Mak 6 - V'nen P'as iv'i Turanien Trtarep' m'a Turanien M'dah

M'ertu a Nasaret ahavrn ti apavsapei a Iesu

¹ Laha, Hin iln nut lera kadav'a arna v'anuan, m'ertuan avsapei.

² Naran Sapat ima, ivrp'ep'a v'nen p'as al nmah tamat. Naran nelnal avrni, avtah ani istudau kavvr ti a, “?Aulera irndu sei ip'i? ?Inap'i hin irndu si p'as la ivrp'ep'ei ra, kan pari lilil inap'i lera?

³ ?Nsarei Aulera iv'i Dui ihl nmah nakl kav'i a natn a Meri, kav'i titiamu nar a Sim'is, a Susis, a Suta m'ei a Saimun? A v'nn avlak asnd etka, v'aha?” Avvri inap'i lera kavrnp'lei.

⁴ V'eti a Iesu ivr anr kavr ti a, “M'ertu avlak a nut uraur avrndu ti apavan naha pruvet ipav'a eia, v'eti m'ertu avlak arna v'anuan v'aha nl nam'elan v'aha eiman akavani.”

⁵ Iarndu ti ipan pari lilil arna nut lera, v'eti itu lm'an arna m'ertu si anr avdakr uaki kani ti avp'as ml.

⁶ Hin itah ihuadau sena ti ila ti ahavv'ahi, kav'el kunanut arna v'anu papa udlani kavrp'ep'a v'nen p'as.

A Iesu itep'adina m'ertuan inal lman iru (12)

⁷ Laha, iv'ara a m'ertuan inal lman iru (12) katep'adinar avv'el kavruru, sarei katu nut hua anr a ti apavsran m'im'iln stu.

⁸ Katu v'nen anr a ti amavua si kinkin arna navanel, v'eti apavua napilakt uaki, amavua naten v'aha p'ret v'aha nav'et al pahusar,

⁹ Apavpas susar v'eti amavua klusar iparu.

¹⁰ Kavr anr kavr ti a, “Naran pavrav'a al nmah ki ipamk, pavlak a nln dav'a ipaier naran pavln v'anu nen.

¹¹ Ipavr ti m'ertu kinkin ahavrn ti kam'i pavlak asnr v'aha ahavrn ti apavv'rn a v'nenam'i, pavln nut lera kavninuan neiev' na tlm'i, a ti ipav'iv'en si stuar anr. Nvrdaui, nvr a kam'i, arna napn lil la Atua ipav'ana hua m'er m'ertu udlani ha, Hin iputakm a m'ertu na v'anu lera ipastudau kasiv' a Satam m'ei a Kamara.”

¹² Sarei, avv'el kavrav'a kavvrp'ep'a ti m'ertu akvav nlr pr sena si stuar.

¹³ Kavsran m'im'iln stu avstudau, kavtu ueil aranar m'ertu avstudau sei ianr, kavmhmah anr.

Atrus ptn a Sun Paptais

¹⁴ Naran a mlin lil a Erut irn v'nen avruri, sena ti nahan iunakar nut, laha ivr ti a, “A Sun Paptais itthal ml arna m'ien. Sena si lera ien pari lilil lera.”

¹⁵ V'eti m'ertu uraur avvr ti a, “Iv'i a Ilaitsa,” v'eti m'ertu uraur ml avvr ti a, “Iv'i pruvet, v'aha inep'a pruvet.”

¹⁶ V'eti naran a Erut irni, ivr ti a, “Aulera iv'i a Sun lahara nttrus sera ptn hara. Hin itthal ml arna m'ien.”

¹⁷ Sena ti hin a Erut ittep'a sera m'rnuran a ti apavuadei a Sun kavtaui al p'resin, sanan a Erutias, iv'i a nau tv'aln, nahan iv'i a P'iliv', sena ti itualua sarei.

¹⁸ Sena ti a Sun itvr sarei an a Erut, kavr ti a, “Iaviviln arna v'nen huan Atua a ti pauei a nau tv'alm.”

¹⁹ Laha, a Erutias nln irer ani istudau karn ti iparpep'ni, v'eti iapasla navanel.

²⁰ Sena ti a Erut ila ti a Sun iv'i dui p'as iamk ien sei iviviln nakl, kadedrn ani, kap'aur mamahi. Naran irn v'nenan, ien si nelnal karn ip'as a v'nenan istudau.

²¹ Dav'a ier napn a Erutias ipasla navanel. Arna pnul nen a Erut, hin ien tim'ah lil kav'ara anr mlinan, dui lilil na m'rnuran m'er dui lilil na nut a Kalili.

²² Laha, a natn tav'etan a Erutias lahara ima eim kasilu kani ti a Erut m'er m'ertu avlak m'ei avrn ip'as ani. Sarei, a mlin ivr a tav'et lera, kavr ti a, “Pavr sei krni, kana p'etau anh.”

²³ Kah lm'an asnn, kavr ti a, “Si udlani parni, p'etau anh. Ipavr ti ipav'i pna v'anuak, p'etau anh.”

²⁴ Naran itvr sarei, tav'et iv'a asn a unian, kavr ani, kavr ti a, “?P'emiman v'ata ani?” Ivrprani, kavr ti a, “Ptn a Sun Paptais.”

²⁵ Tav'et lera iv'el ilalahml sarei kadav'a asn a mlin, kamiman ani, kavr ti a, “Nrn ti patu ptn a Sun Paptais al p'let ipalahml sarei katu kana.”

²⁶ V'nen lera iani ti a mlin irn istu ihuadau, v'eti iarn ti ipavr ti ikahei ani, sena ti itah sera lm'an arna nah nelnal avlak asnn.

²⁷ Iv'amk m'a ti ivri, a mlin itep'a m'rnuran a ti ipauirma ptn. Laha, iv'el kadav'a al p'resin katrus ptn.

²⁸ Kataui al p'let iamk kauirma asn tav'et lahara katau ani. Laha, tav'et itau an a unian.

²⁹ Naran m'ertuan avrn si lera, avrama kavlev' p'akn kavtaui al navap.

³⁰ Dav'a, apuselan a Iesu la ittep'a sarar itauamu ha, avm'alet ml kavp'lt asn a Iesu, kavvrur si udlani atvan sarei m'a v'nen udlani atvvrp'ep'a sarei.

³¹ Sarei, ivr anr kavr ti a, “Pavrama, p'vrav'a a nut m'ertu ihei, kavrnrn nakd ipasusupa.” Ivri, sena ti m'ertu istudau avsiv'siv' nut kavani ti naran apavhatat ihei.

³² Laha, hir uaki avududl avln nut lera arna nauak kavrav'a a nut kaka.

A Iesu imsnen m'ertu avv'i tausen ilm' (5,000)

³³ V'eti nelnal avla ti hir avln nut lera kavledu a Iesu, kavandan arna v'anu udlani kavvrvr kavsiv'r kavrama kavp'ltsrahi.

³⁴ Naran a Iesu ima aut, ila m'ertu istudau karn istu anr sena ti avnep'a sivsiv dui ipaurr ihei. Laha, iv'iv'endina sei istudau anr.

³⁵ Dav'a, naran ihih ti nut ipam't, arm'ertuan avrama asnn kavvr ti a, “Nut laha iv'i nut kaka. Itv'i ti nut ipam't.

³⁶ Patap'er apavrav'a arna nut imima atlaha, v'aha arna v'anu kinkin a ti apavul tim'ah nar, sena ti tim'ah nar ihei.”

³⁷ V'eti Hin ivrpranr kavr ti a, “Kam'i pavtu tim'ah anr.” Hir avvr ani kavvr ti a, “?Krn ti p'vrav'a kavsran 200,000 vatu kavul p'ret nar?”

³⁸ Hin ivr anr kavr ti a, “?Kam'i p'ret iv'a iak asnm'i? Pavrav'a kavlei.” Naran avrndaui, avvr ti a, “P'ret ilm' m'a tilau iru.”

³⁹ Laha, itu v'nen anr a ti apavani ti nelnal apavlakpipiani unanut arna nina p'as.

⁴⁰ Laha, avlakpiani, nki inelnal iv'amk (100) a nut iamk, nki inellm' (50) a nut uraur.

⁴¹ Naran itlev' sera p'ret ilm' m'a tilau iru lahara, ip'a nut eia kavr ip'as an Atua sanan kakausus p'ret katau anr m'ertuan a ti apavtutau anr, kakapapr tilau iru lahara katau anr m'ertu udlani.

⁴² Laha, hir udlani avhani kavrapd.

⁴³ Sarei, avnen naten inal lman iru ilini a tk p'ret m'a tilau.

⁴⁴ Dui udlani avhan p'ret avv'i tausen ilm' (5,000).

A Iesu iv'el arna nauei

⁴⁵ Ilahml sarei, iani arm'ertuan avrav'a al nauak a ti apavtauamu a tv'eliel, arna nut a Petsaita, sarei, itep'a m'ertu udlani avrahau.

⁴⁶ Naran itvr sera ip'as m'er, iln nut lera kadav'a eia arna ptha a ti ipatu tamat.

⁴⁷ Dav'a, naran nut itam't, nauak lahara ier a p't nut na naui lil, v'eti Hin iamk uaki kalak aut.

⁴⁸ Laha, a Iesu ila ti avparel ihua sena ti avnka nalen. Naran ihih ti nut iparen, Hin iv'el arna nauei kadav'a asnr, nut pa ti ipasiv'r.

⁴⁹ V'eti naran avla ti iv'el arna nauei, avv'ah ti iv'i tam'a kinkin kavvalau eia.

⁵⁰ Sena ti hir udlani avlei kavdedrn istudau. Iv'amk m'a ti iv'ana m'er kavr ti a, “Pavrn ipap'as. Kana uaki. Mavdedrn.”

⁵¹ Laha, iv'a asnr al nauak, sarei, nalen irs. Hir avtah istuduet, kavrdus nlr ani.

⁵² Sena ti ahavv'ahur pari lil iten sarei arna p'ret lahara, sena ti nlr ihua.

Nelnal avier p'akn a Iesu kavrama kavp'as ml

⁵³ Naran atvlu sera naui lil, avier v'anu a Kenesaret kavlsda nauak atlera.

⁵⁴ Laha, naran avandan al nauak kavrav'a aut, m'ertu avlei iv'amk kavledaui.

⁵⁵ Kavvrvr kavrav'a arna v'anu udlani imima atlera, kavpapdina m'ertu si ianr kavuirv'a a nut avrn ti a Iesu ilak.

⁵⁶ Laha, arna nut udlani Hin iv'a, a vtlim, v'aha nut lil, v'aha v'anu papa, avtu m'ertu si ianr a nut aulul a sei, kavmiman ani ihua a ti ipam'ahu a ti apavier pna klusan uaki, sarei, m'ertu udlani aviari, avrama kavp'as ml.