Mak 4 - V'nen P'as iv'i Turanien Trtarep' m'a Turanien M'dah

A Iesu isran v'nen ivrur dui isran m'et na sei

¹ Naran uraur a Iesu iv'iv'endina sei a p'ak naui lil. M'ertu avstudau avp'lt asnn arna nut lera, iani ti Hin iv'a al nauak kalak a nln al naui lil. M'ertu udlani avlak aut a p'ak nauei.

² Hin isran v'nen istudau kav'iv'en si laha anr, kavr ti a,

³ “Pavrn mamahi, dui iamk iv'a a ti ipasran m'et na sei al pitvet.

⁴ Israni dav'a, nki irs a p'ak navanel. Itauatah, m'anh kinkin avrama kavtpi.

⁵ Nki irs arna nadep', a nut nav'et iter, nut nen nadep' ialil. Laha, ispal ilahml kadav'a eia, sena ti nadep' ialil.

⁶ Naran neiel ima eia kanes m'et na sei lahara, im'aran, sena ti uarn ihei.

⁷ Nki irs arna nut makau lun iak iter. Laha, makau nen ilil kaharev'kari kani ti navan ihei.

⁸ V'eti nki irs arna nadep' p'as, kasilv' kadama kalil, katu navan, nki navan ineltl (30), nki inellm'sei (60), nki inelnal iv'amk.”

⁹ Sarei, ivr anr kavr ti a, “M'ertu drlnan iak a ti iparn sei, ipav'rn ani.”

?A Iesu isran v'nen sena v'ata?

¹⁰ Naran nelnal atvruh sarei, m'ertu kinkin advlaktalu ani uam m'er m'ertuan inal lman iru (12) kavmiman ani a ti ipavrur mamh v'nen itsran sarei.

¹¹ Hin ivr anr kavr ti a, “Atua ittu sarei a kam'i a ti kam'i pavrndu v'nen tutuah ivrur v'anuan Atua. V'eti m'ertu avlak av'aran nsran v'nen uaki asnr,

¹² Sena ti ‘apavla sei v'eti akavledaui, kavrn sei v'eti akavrndaui, imahei apavvav nlr a ti Atua ipalev'la si stuar.’ ”

A Iesu iv'iv'en v'nen israni ivrur dui isran m'et na sei

¹³ Laha, ivr anr kavr ti a, “?Kam'i kaavrndu v'nen la nsrani hara? Pavrndu v'nen uraur nsrani ipanap'i?

¹⁴ Dui lahara isran m'et na sei inep'a dui ivrp'ep'a v'nen p'as.

¹⁵ M'ertu kinkin avnep'a m'et na sei irs a p'ak navanel. Naran avrn v'nen p'as a nut avrp'ep'ei, iv'amk m'a ti a Sitan ima kalev'la v'nen iter a nlr.

¹⁶ V'eti m'ertu uraur avnep'a m'et na sei irs arna nadep' nav'et iak, kavrn v'nen kavrn ip'as ani ilahml.

¹⁷ V'eti uarn ihei a nlr. Avp'tir isusupa, v'eti itauatah, naran der iarr, v'aha m'ertu kinkin avtp'av'r sena v'nen p'as, avrars ilahml.

¹⁸ M'ertu uraur avnep'a m'et na sei irs a nadep' a nut makau lun iak iter. Hir avrn v'nen pas.

¹⁹ V'eti kavv'ahur sei a nadep' istudau, pari na nav'et isnarr, kavrn nam'er a si uraur ml dav'a ti v'nen pas iasilv' ml a nlr, navan ihei.

²⁰ V'eti m'ertu uraur avnep'a m'et na sei asrani arna nadep' p'as. Hir avrn v'nen pas kavuadei. Navar iak, nki ineltl (30), nki inellm'sei (60), nki inelnal iv'amk.”

?Apatu lait a nv' pakit?

²¹ Laha, ivr anr ml kavr ti a, “?Alev' lait kataui a nv' pakit v'aha a nv' nipal? Ikahei. Aktaui eia pr arna m'lnen.

²² Sena ti si udlani itutuah ipater a nut m'auar, m'a sei atutuani aparndu udlani.

²³ M'ertu drlnan iak, ipav'rn mamh a si lera.”

²⁴ Hin ivr anr ml kavr ti a, “Pavv'ahur mamh sei kvrni. Ipavr ti pavv'rn a sei ipasusupa, pavrndu sei ipasusupa uaki, v'eti ipavr ti pavv'rn mamh a sei, pavrndu sei ipalil.

²⁵ Sena ti m'ertu iuada v'nenak, Atua ipatu sei mau ani, v'eti m'ertu iauadei, Atua ipalev'la sei iak ani asnn.”

A Iesu isran v'nen ivrur nut m'et na sei isi inap'ei

²⁶ Laha, ivr anr kavr ti a, “V'anuan Atua inep'a dui isran m'et na sei arna nadep',

²⁷ Kam'atr kathal ml napn iv'sv'siau dav'a, m'et na sei ispal kasilv' Kalil, v'eti hin iarndu nut inap'ei.

²⁸ Nadep' uaki iani ti m'et na sei ispal, raun itauamu, ni nen isapei, sarei navan iak.

²⁹ V'eti naran navan itarep' kam'am'd, ilalahml sarei iv'a katr udlani a tali lil, sena ti iv'i naran na ti apatri.”

A Iesu isran v'nen ivrur m'et na m'adak varavar

³⁰ Laha, ivri ml kavr ti a, “?V'anuan Atua inap'i? ?P'vsran v'nen v'ata ipavruri?

³¹ V'anuan Atua inep'a sera nava m'adak varavar. Naran asrani arna nadep' m'at nen isusupadau kasiv' m'et na nava nai udlani arna nadep'.

³² V'eti naran irs kadasi dav'a ilil kasiv' nai udlani, katu ranan istustudau a ti m'anh ipauv' aranan.”

A Iesu isran v'nen uaki a ti ipav'iv'en sei anr m'ertu unanut

³³ A Iesu isran v'nen inelnal asnr inap'i lera, inep'a ti apavrndaui.

³⁴ Naran ivrp'ep'a v'nen p'as, isran v'nen uaki nakl asnr, v'eti naran avlak kavududl m'er arm'ertuan iv'iv'en mamh si udlani anr.

Nalen m'a naui lil arsapa v'nenan a Iesu

³⁵ Knarev' arna napn lera, ivr anr kavr ti a, “P'vlu naui lil kavrav'a a tv'eliel.”

³⁶ Laha, arm'ertuan avln nelnal kavlev' nauak a Iesu itlak sarei a nln kavv'el. Nauak ml kinkin avv'el kavsapei.

³⁷ V'eti nalen lil ilaph kadarp kahua. Laha, naui lil nahu nen ilil kanep'a nahu na nata kadav'a al nauak dav'a ihih ti naui ipalin nauak.

³⁸ A Iesu ilak arna nep' nauak kam'atr kululn arna p'ilu. Laha, m'ertuan avrav'a kavsp'ei kavvr ani kavvr ti a, “?Tisa, nakm kaav'ahur ti p'vram'a?”

³⁹ Laha, a Iesu ithal kav'ana hua m'a nalen, kav'ana m'a naui lil kavr ti a, “!Pars kalak ms!” Iv'amk m'a ti nalen irs, nut itamat istudau.

⁴⁰ Laha, ivr anr kavr ti a, “?Inap'i hin kvdedrn? ?Inap'i hin kaavv'ah a Mlin Eia?”

⁴¹ Laha, avdedrn istudau kavvrvr a hir kavvr ti a, “Aulaha iv'i a hin ak? Sena ti nalen m'a naui lil arsapa v'nenan.”