Mak 2 - V'nen P'as iv'i Turanien Trtarep' m'a Turanien M'dah

A Iesu imhmah dui iamk tln im'em'a kamhmah ani arna si stuan

¹ Dav'a dav'a iv'a ml a Kapaniam. Nelnal avrn ti ilak al nmah.

² Ilahml sarei, m'ertu istudau avrama kavp'lt atlera, kavani ti m'lnar ihei ml eim, m'lnar ihei ml asn karliu, v'eti ivrp'ep'a v'nen p'as asnr.

³ Dav'a, avrama asnn kavpap dui iamk tln im'em'a.

⁴ Ahavrndu ti apavmima asnn sena ti m'ertu istudau avlinkar nut, laha avrav'a eia arna nmah kavnarla liha nmah ki iamk, iviviln a nut ilak. Naran atvan sera alan, avulnrhraha nahau m'a pasan lera, dui si iani im'atr aranan ra.

⁵ Naran a Iesu ila ti avv'ahi, ivr a dui si iani, kavr ti a, “Natk, Atua itlev'la sera si stuam.”

⁶ V'eti tisa kinkin na v'nen hua avlak atlera, kavv'hv'ah si lera a nlr kavvr ti a,

⁷ “?Inap'i hin aulera iv'ana stu kavrur Atua? Ak ml uraur irndu ti ipalev'la si stu? Atua uaki iamk irndu ti ipalev'lei.”

⁸ Iv'amk m'a ti a Iesu irndaui arna nln kala ti avv'hv'ah a nlr inap'i lera kavr anr kavr ti a, “?Inap'i hin kvv'hv'ah si lera a nlm'i?

⁹ ?V'ata mau ihuat? ?Ihuat a ti p'evr a dui la tln im'em'a ha, kavr ti a, ‘Atua itlev'la sera si stuam,’ v'aha ihuat a ti p'evr ti a, ‘Pap'tir kaua pap nam kav'el’?

¹⁰ V'eti nrn ti pavrndu ti Kana, nv'i Net M'ertu, nut huak iak a ti p'elev'la si stu.” Laha, ivr a dui lera tln im'em'a ra, kavr ti a,

¹¹ “Nvr anh, pap'tir kaua pap nam kav'el kadahau.”

¹² Iv'amk m'a ti ip'tir kaua pap nen kadav'a av'aran arna nah nelnal udlani. Hir udlani avtah ani ihuadau kavpatei Atua kavvr ti a, “Ndavmulela sei inap'i lera naran kinkin.”

A Livai, iv'i dui na takis, isapei a Iesu

¹³ Dav'a iv'a ml al naui lil. M'ertu udlani avrav'a asnn, laha iv'iv'en sei anr.

¹⁴ Kav'el dav'a dav'a kala dui iamk, nahan iv'i a Livai, a natn Alvias. Hin ilak kan parei al nmah na takis. Laha, ivr ani, kavr ti a, “Pasapa Kana.” Laha, a Livai ip'tir kasapei.

¹⁵ Itauatah a si lera, naran ihatat al nmahan aulera, dui na takis m'er m'ertu stu avstudau avlakp'lt ani m'ei a Iesu m'er m'ertuan udlani, sena ti m'ertu avstudau avsapei.

¹⁶ V'eti artisa na v'nen hua m'er arvarisi avla ti ihatat m'er ardu na takis m'er m'ertu stu kavvr a m'ertuan kavvr ti a, “?Inap'i hin aulera ihatat m'er ardu na takis m'er m'ertu stu?”

¹⁷ V'eti a Iesu irn v'nenar kavr ti a, “M'ertu avhua ahavrn tukta, v'eti m'ertu avm'at uaki. Nahma a ti p'ev'ara a m'ertu p'as v'eti nma a ti p'ev'ara a m'ertu stu sena ti apavvav nlr.”

A Iesu ivrur naran iviviln a ti apaln tim'ah

¹⁸ Naran lera m'ertuan a Sun Paptais m'er arvarisi avln tim'ah kavtu tamat, kavrav'a asn a Iesu kavvr ti a, “?Inap'i hin m'ertuan a Sun m'er arvarisi avln tim'ah kavtu tamat v'eti Nakm m'ertuam ahavani?”

¹⁹ A Iesu ivrpranr kavr ti a, “Artv'el dui ip'hm'arit ser apavln tim'ah naran hin idlak uam asnr ipanap'i? Naran dui ip'hm'arit idlak asnr akavln tim'ah.

²⁰ V'eti napn kinkin ipama ti apalev'la dui la ip'hm'arit hara. Arna naran nen lera apavln tim'ah.

²¹ M'ertu kinkin ikalev' niv'es kalik m'dah kalilai arna mnu klus, imahei niv'es kalik m'dah lera iparv'la pna mnu klus lahara, kani ti iparndapri ipalil ml.

²² M'ertu kinkin ikatv'en naui m'iel m'dah al nila p'ak nani itater dav'a. Imahei naui m'iel m'dah ipani ipaspal, naui ipararev' udlani, nila p'ak nani ikap'as ml. V'eti aktv'en naui m'iel m'dah pr al nila p'ak nani m'dah.”

A Iesu iv'i Mlin na Sapat

²³ Arna Sapat iamk hir a Iesu avsapa navanel al pitvet na uit. Avv'el dav'a, m'ertuan avnardina uit kinkin.

²⁴ Arvarisi avvr ani kavvr ti a, “?Palei, inap'i hin avan sei v'nen hua ivrkari arna Sapat?”

²⁵ V'eti a Iesu ivrpranr kavr ti a, “?Nsarei kam'i kaavlei arna Paivul sei hir a Divt avani naran der iarr kavrn nam'er?

²⁶ Inep'a ti a Divt iv'a al nmahan Atua, naran Apaiata iv'i pris lil, kahan p'ret ataui arna nahn Atua, kavsvsen ki a m'ertuan. V'eti p'ret lera v'nen huan Atua ivr ti arpris uaki avrndu ti apavhani.”

²⁷ Laha, a Iesu ivr anr kavr ti a, “Atua itu Sapat sena m'ertu, iatu m'ertu sena Sapat.

²⁸ Sena si lera Kana nv'i Net M'ertu kav'i Mlin Lil na Sapat.”