Mak 10 - V'nen P'as iv'i Turanien Trtarep' m'a Turanien M'dah

M'arit m'a p'kl ti m'ertu ipasran a naun

¹ Laha, a Iesu ip'tir kaln nut lera kav'el kaier a tv'eliel na nauei a Surtan kadav'a arna nut a Sutia. Sarei, nelnal avrama ml asnn. Hin iv'iv'en v'nen p'as anr ml, inep'a nut iani nakl inap'ei.

² V'eti arvarisi avrama ml asnn a ti apavhlhalei, kavmiman ani kavvr ti a, “?Iviviln a ti dui ipasran tav'etan?”

³ Hin ivrpranr kavr ti a, “?A Musis itu v'nen hua v'ata a kam'i?”

⁴ Avvrprani kavvr ti a, “A Musis im'ahu a ti dui ipulul a ruplet sanan, sarei, kasran tav'etan.”

⁵ V'eti a Iesu ivrpranr kavr ti a, “V'nen hua lera a Musis iulul ani sena ti nlm'i ihua ihuadau.

⁶ V'eti naran na ap'u, Atua ‘ien dui m'a tav'et.

⁷ Sena si lera, dui ikln a tetian m'ei a unian pr, karp'lt m'ei a naun,

⁸ Laha, hir arru aparma karamk arna p'akr.’ Sena si lera, aharru ml arna p'akr, v'eti arma karamk.

⁹ Sena si lera, sei Atua itup'ltanr, m'ertu imatupri.”

¹⁰ Naran avlak ml al nmah, arm'ertuan avmiman si lera ml ani.

¹¹ Laha, Hin ivr anr kavr ti a, “Ipavr ti dui isran tav'etan kaua teruraur, inep'a ti hin iv'nahi uaki kutakm an a naun dau.

¹² V'aha, ipavr ti tav'et isran a naun kadatr asn dui uraur, inep'a ti hin iv'nahi uaki kutakm an a naun dau.”

A Iesu imhmah anr armardel

¹³ Laha, avuirma mardel papa asn a Iesu a ti ipaiarr, v'eti m'ertuan avv'ana hua m'er m'ertu avuirma.

¹⁴ V'eti naran a Iesu ila si lera, nln irer anr sanan, kavr anr kavr ti a, “Pavm'ahu a ti mardel apavrama asnk. Mavvrkarr, sena ti v'anuan Atua iv'i nkar m'ertu avnap'i lera.

¹⁵ Nvrdaui, nvr a kam'i, ipavr ti m'ertu kinkin ialev' v'anuan Atua kanep'a mardel pa, ikahv'a eim.”

¹⁶ Sarei, kalav'r karmanr katu lm'an aranar kamhmah anr.

A Iesu iv'ana m'a malakal iamk sian istudau

¹⁷ Naran a Iesu iv'el ml kasapa navanel, dui iamk ivrvr kadama kasisihpu asnn, kamiman ani, kavr ti a, “?Tisa p'as, kana p'en v'ata a ti p'elev' silv'ien ikahiris naran?”

¹⁸ Laha, a Iesu ivr ani, kavr ti a, “Kvr ti Kana np'as sena v'ata? M'ertu iahamk ip'as, v'eti Atua uaki.

¹⁹ Nakm ktrndu sera v'nen huan Atua, ivr ti a, ‘Mav'nah tav'et, marpep'n m'ertu, mav'nah sei, mavrur si stu a tv'alm kinkin kahap'il ani uaki, mahap'il sena ti pav'nah sei, pani ti nahar a tetiam m'ei a uniam ipav'a eia.’ ”

²⁰ V'eti hin ivrprani, kavr ti a, “Tisa, kana nsapa v'nen lera udlani naran nv'i mardel dav'a ier dika.”

²¹ Laha, a Iesu ip'ei kalap'as ani, kavr ti a, “Si iamk idater uam. Pav'a kulul a siam udlani katu ki a m'ertu siar ihei, dav'a ti siam ipastudau arna nut eia, kadama kaua su lamu kasapa Kana.”

²² V'eti naran irn v'nen lera nahn ilal, v'ahienan idv. Laha, karuh, sena ti sian istudau.

Atua irndu ti ipan si udlani

²³ Sarei, a Iesu ip'atalu anr m'ertuan udlani, kavr anr kavr ti a, Ihua ihuadau a ti m'ertu siar istudau apavrav'a arna v'anuan Atua.

²⁴ Laha, arm'ertuan avtah a v'nen lera ihuadau. V'eti a Iesu ivr anr ml kavr ti a, “Natk, ihua ihuadau a ti m'ertu avv'ah siar istudau apavrav'a arna v'anuan Atua.

²⁵ Ihua a ti kam'el ipav'a al pt nitil, v'eti ihua mau a ti m'ertu sian istudau ipav'a arna v'anuan Atua.”

²⁶ Laha, avtah ani ihuadau, kavrvr a hir kavr ti a, “?Ipavr ti ipanap'i lera, Atua ipalev'la hin ak?”

²⁷ V'eti a Iesu ip'ar kavr ti a, “M'ertu akavani, v'eti Atua irndu ti ipani, sena ti Atua irndu ti ipan si udlani.”

²⁸ Laha, a P'ita ivrdinei ani, kavr ti a, “Palei, kam'em' ntvln sera si udlani kavsapah.”

²⁹ Laha, a Iesu ivr ti a, “Nvrdaui, nvr a kam'i, ipavr ti m'ertu kinkin ipaln nmahan, tv'aln, a v'nn, a tetian, a unian, a naun, a natn, v'aha nadep'an, sena Kana m'a v'nen p'as,

³⁰ Atua ipatum'alet a si lera udlani ani ipav'anelnal ipav'amk (100). Ipatum'alet a nmah, tv'aln, a v'nn, a unian, a natn m'a nadep'an, katup'lten der ani m'ei. Laha, ipatauatah, ipatu silv'ien ani, ikahiris naran.

³¹ V'eti m'ertu avstudau avtauamu, apavtauatah, v'eti m'ertu avtauatah, apavtauamu.”

A Iesu ivri ml, iv'i v'atl nen, kavr ti ipam'a kathal ml

³² Laha, avsapa navanel kavrav'a eia a Serusalem, a Iesu itauamu anr, v'eti hir avtah. Avsapei v'eti kavdedrn. Sarei, a Iesu ilev' m'ertuan inal lman iru (12) ml kavrdinei anr si udlani ipaiari, kavr ti a,

³³ “Pavrni, nakd p'vrav'a eia a Serusalem, v'eti apatu Kana, nv'i Net M'ertu, al lm'ar pris lil m'er tisa na v'nen hua. Hir apavtaui a ti nkam'a pr, sarei kavtu Kana al lm'ar v'anudl.

³⁴ Apasip'len Kana, karp Kana a nahau, katup'i Kana karpep'n Kana v'eti arna nitla napn, p'ethal ml.”

Mertu irn ti ipalil ikama kav'i dui na m'akarien pr

³⁵ Laha, a Sim'is m'ei a Sun, arv'i a natn a Sep'eti, arv'a asnn, karvr ti a, “Tisa, nrrn ti Nakm pan sei p'ermimani asnm'em'.”

³⁶ Ivr anr kavr ti a, “?Krrn ti p'en v'ata asnm'i?”

³⁷ Arvrprani karvr ti a, “Pam'ahu a ti kam'em' ki ipamk ipalak arna m'ldaum, tv'aln ipalak arna m'ir nam, naran palak arna si p'sp'as udlaniam.”

³⁸ V'eti a Iesu ivr anr, kavr ti a, “Kam'i kaarrndu sei krmimani. ?Kam'i krrndu ti parnep'a Kana karm'nm'n al panikinak karrndu ti parpaptais arna paptais Kana p'epaptais ani?”

³⁹ Arvrprani karvr ti a, “Aau, nrrndu ti p'eran si lera.” A Iesu ivr anr kavr ti a, “Aau, parnep'a Kana karm'nm'n al panikinak, karpaptais arna paptaisak.

⁴⁰ V'eti Kana nkataui ti tv'alm ipalak arna m'ldauk, tv'alm ipalak arna m'ir nak, sena ti Atua ipatu si lera anr m'ertu itv'li sarar.”

⁴¹ Naran m'ertuan arnal avrn si lera, nlr irer anr a Sim'is m'ei a Sun istudau.

⁴² V'eti a Iesu iv'ara anr m'ertuan a ti apavrama asnn, kavr anr, kavr ti a, “Kam'i kvrndu ti m'ertu avr ti avv'i kavmanar v'anudl avukl hir, m'ertu lilar avtp' m'ertu istudau.

⁴³ V'eti ikanap'i lera asnm'i. Ipavr ti kam'i kinkin irn ti ipalil asnm'i, hin ikv'i dui na m'akarienam'i pr.

⁴⁴ V'aha ipavr ti kam'i kinkin irn ti ipalil kasiv' kam'i udlani, hin ipav'i dui na m'akarienar nelnal.

⁴⁵ Sena ti Kana, nv'i Net M'ertu, nahma a ti m'ertu apavm'akarak, v'eti nma sena ti p'em'akarar m'ertu uraur katu silv'ienak a ti p'ulla m'ertu ipastudau.”

A Iesu imhmah m'etapis iamk, iv'i a Patimias

⁴⁶ Dav'a, avier a Seriku. Naran avln nut lera ml m'er m'ertuan, m'ertu uraur istudau avsapar. Sarei, m'etapis iamk, nahan iv'i a Patimias, iv'i a natn a Timias, ilak arna tv'eliel na navanel kamiman sei nakl anr nelnal.

⁴⁷ Naran irn ti a Iesu a Nasaret ima, iv'ara eia, kavr ti a, “Iesu, Nakm kv'i a Natn a Divt, parn istu a kana.”

⁴⁸ V'eti m'ertu istudau avv'ana hua m'ei kavvr ti a, “Pap'nh.” V'eti hin iv'ara eia sp'n ml, kavr ti a, “Nakm kv'i a Natn a Divt, parn istu a kana.”

⁴⁹ Laha, a Iesu ip'tir kavr ti apav'ara ani. Sarei, hir kinkin avv'ara a m'etapis lahara, kavvr ani, kavvr ti a, “Parn ipap'as. Pap'tir, iv'ara anh.”

⁵⁰ Laha, hin ihsla klus na m'lan kap'tir kadama asn a Iesu.

⁵¹ A Iesu imiman ani, kavr ti a, “?Nakm krn ti p'en v'ata anh?” M'etapis ivrprani, kavr ti a, “Mlin, nrn ti p'eledu sei ml.”

⁵² Laha, a Iesu ivr ani, kavr ti a, “Pahau, v'ahienam iani ti kp'as ml”. Iv'amk m'a v'nen lera, iledu sei ml, kasapei a Iesu arna navanel.