Mak 13 - V'nen P'as iv'i Turanien Trtarep' m'a Turanien M'dah

A Iesu ivrp'ep'a ti nmah tamat ipars

¹ Naran a Iesu iln nmah tamat, m'ertuan kinkin iamk ivr ani, kavr ti a, “Tisa, pala nav'et iv'i nakal na nmah tamat, avlilil kavp'as istudau.”

² V'eti a Iesu ivrprani, kavr ti a, “?Kla nmah lilil lera? Apavkasr nav'et nen udlani a nadep', a ti tv'aln ikahter ml arna tv'aln.”

V'ata ipatu hin naran itv'i ti nadep' ipahiris

³ Sarei, naran ilak arna Ptha na Nai iv'i Uliv, kap'a nmah tamat, hin a P'ita, a Sim'is, a Sun, m'ei Adru avrama asnn, hir uaki avlak, kavmiman ani, kavvr ti a,

⁴ “?Pavrp'ep'ei a kam'em', si lera ipatu hin v'aran? ?V'ata ipav'iv'en naran nen?”

⁵ Laha, a Iesu ivrpranr kavr ti a, “Pavv'ah kam'i a ti mavv'ah v'nenar m'ertu apavhap'il m'a kam'i.

⁶ Sena ti m'ertu ipastudau apavrama arna nahak, kavvr ti a, ‘Kana nv'i Hin ra.’ Laha, m'ertu apavstudau apavv'ah v'nen hap'ilienar.

⁷ V'eti naran pavrn ti naur iak a nut kinkin v'aha pavrn v'nen kinkin ipavrur naur, kam'i mavdedrn ani, sena ti si lera iktu hin pr iktauamu, v'eti nadep' ikdahiris uam.

⁸ Sena ti v'anu ipamk ipan naur m'a v'anu uraur v'aha mlin ipamk ipan naur m'a mlin uraur. Nami ipami arna nadep' arna nut kinkin. M'em'erien m'a der ipaiak. V'eti si udlani lera iv'i der uaki itauamu.

⁹ V'eti kam'i pavv'ahur kam'i, sena ti apauada kam'i kauirv'a kam'i arna kut karp kam'i al nmah tamat. Apav'ev'a kam'i a ti pavp'tir arna nahr kavman m'er armlin sena nahak a ti pavvrp'ep'a nahak arna nahr.

¹⁰ V'eti akvrp'ep'a v'nen p'as pr arna v'anu udlani ipatauamu.

¹¹ V'eti naran apalev' kam'i a ti apav'ana hua m'a kam'i, mavv'ahur sei pavvri ipatauamu, kavv'ah ti pavvrpranr ipanap'i, v'eti pavvrp'ep'a v'nen udlani M'im'iln P'as ipav'iv'en a kam'i arna naran lera, sena ti iav'i kam'i uaki pavv'ana, v'eti M'im'iln P'as ipav'i drlm'i.

¹² Arna naran nen, tv'aln ipatu tv'aln al lm'ar m'ertu a ti aparpep'nr, a tatei ipatau a natn, mardel apavp'tir arna nahr a tetiar m'er a uniar kavtaur al lm'ar m'ertu a ti aparpep'nr.

¹³ M'ertu udlani apavlep'la kam'i sena nahak v'eti m'ertu ipap'tir dav'a dav'a ti si udlani ipahiris, Atua ipalev'lei.

Der lil ipama arna nadep'

¹⁴ V'eti naran pavla ti apatu si stu kinkin iputakm a nmah tamat, kani ti ipap'tir arna nut iaviviln ani, inep'a nut a Taniel itvr sarei tituei inap'ei, (m'ertu ipala v'nen laha ipav'ahuri), arna naran nen, ip'as a ti m'ertu avlak a Sutia apavruh kavrav'a arna ptha.

¹⁵ Laha, ipavr ti m'ertu kinkin ipalak arna nmah eia, imahv'a eim ml a ti ipalev' sian kinkin.

¹⁶ V'aha ipavr ti m'ertu kinkin ipalak al pitvetan, imahum'alet ml a ti ipalev' klusan.

¹⁷ Nrn istu ihuadau sena tav'et apavtkar v'aha nki apavtu nunu anr mardel arna naran lera.

¹⁸ Pavtu tamat a ti mkavruh arna naran nut ihaha istudau.

¹⁹ Sena ti arna naran lera der ipaiak ipasiv' der udlani itu hin naran Atua ien nadep' dav'a ier dika. Der uraur ikalil ml kanep'a ki lera naran kinkin.

²⁰ Laha, ipavr ti a Mlin Eia imakausla napn na der lera, m'ertu kinkin idahamk idsilv', v'eti ipakaus der lera sena m'ertuan itv'li sarar.

²¹ Arna naran nen, ipavr ti m'ertu kinkin ipavr a kam'i, kavr ‘!Pavlei, a Kristu hilaha!’ v'aha, ‘!Pavlei, Aulera hin ra!’ v'eti kam'i mavv'ahr.

²² Sena ti m'ertu kinkin apavp'tir kavhap'il, kavvr ti avv'i a Kristu v'aha pruvet, kavan pari lil kinkin m'a sei m'ertu apavtah ani, a ti, imvr ti navanel imiak, m'ertu Atua itv'li sarar apavv'ahr.

²³ V'eti kam'i pavv'ah kam'i. Pavrni, ntvr sera si udlani lera a kam'i itauamu.

Net M'ertu ipama ml

²⁴ V'eti arna naran nen, ipatauatah a der lera neiel ipam't, nal ikahar ml.

²⁵ Msi arna p'knaran apavrars, si udlani ihua iter al p'knaran ipadudul.

²⁶ Sarei, apavla Kana, nv'i Net M'ertu p'ama al p'knaran tva m'a nut hua lilak m'a si p'sp'asak udlani.

²⁷ Arna naran nen p'etep'a enselak a ti apavtupien m'ertuak udlani, la Atua itv'li sarar ha, arna nut neiel itpeia ipaier nut neiel itpl arna nut udlani a nadep' m'a nut eia.

A Iesu isran v'nen ivrur p'alak

²⁸ Nrn ti kam'i pavrndu sei arna p'kl p'alak. Naran ranan idv'i sln katu raun, pavrndu ti naran na neiel itmima.

²⁹ Kam'i pavnap'i lera. Naran pavla ti si lera udlani ipatu hin, pavrndu ti si lera itmima, inep'a ti ip'tir asn karliu.

³⁰ Nvrdaui, nvr a kam'i, m'ertu avsilv' hilaha hir kinkin akdavram'a dav'a ipaier naran si udlani lera ipatu hin.

³¹ P'knaran m'a nadep' ipahiris, v'eti v'nenak ikahiris naran kinkin.

M'ertu kinkin iarndu naran a Iesu ipama ml

³² V'eti m'ertu kinkin iarndu napn nen v'aha m'etaneiel nen. Aau, ensel, avlak arna nut eia, ahavrndaui, Kana, nv'i a Natn Atua, narndaui, v'eti a Tatei uaki irndaui.

³³ V'eti kam'i pavv'ah kam'i kavrasp' kavtu tamat, sena ti kaavrndu naran napn nen ipama.

³⁴ Si lera inep'a m'ertu iamk iv'el kadav'a arna v'anu uraur kaln nmahan al lm'ar m'ertu na m'akarienan, katup'sev' a pariar udlani, kavr a dui ip'aur pn liu a ti ipalak kadasp'.

³⁵ Sena si lera, pavrasp', sena ti mkavrndu naran mlin na nmah ipama. Nsarei ipama knarev', v'aha a p't lihat, v'aha naran ntup'el ipatiter v'aha naran neiel ipatvei.

³⁶ Imahei ti ipama ipalahml kala ti kvm'atr.

³⁷ V'nen laha nvr a kam'i ra, nvr a m'ertu udlani, kavr ti a, !Pavrasp'!”