Mak 3 - V'nen P'as iv'i Turanien Trtarep' m'a Turanien M'dah

A Iesu ien mamh m'ertu arna Sapat

¹ A Iesu iv'a ml al nmah tamat. Dui iamk ilak atlera, lm'an im'a.

² Arvarisi avp'ei, ipavr ti Hin ipamhmah ani arna Sapat, sena ti apavvr ti Hin ien si stu.

³ V'eti a Iesu ivr a dui la lm'an im'a hara kavr ti a, “Pama kap'tir atlaha arna nah nelnal.”

⁴ Kavr anr kavr ti a, “?Iviviln a ti m'ertu apavan si p'as arna Sapat v'aha si stu? Iviviln a ti apamhmah a m'ertu v'aha apakap'ni?” V'eti hir ahavvr si kinkin ipamk.

⁵ Laha, a Iesu ivav hin kap'atalu anr. Hin nln irer karn istu anr sena ti nlr ihua, kavr a dui lahara kavr ti a, “Palmlm lm'am.” Hin ilmlm lm'an, laha ima kap'as ml inep'a tv'aln.

⁶ Iv'amk m'a ti arvarisi avrav'a av'aran kavv'ana m'er arm'ertuan a Erut kavvrur nut apavrpep'ni ipanap'i.

Nelnal istudau avsapei a Iesu

⁷ V'eti a Iesu m'er arm'ertuan avruh kavrav'a a p'ak naui lil, m'ertu avstudau avaan a Kalili m'ei a Sutia kavsapar.

⁸ Nki avaan a Serusalem m'ei a Itumia m'a tv'eliel a Surtan. Nelnal avstudau avaan a nut a Taia m'ei a Saitun kavrav'a asnn, naran avrn pari lilil iani nakl.

⁹ Sarei, ivr anr m'ertuan kavr ti apavuirma nauak pa ipamk ipaterdedp' sanan, sena ti nelnal istudau, imahei ti apavsinsini.

¹⁰ Sena ti itmhmah sarei a m'ertu itstudau. Sena si lera, nelnal m'etien lilil ianr, avsinsin hir, a ti apaviari.

¹¹ Naran m'im'iln stu avlei, avrars asnn kavv'ara eia kavvr ti a, “Nakm kv'i a Natn Atua.”

¹² V'eti Hin itu v'nen hua anr kavr ti amavvrp'ep'a nahan.

Apusel inal lman iru (12)

¹³ Sarei, kadav'a eia arna ptha kav'ara a m'ertu Hin irni. Laha, hir avrav'a asnn.

¹⁴ Katu dui inal lman iru (12) a ti ipalak m'er katap'er a ti apavvrp'ep'a v'nen p'as.

¹⁵ Katu nut huan anr a ti apavmhmah a m'ertu si ianr kavsran m'im'iln stu nakl.

¹⁶ Katu nahan a Saimun uraur ml, iv'i a P'ita.

¹⁷ Katau a Sim'is, iv'i a natn a Sep'eti, m'ei a Sun, iv'i tv'aln, katu nahar uraur ml anr iv'i a Puanasas. Nahar lera ivr ti arv'i dui arv'ana ihua inep'a nav'l.

¹⁸ Katau Adru, a P'iliv', a Patulumiu, a Matiu, a Tumas, a Sim'is iv'i a natn Alvias, a Saimun, iv'i dui na pati.

¹⁹ Katau a Sutas Iskariut, iv'i dui itau a Iesu al lm'ar m'ertu avlep'lei. Sarei, avrav'a al nmah iamk.

Nl naml ipatupapr hin ikap'tirdri

²⁰ Laha, nelnal avrama kavp'lt ml kavani ti hir ahavrndu ti apavhan tim'ah.

²¹ Naran tv'aln kinkin avrn si lera avrav'a a ti apavlav'i sena ti avvr ti ptn idilin.

²² Tisa na v'nen hua kinkin avaan a Serusalem kavvr ti a, “A Pielsipup ilak a nln. Hin isran m'im'iln stu arna nut huan a mlin na m'im'iln stu.”

²³ V'eti Hin iv'ara anr kasran v'nen asnr kavr ti a, “?A Sitan irndu ti ipasran a Sitan ipanap'i?

²⁴ Ipavr ti m'ertu arna v'anu kinkin apavtupapr hir kavmlmlen hir, v'anu nen ikap'tirdri.

²⁵ V'aha, ipavr ti nl nam'el ipamk ipatupapr hin kamlmlen hin, nl nam'el lera ikap'tirdri.

²⁶ V'aha, ipavr ti a Sitan ipap'tir kamlen hin katupapr hin, ikap'tirdri, v'eti ipahiris.

²⁷ Dui kinkin ikahv'a al nmaha dui hua kutakm a sian kav'nah ki. Ikhuda sera dui hua ha pr karndu ti iputakm a nmahan kav'nah si p'sp'asan.

Si stu la Atua iamhmah ani ha

²⁸ Nvrdaui, nvr a kam'i, Atua ipalev'la si stu udlani m'ertu avani m'a v'nen stu udlani avvr an Atua.

²⁹ V'eti m'ertu ipav'ana stu m'a M'im'iln P'as, si stuan ipater uaki, ikahiris naran.”

³⁰ Sena ti avvr ti m'im'iln stu ilak a nln a Iesu.

A unian a Iesu m'er titiatah nan avv'ara ani

³¹ Artitiatah nan m'ei a unian a Iesu avrama kavp'tir av'aran kavtep'a v'nen iv'a asnn a ti ipama asnr.

³² M'ertu avstudau avlaktalu ani kavvr ani kavvr ti a, “Palei, a uniam m'er titiatah nam avlak av'aran kavtala anh.”

³³ Laha, ivr anr kavr ti a, “?Hin ak iv'i a uniak v'aha titiatah nak?”

³⁴ Kap'atalu anr arm'ertu avlak ispat ani, kavr ti a, “Pavlei, ki laha avv'i a uniak m'er tv'alk.

³⁵ Sena ti m'ertu isapa sei Atua irni iv'i tv'alk, a v'nk, a uniak.”