Mak 12 - V'nen P'as iv'i Turanien Trtarep' m'a Turanien M'dah

A Iesu isran v'nen kavrur m'ertu stu avm'akar al pitvet na krep

¹ Laha, isran v'nen asnr, kavr ti a, “M'ertu iamk ien pitvet na nahau na krep, kan naml ispat ani, kahl tah na nut apavpas nava nahau, a ti uin ipararev', kahl nmah p'arei, sena ti m'ertu ipap'aus nut. Sarei, katu pitvet lera al lm'ar m'ertu apavp'auri kavuli sanan, sarei, kadav'a arna v'anu kinkin iv'iv'a.

² Dav'a, naran nava nahau im'am'd, itep'a dui na m'akarienan iamk asn m'ertu avp'aur pitvet, a ti apavtu pna sei avlav'i al pitvet na nahau na krep ani.

³ V'eti hir avuadei, kavrpi, kavtap'ei ihau vn.

⁴ Sarei, itep'a m'ertuan uraur ml asnr, v'eti hir avmhri kavrpapr ptn, kavtap'ei ihau kavutakm ani istudau.

⁵ Sarei, itep'a tv'aln ml, v'eti avrpep'ni. Avani inap'i lera anr m'ertu uraur istudau kavrp hir kinkin, kavrpep'n hir kinkin uraur.

⁶ Sena si lera, itap'ei a natn dui iamk dudau asnr la ilap'as ani istudau ha, kavr ti a, ‘Nsarei apavv'rn a v'nenan a natk dui.’

⁷ V'eti m'ertu avp'aur pitvet lahara avvrvr a hir, kavvr ti a, ‘Aulera ipaua pitvet naran a tetian ipam'a. Pavrama, p'vrpep'ni, sarei, ti pitvetan ipav'i nkad.’

⁸ Sarei, avuadei kavrpep'ni, kavsran p'akn iv'a aut al pitvet na nahau na krep.

⁹ ?Kam'i kvv'ah ti mlin na pitvet na nahau na krep ipan v'ata hilaha? Hin ipama kutakm anr m'ertu avp'aur pitvet na nahau na krep, sarei, katu pitvet na nahau al lm'ar m'ertu uraur.

¹⁰ ?Kaavla nut laha arna Paivul, ivr ti a, ‘Nav'et la m'ertu avhl nmah avsrani ha, ki lera ima kav'i nav'et hua la nmah ip'tir aranan ha.

¹¹ Si lera iv'i parian a Mlin Eia. Nakd nvla ti ip'as istudau’?”

¹² Laha, avrn ti apavuadei a Iesu, sena ti avrndu ti isran v'nen lera kavrurr, v'eti avdedrn a nelnal kavlni kavrahau.

?Iviviln a ti apul takis kavtau an a Mlin Lil a Rum?

¹³ Laha, avtep'a Varisi kinkin m'er m'ertu avsapei a mlin a Erut a ti apavuadei arna v'nenan.

¹⁴ Avrama asnn, kavvr ani, kavvr ti a, “Tisa, kam'em' nvrndu ti Nakm kviviln nakl. Nakm kaadedrn a nah m'ertu v'aha kaav'ahur ti m'ertu kinkin ilil v'aha isusupa v'eti kv'iv'en navanel duan Atua uaki. ?Iviviln a ti p'vul takis kavtau an a mlin lil a Rum, v'aha iaviviln?

¹⁵ ?P'vuli, v'aha nkavuli?” V'eti a Iesu irndu ti avhap'il, kavr anr kavr ti a, “?Kvandina Kana sena v'ata? Pavtu Kana nav'et iamk, p'elei.”

¹⁶ Laha, avuirma asnn. A Iesu ivr anr kavr ti a, “?M'lkn ak la hin ha? Nahan ak aulul ani aranan?” Avvrprani kavvr ti a, “Iv'i mlin lil a Rum.”

¹⁷ Laha, a Iesu ivr anr, kavr ti a, “Sei iv'i nkan a mlin lil a Rum, patau ani, v'eti sei iv'i nkan Atua, patau ani.” Laha, avtah ani ihuadau.

Arsatiusi avrur ti m'ertu ipathal ml arna m'ien v'aha ihei

¹⁸ Sarei, Satiusi kinkin, la avvr ti m'ertu ikathal ml arna m'ien ha, avrama asnn, kavmiman ani, kavvr ti a,

¹⁹ “Tisa, a Musis itu v'nen hua a nakd kavr ti a, Ipavr ti dui im'a, kaln a naun, v'eti tav'et lera a natn ihei, tv'aln ikuei pr, a ti ipalev' a natn ipav'i nka tv'aln im'a.

²⁰ Laha, tiamk avsaru. Titiamu iul tav'etan kalak dav'a kadam'a, v'eti a natn ihei.

²¹ Sarei, tv'aln iuei, kalak dav'a kadam'a, v'eti a natn ihei. Sarei, nitlen inap'i lera.

²² Laha, hir udlani avsaru avuei inap'i lera, v'eti a natr ihei. Sarei, itauatah, tav'et im'a.

²³ ?V'eti naran m'ertu apavthal ml arna m'ien, tav'et lera ipav'i a naun ak? Sena ti tiamk avsaru avuei iv'i a naur.”

²⁴ Laha, a Iesu ivrpranr kavr ti a, “Kam'i v'ahienam'i iaviviln sena ti kaavrndu Paivul m'a nut huan Atua.

²⁵ Sena ti naran m'ertu apavthal ml arna m'ien akavua tav'et ml v'aha akavtlen tav'et ml, v'eti apavnep'a ensel, avlak arna nut eia.

²⁶ V'eti ipavr ti kvv'ah ti m'ertu ikathal ml arna m'ien, ip'as a ti pavla Paivul arna pukan a Musis, arna nut ivrur nap' iv'en arna nai pa, v'eti iahapu. Arna naran lera Atua ivr ani, kavr ti a, ‘Kana nv'i Atuan a Epraham kav'i Atuan Aisak kav'i Atuan a Sikup.’

²⁷ Hin iav'i Atuar m'ertu avram'a v'eti iv'i Atuar m'ertu avsilv' uaki. Sena si lera, kam'i v'ahienam'i istu ihuadau.”

Dui na v'nen hua ivrur v'nen hua v'ata ilil kasiv' v'nen hua udlani

²⁸ Tisa na v'nen hua iamk, la iv'rn a v'nen lera udlani ha kala ti a Iesu ivrpranr ip'as, ima asnn, kamiman ani, kavr ti a, “?V'nen hua v'ata ilil kasiv' v'nen hua udlani?”

²⁹ A Iesu ivrprani, kavr ti a, “V'nen hua, nki ilil kasiv' v'nen hua udlani ivr ti a, ‘Arm'ertu a Isrel, pavv'rni. A Mlin Eia, iv'i Atuad, Hin iamk uaki iv'i Atua dau.

³⁰ Palap'as an a Mlin Eia iv'i Atua arna nlm udlani, arna silv'ienam udlani, arna v'ahienam udlani m'a nut huam udlani.’ Ki lera iv'i v'nen hua tertauamu.

³¹ Tv'aln ilil kanap'ei ivr ti a, ‘Palap'as a tv'alm inep'a ti iv'ih uaki.’ V'nen hua uraur ml ihei ilil kasiv' v'nen hua la iru ra.”

³² Laha, tisa na v'nen hua lahara ivr ani, kavr ti a, “Tisa, kvrdaui, sena ti Atua dau iamk uaki, teruraur ml ihei.

³³ Aau, ip'as a ti m'ertu ipalap'as ani arna nln udlani, arna v'ahienan udlani, arna silv'ienan udlani m'a nut huan udlani, kalap'as a tv'aln inep'a ti iv'i hin uaki. Ki lera ip'as kasiv' si udlani m'ertu avali iv'a asn Atua, m'a si slm atrp'nr katau an Atua.”

³⁴ A Iesu ila ti ivrprani ip'as, kavr ani, kavr ti a, “Nakm ktmima asn v'anuan Atua.” Naran ivr si lera, m'ertu udlani avmamih a ti apavmiman sei ml ani.

?A Kristu iv'i a Natn ak?

³⁵ Naran a Iesu iv'iv'en v'nen p'as al nmah tamat, imiman anr kavr ti a, “?Inap'i hin tisa na v'nen hua avvr ti a Kristu iv'i a Natn a Divt?

³⁶ Sena ti M'im'iln P'as iani ti Divt ivr ti a, ‘A Mlin Eia ivr an a Mlinak kavr ti a, “Palak arna m'ldauk dav'a p'ani ti m'ertu avlep'lah apavv'i napl na tlm.” ’

³⁷ Sena si lera hin a Divt ivr ti Aulera iv'i a Mlinan. ?Inap'i hin irndu ti ipav'i a Natn?” V'eti arm'ertu unanut avrn ip'as a sei ivri.

Pavv'ahur kam'i sanar tisa na v'nen hua

³⁸ Naran iv'iv'en sei anr, ivr ti a, “Pavv'ahur kam'i, sanar tisa na v'nen hua. Hir avrn ip'as a ti apavukl hir m'a klus p'arei kavrn ip'as naran m'ertu avvr ip'as anr arna nut aulul a sei.

³⁹ Kavrn ip'as a ti apavlak arna napl p'as al nmah tamat, kavrn ip'as a ti apavlak arna m'lnar m'ertu lilil arna tim'ah kinkin.

⁴⁰ Kavv'nah si udlaniar tvtanu kavukl hir arna tamat p'arei. Atua iputakm anr mau sanan.”

Tvtanu iamk isran vatu iru al pukis

⁴¹ A Iesu ilak asn pukis asran nav'et nakl a nln, kala nut m'ertu avsran nav'et inap'ei, kala ti m'ertu siar istudau avsran nav'et inelnal.

⁴² Laha, tvtanu iamk, sian ihei, ima kasran nav'et papa iru (2 vatu) a nln.

⁴³ Sarei, a Iesu iv'ara anr m'ertuan, kavr ti a, “Nvrdaui, nvr a kam'i, tav'et laha isran nav'etan ilil kasiv' nav'etar m'ertu udlani avsrani al pukis laha.

⁴⁴ Sena ti hir udlani avsran nav'etar, pnen istudau iter uam, v'eti tav'et laha sian ihei isran udlen nav'etan, iv'i nki na tim'ah nan udlani.”