Mak 5 - V'nen P'as iv'i Turanien Trtarep' m'a Turanien M'dah

A Iesu isran m'im'iln stu

¹ Sarei, avrama kavier a tv'eliel na naui lil arna v'anuar m'ertu a Katara.

² Naran Hin iaan arna nauak kadama aut, iv'amk m'a ti dui iamk m'im'iln stu ilak a nln, iaan a nut atintin m'ertu kadama asnn.

³ Iel hin ilak al navap nakl a nut atintin m'ertu. M'ertu kinkin iahua a ti ipahudei, sen iahua.

⁴ Iel avhuda tln m'a lm'an a sen v'eti irv'i kardus sen arna lm'an kaldenusus sera sen arna tln. M'ertu kinkin iahua a ti ipani ipalak p'n.

⁵ Lihat m'a ren hin iv'ara eia iel arna ptha m'a nut atintin m'ertu kalev' nav'et katr a hin nakl.

⁶ V'eti naran ilei a Iesu idlak v'iv'a uam au, ivrvr kadama kasisihpu asnn,

⁷ Kav'ara eia kavr ti a, “Iesu, nakm kv'i a natn Atua ilil kalak eia. ?Kma a ti pan v'ata a kana? Nvr anh ihua arna nahan Atua, manp'ilen kana ipahuadau.”

⁸ Sena ti a Iesu ivr ani, kavr ti a, “!M'im'iln stu, paruh a nln!”

⁹ Laha, kamiman ani, kavr ti a, “?Naham iv'i ak?” Hin ivrprani, kavr ti a, “Nahak iv'i a Nelnal, sena ti nvstudau.”

¹⁰ V'eti aulera ivr ani ihua a ti imatp'av'r apavruh arna v'anu lera.

¹¹ Arna nut lera pua avstudau avhatat imima asn ptha iamk.

¹² M'im'iln stu udlani lahara avvr ani ihua kavvr ti a, “Patep'a kam'em' p'vrav'a asn pua lera a ti p'vlak a nlr”

¹³ Iv'amk m'a ti a Iesu im'ahu anr. Laha, m'im'iln stu lahara avruh a nln kavrav'a a nl pua udlani lera. Laha, pua lahara avvrvr kavsiris a p'ak ptha kavtpl udlani al naui lil. Pua lera udlani ihih tausen iru (2,000).

¹⁴ Laha, dui avp'aur pua lahara avruh kavrav'a a utar kavrav'a arna v'anu lilar kavvrp'ep'ei. Laha, m'ertu avrama kavla sei itu hin.

¹⁵ Kavrav'a asn a Iesu kavla ti aulera m'im'iln stu avlak a nln hara, ilak ms, kaua klusan. Ptn itp'as ml. Avla ti hin iv'i dui m'im'iln stu avstudau avlak a nln hara. Avtah ani kavdedrn istudau.

¹⁶ Laha, m'ertu atvla sera si lera avvrur anr v'ata itu hin asn dui m'im'iln stu ilak a nln, kavvrur pua lahara.

¹⁷ Sarei, hir avmimani ihua a ti iparuh arna v'anuar.

¹⁸ Naran a Iesu iv'a arna nauak, dui la m'im'iln stu avlak a nln hara, imiman ani ihua a ti ipasapei.

¹⁹ V'eti a Iesu iam'ahu ani kavr ani, kavr ti a, “Pahau asnr tv'alm kavrp'ep'a nut a Mlin Eia iten sera pari lil asnm inap'ei, kavrp'ep'a nut irn istu anh inap'ei.”

²⁰ Laha, iv'a arna nut kinkin iamk nahan iv'i a Tikapulis kavrp'ep'adina si lilil udlani a Iesu ien ani. Iani ti hir udlani avtah ani istudau.

A Iesu ien tav'et pa iamk isilv' ml, kan mamh tav'et iamk

²¹ Naran a Iesu ilu naui lil arna nauak kadamam'alet a tv'eliel, nelnal avstudau avrama asnn. Hin ip'tir mima asn p'ak naui lil.

²² Laha, pavrni, dui iamk, nahan iv'i a Sairus, iv'i dui lil na nmah tamat, ima kalei kasisihpu asn tln kaiaul.

²³ Kamiman ani ihua kavr ti a, “A natk tav'et pa itv'i ti ipam'a. Pama katu lm'am aranan a ti ipap'as ml kasilv'.”

²⁴ Ivr sarei, a Iesu isapei karv'el. Nelnal avstudau avsapei kavsinsinr kavsini.

²⁵ Laha, tav'et iamk, m'etiena tav'et iani din irarev' iel, dav'a pai inal lman iru, v'eti iahiris.

²⁶ Hin irn istu ihuadau kadav'a asn tukta avnelnal kahiris a nav'etan sanan, v'eti m'etien nen iahma kasusupa, v'eti ima kalildau mau.

²⁷ Naran irn v'nen ivrur a Iesu isapei m'er nelnal kaier klusan.

²⁸ Sena ti iv'hv'ahi a nln kav'ah ti a, “Imvr ti m'ier klusan uaki, m'ama kap'as ml.”

²⁹ Iv'amk m'a ti iari, din lahara irarev' ihiris, laha, hin irndaui arna p'akn a ti m'etienan ithiris.

³⁰ Iv'amk m'a ti a Iesu irndu ti nut huan ien sei, kavav hin ispat a p't nut nar kavr ti a, “?Hin ak ier klusak?”

³¹ V'eti arm'ertuan avvr ani kavvr ti a, “Kla ti nelnal udlani avsinsinh, v'eti inap'i hin kvr ti a, ‘?Hin ak ier Kana?’ ”

³² Laha, Hin itala ispat a ti ipala m'ertu ien si lera.

³³ V'eti tav'et lahara, la irndu sei itu hin aranan ha, idedrn kavrdedrn kadama kasisihpu kaiaul asnn, kavrp'ep'a nut sei itu hin aranan inap'ei.

³⁴ Laha, Hin ivr ani, kavr ti a, “Vnpak, v'ahienam iani kp'as ml. Pahau arna tamat, m'etienam ithiris.”

³⁵ Naran a Iesu idv'ana uam, m'ertu kinkin avandan al nmaha dui lil na nmah tamat hara kavvr ti a, “A natm tav'et itam'a sarei. ?Inap'i hin kutakm a Tisa lera ml?”

³⁶ Iv'amk m'a ti a Iesu irn v'nen avvri, ivr a dui ip'aur nmah tamat kavr ti a, “Madedrn, v'eti pav'ah Kana uaki.”

³⁷ Sarei, iam'ahu a ti nelnal apavsapei, v'eti a P'ita m'ei a Sim'is m'a tv'aln iv'i a Sun uaki.

³⁸ Laha, ima asn nmaha dui lahara ip'aur nmah tamat hara kala m'ertu avstudau avkakar kavvalau kavtakal istudau.

³⁹ Naran iv'a eim ivr anr kavr ti a, “?Kam'i kvkakar kavtakal sena v'ata? Mardel lera iahm'a, v'eti im'etrdul uaki.”

⁴⁰ V'eti hir avvtma kavsip'lani. V'eti itap'er avrav'a av'aran kalav'r a tetian m'ei a unia mardel lahara, m'er m'ertuan avsapei kavrav'a a nut mardel lera im'atr.

⁴¹ Kauada lm'a mardel kavr ani, kavr ti a, “Talita kumi,” V'nen lera avavi, ivr ti a, “Tav'et pa, nvr anh, pathal.”

⁴² Iv'amk m'a ti ivri, tav'et pa ithal kav'el kunanut. Hin paian inal lman iru. Laha, avtah kavrdus nlr ani.

⁴³ Laha, itu v'nen anr ihua a ti amavvrp'ep'a si lera a m'ertu kinkin kavr anr a ti apavtu tim'ah ani.