Mak 8 - V'nen P'as iv'i Turanien Trtarep' m'a Turanien M'dah

A Iesu imsnen m'ertu avv'i tausen iv'a (4,000)

¹ Arna naran lera, nelnal istudau avp'lt, tim'ah nar ihei, laha, a Iesu iv'ara anr m'ertuan a ti apavrama asnn, kavr anr kavr ti a,

² “Nrn istu anr m'ertu udlani avp'lt atlaha, sena ti atvlak sarei asnk napn itatl, v'eti tim'ah nar ihei.

³ V'eti ipavr ti p'etap'er apavrahau naran avrn nam'er, apavm'em'a arna navanel, sena ti hir kinkin avandan au.”

⁴ V'eti arm'ertuan avvrprani kavvr ti a, “?Apalev' p'ret ip'i arna nut kaka laha ipaviviln a ti hir udlani apavhani kavrapd?”

⁵ Laha, imiman anr kavr ti a, “?Kam'i p'ret iv'a iter asnm'i?” Avvr ti a, “Isaru.”

⁶ Sarei, itu v'nen a m'ertu udlani, kavr ti apavlak arna nadep', kalev' p'ret isaru lahara, kavr ip'as an Atua sanan, kakaususi katau anr m'ertuan a ti apavtutau anr m'ertu udlani, sarei, avtutau anr nelnal.

⁷ Tilu papa kinkin iak asnr, laha, a Iesu ivr ip'as an Atua sanan katu v'nen a ti apavtutau anr ml.

⁸ Laha, hir avhani kavrapd, sarei, arm'ertuan avlev' tk tim'ah iter kavnani ilin naten isaru ml.

⁹ M'ertu udlani avhani, ihih ti apavnelnal ipav'anal ipav'av'a (4,000), sarei, itap'er avrahau.

¹⁰ Ilahml sarei, iv'a al nauak ki iamk m'er m'ertuan kavrav'a arna nut iamk iv'i Talmanuta.

Arvarisi avmiman pari lil kinkin

¹¹ Arvarisi avrama asnn kavandinei kavmimani ti ipan pari lil kinkin ipandan arna nut eia.

¹² Laha, Hin im'im'in ihua arna nln sanan, kavr ti a, “?M'ertu avsilv' hilaha avrn ti apavla pari lil sena v'ata? Nvrdaui, nvr a kam'i, M'ertu avsilv' hilaha akavla pari lil kinkin.”

Pavv'ah kam'i sena iisar Varisi m'a iisan a Erut

¹³ Sarei, ilnr kadav'a arna nauak kav'el kadav'a a tv'eliel na naui lil.

¹⁴ V'eti arm'ertuan avvnapn a ti apavua p'ret. Nki iamk uaki iter asnr arna nauak.

¹⁵ Laha, itu v'nen anr, kavr ti a, “Pavv'ah kam'i sena iisar Varisi m'a iisan a Erut.”

¹⁶ V'eti hir avvrvr a hir kavvr ti a, “Ivr si lera sena ti p'ret ihei asnd.”

¹⁷ V'eti a Iesu irndu sei avvri, kavr anr kavr ti a, “?Inap'i hin kvvrur ti p'ret ihei asnm'i? ?Kdavla si kinkin, kdavrndu si kinkin? ?Nlm'i ihua uam?

¹⁸ ?M'etam'i iak, v'eti kaavla sei? ?Drlnam'i iak, v'eti kaavrn sei? ?Kvvnapn a si udlani?

¹⁹ ?Naran nkausus p'ret ilm' lahara sena m'ertu avv'i tausen ilm' (5,000) hara, kvnen naten iv'a ilini ml a tk p'ret?” Avvrprani kavvr ti a, “Inal lman iru.”

²⁰ “?V'aha naran nkausus p'ret isaru sena m'ertu avv'i tausen iv'a (4,000), kvnen naten iv'a ilini a tk p'ret?” Avvrprani kavvr ti a, “Isaru.”

²¹ Laha, ivr anr kavr ti a, “?Inap'i hin kaavrndaui?”

A Iesu ien mamh m'etapis iamk arna nut a Petsaita

²² Dav'a, iv'a a Petsaita. Laha, m'ertu kinkin avuirv'a dui iamk asnn, iv'i m'etapis, kavmiman ani ihua a ti ipaier p'akn.

²³ Laha, iuada lm'a dui iv'i m'etapis hara kav'av'ei karv'el karln v'anu lera katup'i arna m'aten, katu lm'an aranan kamiman ani, kavr ti a, “Kledu sei?”

²⁴ Laha, iledina sei kavr ti a, “Nlar m'ertu, v'eti nla ti avnep'a nai kavv'el.”

²⁵ Sarei, lm'an ml arna m'aten kani ti ip'a nut eia. Laha, m'aten ima kap'as kaledu mamh m'ertu udlani ml.

²⁶ Laha, a Iesu itap'ei ihau kavr ti a, “Mahv'a arna v'anu lil kavrp'ep'a si lera anr m'ertu kinkin arna v'anu.”

A P'ita ivrp'ep'a ti a Iesu iv'i a Kristu

²⁷ Sarei, a Iesu avv'el m'er arm'ertuan kavrav'a arna v'anu iter a Sisaria Vilipai. Naran avsapa navanel, imiman anr arm'ertuan kavr ti a, “?M'ertu avvr ti Kana nv'i a hin ak?”

²⁸ Avvrprani kavvr ti a, “A Sun Paptais, v'eti m'ertu kinkin avvr ti kv'i a Ilaitsa. M'ertu uraur ml avvr ti kv'i pruvet ki iamk.”

²⁹ V'eti a Iesu ivr anr kavr ti a, “V'eti kam'i kvv'ah ti Kana nv'i ak?” A P'ita ivrprani, kavr ti a. “Nakm kv'i a Kristu.”

³⁰ Laha, a Iesu itu v'nen anr kavr ti amavvrp'ep'ei a m'ertu kinkin.

A Iesu ivrp'ep'a ti ipam'a kathal ml

³¹ Laha, iv'iv'en sei anr kavr ti a, “Kana, nv'i Net M'ertu, der ipastudau ipaier Kana. Eltar m'ertu a Isrel m'er arpris lil m'er tisa na v'nen hua apavsran Kana kavrpep'n Kana, v'eti p'ethal ml arna m'ien arna nitla napn.”

³² V'nen lera a Iesu iv'iv'en anr, iatutuani. Laha, a P'ita ilav'i kav'ana hua m'ei.

³³ V'eti a Iesu ivav Hin kap'a m'ertuan kav'ana hua m'ei a P'ita kavr ti a, “Sitan, paruh asnk, sena ti v'ahienam iav'i v'ahienan Atua, v'eti v'ahienar m'ertu uaki.”

M'ertuan a Iesu ikua su lamu nen pr kasapei

³⁴ Sarei, iv'ara a nelnal m'er m'ertuan kavr anr kavr ti a, “Ipavr ti m'ertu kinkin irn ti ipasapa Kana, ikvnapn a hin pr kaua su lamu nen kasapa Kana.

³⁵ Sena ti ipavr ti m'ertu kinkin irn ti ipauada silv'ienan, silv'ienan ipamln, v'eti ipavr ti m'ertu kinkin ipam'a sena Kana m'a v'nen p'as, hin ipalev' silv'ien dau.

³⁶ ?Sena ti ipavr ti m'ertu ipalev' si udlani iter arna nadep', v'eti silv'ienan ipamln, hin ipalev' v'ata?

³⁷ ?V'aha m'ertu ipalev' v'ata kul a silv'ienan?

³⁸ M'ertu avsilv' hilaha avruh asn a Mlin Eia, kavnep'a m'ertu avv'nah tav'et v'aha dui, kavv'i m'ertu stu istudau. Ipavr ti m'ertu kinkin ipap'ep'n Kana m'a v'nenak asnr, Kana, nv'i M'ertu, p'ep'ep'ni, naran p'ama ml m'er ensel p'as arna si p'sp'asan a Tetiak.”