. Sena si lera nelnal avvr ti a, “Itam'a.”

²⁷ V'eti a Iesu iuada lm'an, kaualei ithal ml.

²⁸ Sarei, naran a Iesu iv'a al nmah, arm'ertuan avududl uaki kavmiman ani kavvr ti a, “?Inap'i hin kam'em' navrndu ti p'vani ti m'im'iln stu iparuh?”

²⁹ Ivrpranr kavr ti a, “Akasran m'im'iln stu iknap'i lera ipavr ti ahaln tim'ah katu tamat sanan.”

A Iesu ivri ml a ti ipam'a kathal ml

³⁰ Sarei, avln nut lera kavv'el kavtpeia arna nut a Kalili, v'eti a Iesu iarn ti m'ertu apavrndu nut ilak.

³¹ Sena ti iv'iv'en sei anr arm'ertuan kavr ti a, “Apatu Kana, nv'i Net M'ertu al lm'ar m'ertu apavrpep'n Kana. Apavrpep'n Kana, sarei, p'ethal ml arna nitla napn.”

³² V'eti ahavrndu sei ivri, kavdedrn a ti apavmiman sei ani.

?Hin ak ilil mau?

³³ Dav'a avier a Kapaniam. Naran avlak al nmah, imiman anr kavr ti a, “?Kvv'lv'al a v'ata arna navanel?”

³⁴ V'eti hir avp'n hir uaki, sena ti arna navanel avv'lv'al kavvrur ti hin ak ilil aranar.

³⁵ Laha, ilak kav'ara anr m'ertuan arnal lman iru (12) kavr ti a, “Ipavr ti m'ertu kinkin irn ti ipalil aranar tv'aln, ipan hin kasusupa kav'i m'ertu na m'akarienar nelnal.”

³⁶ Laha, ilev' mardel iamk kataui ip'tir a p't nut nar, sarei karmani kavr anr kavr ti a,

³⁷ “Ipavr ti m'ertu kinkin ipalev' mardel ipanap'i laha kamhmah ani arna nahak, inep'a ti ilev' Kana. Mertu ilev' Kana, ialev' Kana uaki, v'eti ilev' Hin la itep'a Kana ha.”

M'ertu iamlen nakd ilak m'a nakd

³⁸ Sarei, a Sun ivr ani, kavr ti a, “Tisa, nvla m'ertu iamk, la iasapa nakd ha, isran m'im'iln stu arna naham, v'eti nvvrkari sena ti iasapa nakd.”

³⁹ V'eti a Iesu ivr ti a, “Mavvrkari, sena ti ipavr ti m'ertu ipan pari lil kinkin arna nahak, ikasip'len Kana iklahml.

⁴⁰ Sena ti m'ertu iamlen nakd ilak m'a nakd.

⁴¹ Sena ti nvrdaui, nvr a kam'i, Ipavr ti m'ertu kinkin ipatu kam'i panikin na nauei arna nahak a ti pavm'ni, sena ti kvv'i m'ertuan a Kristu, nvrdaui nvr a kam'i, Atua ipalev' ulien nen katau ani sanan.

Si udlani la iani ti m'ertu ipars kan si stu ha

⁴² V'aha, ipavr ti m'ertu kinkin ipani ti mardel kinkin inap'i laha, la iv'ah Kana ha, ipars kan si stu, ip'as mau a ti apahuda nav'et lil arna natavna m'ertu nen kasrani al nata.

⁴³ V'aha ipavr ti lm'am ipani ti nakm pan si stu, patrusi. Ip'as mau a ti palev' silv'ien p'as kav'i lm'amk isiv' ti pav'a al nep'v'en m'a lm'am iparu, iv'i nep'v'en ikahiris naran.

⁴⁴ Arna nut lera ptpat la avhan m'ertu ha akavram'a, nep'v'en ikahm't.

⁴⁵ V'aha ipavr ti tlm ipani ti pan si stu, patrusi. Ip'as mau a ti palev' silv'ien p'as kav'i tlamk uaki, isiv' ti apasranh al nep'v'en m'a tlm iparu, iv'i nep'v'en ikahm't naran kinkin.

⁴⁶ Arna nut lera ptpat la avhan m'ertu ha akavram'a, nep'v'en ikahm't.

⁴⁷ V'aha, ipavr ti m'atam ipani ti pan si stu, palev'lei. Ip'as mau a ti pav'a arna v'anuan Atua kav'i m'etamk uaki isiv' ti apasranh al nep'v'en m'a m'atam iparu.

⁴⁸ Arna nut lera ptpat la avhan m'ertu ha akavram'a, nep'v'en ikahm't.

⁴⁹ Sena ti nep'v'en ipamhmah a m'ertu udlani, si slm udlani atrp'ni katau an Atua apamhmah ani a sul.

⁵⁰ Sul ip'as. ?V'eti ipavr ti ialalm ml, pavani ti ipalalm ml ipanap'i? Sul ikter pr a nlm'i. Kam'i pavlak arna tamat m'a kam'i.”