Mak 7 - V'nen P'as iv'i Turanien Trtarep' m'a Turanien M'dah

Si stu udlani iaan al v'ahiena m'ertu

¹ Laha, arvarisi avp'lt kavrama asnn m'er tisa na v'nen hua kinkin, avandan a Serusalem,

² kavla ti m'ertuan kinkin avhan p'ret, v'eti ahavsisil, kavvr ti avan si stu.

³ Sena ti arvarisi m'er m'ertu a Isrel udlani ahavhan tim'ah, ipavr ti ahavsila lm'ar ipastudau, sena ti avuada p'klr a tetiar udlani tituei ihua.

⁴ Naran avandan a nut aulul a sei nakl, ipavr ti ahavsisil ipatauamu, akavhatat, kavsapa p'klr uraur istudau la a tetiar atvv'iv'en sarei anr ha, inep'a ti akvsila panikin, ssv'en, aian dis lil m'a tiv' pr.

⁵ Laha, arvarisi m'er tisa na v'nen hua avmiman ani kavvr ti a, “?Inap'i hin arm'ertuam ahavsapa p'klr a tetiad udlani, sena ti ahavsila lm'ar kavhatat?”

⁶ Hin ivrpranr kavr ti a, “Aisaia itvrp'ep'a sera v'nenan Atua itviviln kavrur kam'i ti kvv'i m'ertu kvp'ip'en lamuru, kavri arna Paivul, kavr ti a, ‘M'ertu udlani laha avpata Kana arna pnr, v'eti ahavv'ahur Kana arna nlr.

⁷ Avpata Kana, v'eti iv'i si vn uaki, kavvr ti v'nen huar m'ertu iv'i v'nenan Atua.’

⁸ Kam'i kvsran v'nen huan Atua kavuada p'kl m'ertu uaki ihua, inep'a ti kvsila ssv'en m'a panikin kavan si nelnal uraur ml inap'i lera nakl.”

⁹ Laha, ivr anr ml kavr ti a, “Nsarei kvv'ah ti kvan si p'as, v'eti kvsran v'nen huan Atua a ti pavuada p'klm'i uaki,

¹⁰ Sena ti a Musis ivr ti a, ‘Pani ti nahar a tetiam m'ei a uniam ipav'a eia’, kavri ml kavr ti a, ‘M'ertu kinkin ipav'ana stu m'ei a tetian v'aha a unian, akrpep'ni pr sanan.’

¹¹ V'eti kam'i kvvr ti a, ‘Ipavr ti m'ertu kinkin ivr an a tetian m'ei a unian kavr ti a, “Sei nrn p'etau anh iv'i Kupan” (v'nen lera inep'a ti ivr ti a, si lera p'etau an Atua),’

¹² Sena si lera, kam'i kaavm'ahu a ti ipap'aur a tetian v'aha a unian ml.

¹³ Kam'i kvutakm a v'nenan Atua sena p'klm'i la kvuadei kavv'iv'ani ha, kavan si ururaur ml inap'i lera istudau.”

¹⁴ Laha, iv'ara anr m'ertu udlani avrama asnn, kavr anr kavr ti a, “Kam'i udlani pavv'rn a Kana kavrndu mamahi.

¹⁵ Si kinkin iaan av'aran iarndu ti ipani ti m'ertu ipastu, naran ipav'a a nln, v'eti sei uaki iaan a nl m'ertu iani ti istu.

¹⁶ Ipavr ti m'ertu kinkin drlnan iak, ipav'rn a Kana.”

¹⁷ Sarei, naran iv'a eim al nmah kaln nelnal av'aran, arm'ertuan avmiman v'nen la itsran sarei hara ani.

¹⁸ Laha, ivr anr kavr ti a, “?Inap'i hin kam'i kaavrndu si lera kavnep'a m'ertu uraur uaki? ?Kaavla ti si udlani iaan av'aran kadav'a a nl m'ertu ikaani ti ipastu?

¹⁹ Sena ti iahv'a al v'ahienan, v'eti al v'atn sarei kadama ml aut, kani ti tim'ah udlani iviviln.”

²⁰ Kavri ml, kavr ti a, “Sei iaan a nl m'ertu, iani ti istu.

²¹ Sena ti si stu iaan a nln, arna v'ahiena m'ertu. Sena si lera, m'ertu avv'ah si stu kavv'nah tav'et v'aha dui, kavan si stu m'a vitar, kavrp m'ertu,

²² Kavv'nah sei, kavrn sia tv'alr, kavan si stu lil, kavhap'il, ahavmamih a ti apavan si stu kinkin, nlr ipr tv'alr, avlsls, kavukl hir, ptr ihei.

²³ Si stu udlani lera iaan al v'ahiena m'ertu kani ti iv'i m'ertu stu.”

V'anudl iamk iv'iv'en v'ahien p'asan

²⁴ Laha, a Iesu iln nut lera kadav'a asn nut a Taia m'ei a Saitun, kadav'a al nmah iamk. Iarn ti m'ertu kinkin apavrndaui, v'eti iarndu ti ipatutuah anr.

²⁵ Sena ti tav'et iamk, m'im'iln stu ilak a nln a natn tav'et pa, irn ti avrur a Iesu nakl, kadama kasisihpu asn tln.

²⁶ Tav'et nen iv'i tav'et a Sairuvunisia kav'ana arna v'nen a Kris. Hin imimani ihua a ti ipatp'ev' m'im'iln stu aranan a natn tav'et.

²⁷ V'eti a Iesu ivr ani, kavr ti a, “Iviviln a ti mardel apavhatat ipatauamu kavrapd, sena ti iap'as a ti p'vlev' p'ret nar mardel kavsrani asn lip'ah.”

²⁸ V'eti hin ivrprani, kavr ti a, “Aau, Mlin. V'eti lip'ah avlak a nv' tiv' avrndu ti apavhan tk p'ret nar mardel la irsrs ha.”

²⁹ Laha, a Iesu ivr ani, kavr ti a, “Sena ti kvr v'nen lera, pahau a utam. A natm tav'et m'im'iln stu itruh sarei a nln.”

³⁰ Laha, ihau a utan kala ti a natn tav'et im'atr arna pas, m'im'iln stu itruh.

A Iesu ien mamh dui iamk iv'i napt, kav'i dui ikav'ana mamh

³¹ Sarei, a Iesu iln nut a Taia m'ei a Saitun kav'el dav'a katpeia arna nut iamk nahan iv'i a Tikapulis, kav'el kaier asn naui lil a Kalili.

³² Laha, avuirv'a dui iamk asnn iv'i napt kav'i dui ikav'ana mamh, kavmiman ani a ti ipatu lm'an aranan.

³³ Laha, a Iesu ilev'la dui lera asnr nelnal, karlak a nut iamk, katu nirh lm'an iv'a al drlna dui lera, katup'i arna lm'an kaier nm' dui nen,

³⁴ Kap'a nut eia kam'im'in ihua kavr ani, kavr ti a, “Evata.” V'nen lera inep'a ti ivr ti a, “Paielah.”

³⁵ Laha, iv'amk m'a ti drlnan ip'ra, nm'n iahdv ml, iv'ana ip'as.

³⁶ Laha, ivrkarr a ti amavvrp'ep'a si lera a m'ertu kinkin ipamk, v'eti naran Hin ivrkarr mau, hir avvrp'ep'a si lera mau.

³⁷ Laha, avtah ani ihuadau kavvrvr a hir kavvr ti a, “Hin si udlani iani, iani ip'as istudau. Iani ti m'ertu avprpar apavrn sei ml, kani ti napt apavv'ana dau ml.”