Mak 11 - V'nen P'as iv'i Turanien Trtarep' m'a Turanien M'dah

Nelnal avpatei a Iesu naran iv'a arna v'anu a Serusalem arna tuki

¹ Naran avrama kavihih nut a Serusalem, kavier nut a Petvas m'a P'etani asn Ptha na Nai iv'i Uliv, a Iesu itep'a m'ertuan arru,

² kavr anr kavr ti a, “Parv'a arna v'anu lahatu krlei ha. Naran pariari, parla net tuki ipamk atlida sarei, m'ertu kinkin idalak lei aranan naran kinkin. Parulullei karuirma atlaha.

³ V'eti ipavr ti m'ertu kinkin ipavr a kam'i, kavr ti a, ‘?Kran si lera sena v'ata?’ kam'i parvr ti a, ‘A Mlin irni.’ Ipalahml sarei, hin ipatap'ei ipama atlaha.”

⁴ Sarei, arv'el karla net tuki lahara ti atlida sarei asn karliu na nmah iamk, a p'ak navanel, laha, arulullei.

⁵ Laha, m'ertu kinkin avp'tir atlera, kavvr anr kavvr ti a, “?Krululla net tuki lera sena v'ata?”

⁶ Laha, arvr sei a Iesu itvr sarei anr a ti aparvri, sarei, avm'ahu anr a ti aparlav'i.

⁷ Naran aruirma net tuki lahara asn a Iesu, avtu klusar arna dun, laha, a Iesu ilak aranan.

⁸ Sarei, m'ertu avstudau avv'lien klusar arna navanel, hir kinkin uraur avtr ru nai kavv'liani arna navanel.

⁹ M'ertu avtauamu ani m'er m'ertu avtauatah ani, avv'ara eia, kavvr ti a, “Ip'as, Mlin Lil, nvpatah, sena ti kma arna nahan a Mlin Eia.

¹⁰ Nvpatei Atua, sena ti iani ti v'anuan a tetiad, iv'i a Divt, ima ml arna nahan a Mlin Eia. Nvpatei eia sp'n.”

¹¹ Laha, a Iesu iv'a arna v'anu a Serusalem, kadav'a al nmah tamat kap'a si udlani iter atlera, kav'el ml, sena ti itv'i ti nut ipam't, kadav'a a P'etani m'er m'ertuan arnal lman iru (12).

P'alak iamk ima kam'aran

¹² M'ih nen, naran avln nut a P'etani, a Iesu irn nam'er.

¹³ Kala p'alak iamk, raun iak, iter v'iv'a. Iv'el, kadav'a asnn, katala navan. V'eti naran ier asnn, iala navan kinkin, v'eti ila raun uaki, sena ti idaier naran navan ipaiak.

¹⁴ Sarei, a Iesu ivr ani, kavr ti a, “Nrn ti m'ertu ikaud navam ml naran kinkin.” Naran nen, m'ertuan avrn sei ivri.

A Iesu itp'ev' m'ertu stu al nmah tamat

¹⁵ Naran avier a Serusalem, a Iesu iv'a al nmah tamat katp'ev' m'ertu udlani avulul a sei m'er m'ertu udlani avul sei al nmah tamat, kakasr tiv'ar ardu avtulien nav'et nakl, m'a napl ardu avulul a navimar avlak aranan.

¹⁶ Iam'ahu a ti m'ertu kinkin ipaua si kinkin al nmah tamat.

¹⁷ Sarei, iv'iv'en sei anr, kavr ti a, “Paivul ivr ti a, ‘Apavr ti nmahak ipav'i nmah tamatar m'ertu na v'anu udlani’, v'eti kam'i kvani ti ima kav'i ‘navap na m'ertu na v'nv'nahien.’ ”

¹⁸ Naran arpris lil m'er tisa na v'nen hua avrn si lera, avtala a navanel na ti apavrpi, sena ti avdedrn an a Iesu kavla ti nelnal avtah a sei iv'iv'en anr.

¹⁹ Laha, naran itv'i knarev', iln v'anu lil.

?P'alak imaran iv'iv'en v'ata?

²⁰ M'ih nen, arna m'etav'aran avv'el kavsiv' p'alak lahara, kavla ti itm'aran dav'a kaier uarn.

²¹ Laha, a P'ita iv'ahuri, kavr ani, kavr ti a, “Tisa, palei, p'alak lahara, kv'ana hua m'ei hara, itm'aran.”

²² Laha, a Iesu ivrpranr, kavr ti a, “Kam'i pavv'ah Atua pr.

²³ Sena ti nvrdaui, nvr a kam'i, ipavr ti m'ertu kinkin ipavr a ptha laha kavr ti a, ‘Paruh a m'lnam kadav'a katpl al nata’, ipavr ti v'ahienan ikahrs, v'eti ipav'ahi ipahua ti si lera ipatu hin, ipama katu hin asnn ipanep'a nut ivri inap'ei.

²⁴ Sena si lera, nvr a kam'i, si udlani kvrni, naran pavtu tamat sanan, pavv'ah ti Atua ipatu kam'i, dav'a ipatu kam'i.

²⁵ Laha, naran pavp'tir kavtu tamat, v'eti ipavr ti kvv'ahur ti m'ertu kinkin iutakm a kam'i arna si kinkin, pavmhmah ani, a ti a Tetiam'i ilak eia ipamhmah a kam'i arna si stuam'i ipanap'i lera.

²⁶ V'eti ipavr ti kavmhmah a m'ertu uraur, a Tetiam'i ilak eia Hin ikamhmah a kam'i arna si stuam'i.”

?Nut huan a Iesu idan ip'i?

²⁷ Laha, avramam'alet ml a Serusalem. Naran a Iesu iv'el al nmah tamat, arpris lil m'er tisa na v'nen hua m'er elta avrama asnn.

²⁸ Kavvr ani kavvr ti a, “?Inap'i hin kv'ah ti iviviln a ti pan si lera? ?Ak im'ahu a si lera anh?”

²⁹ A Iesu ivrpranr kavr ti a, “Kana nrn ti p'emiman si ipamk a kam'i. Ipavr ti kam'i pavvrpren Kana, Kana p'evr a kam'i hin ak im'ahu a Kana a ti p'en si lera.

³⁰ ?Paptais a Sun iani, idan eia, v'aha idan asn m'ertu uaki? Pavvrpren Kana.”

³¹ V'eti avvrvr a hir kavvr ti a, “Ipavr ti p'vvr ti a, ‘Idan eia,’ Hin ipavr ti a, ‘?Inap'i hin kaavv'ahi?’

³² V'eti ipavr ti p'vvr ti a, ‘Idan asn m'ertu’ ”--Avdedrn a nelnal, sena ti nelnal avv'ah ti a Sun iv'i pruvet dau.

³³ Laha, avvrpren a Iesu kavvr ti a, “Navrndaui”. Laha, a Iesu ivrpranr kavr ti a, “Sena si lera, Kana nkavr a kam'i hin ak im'ahu a ti p'en si lera.”