Maika 7 - V'nen P'as iv'i Turanien Trtarep' m'a Turanien M'dah

A Maika irn istu sena si stuan a Isrel

¹ !Usa sanak! Sena ti nnep'a sarar m'ertu avlev' nava nai naran nut ivuv, kanep'a sarar m'ertu avlev'lar krep arna nahau, naran itv'i sera naran na ti apani. V'eti navan ihei a ti p'ehani, aau, tertauamu na nava nai, la m'im'ilk irn nam'er sanan ha, ihei ki.

² Dui, la arndu ti apav'ahi ha, itruh sarei arna nadep' ka. M'ertu viviln ihei asnr m'ertu nakl. Hir udlani avlaksrahr m'ertu, a ti apavkasr dir. M'ertu udlani p'sev' ilaksrah tv'aln, a ti ipauadei m'a nit.

³ Laha, avm'akar a ti apavan si stu m'er lm'ar arru--a mlin pa na v'anu imiman sei, sarei m'ertu na v'nen hua imiman nav'et a ti ipan si stu kinkin, sarei m'ertu lil ivrp'ep'a v'ahien stuan. Inap'i lera, avvrvr a hir kavp'lt arna v'ahien stu iamk.

⁴ Nki asnr la ip'as kasiv'r arki uraur ha, hin inep'a sera hrhrid. Nki la iv'el kaviviln kasiv'r arki uraur ha, hin ihan kanep'a sera lu makau. Napn na m'ertu ip'aus nut, m'a napn na ti aparph itama sarei. Hilaha, v'ahienar m'ertu ipadedhar.

⁵ Mavv'ah tv'elm'i, aau, mavv'ah ti pavp'tir sanar m'ertu avlak m'a kam'i nakl. Pauada liu na pnm, a ti tav'et im'atr arna mrm ikarn v'nenam.

⁶ Sena ti net dui iamk iav'ah a tetian, net tav'et iamk ip'tir a ti ipamlen a unian. Sarei, tav'et ipamk ipamlen a rinan. Ipanap'i lera, m'ertu apavmlen m'ertu apavv'i arki avdan arna nl nam'el iamk uaki.

⁷ Sena si lera, p'eklau eia asn a Mlin Eia. P'elaksrah Atua, iv'i Hin la ilev'la kana ha. Atuak ipav'rn a kana.

A Isrel iparn istu sena si stuan

⁸ M'ertu imlen kana, map'tir eia nak karn ip'as. Naran a ti p'ars a nadep', v'eti p'ilaph uam. Naran nlak al m'alk, a Mlin Eia ipav'i lait ipamk asnk.

⁹ P'elak a nv' nl reran a Mlin Eia, sena ti nten sera si stu katmlen sarei. P'elak dav'a ti ipavrp'ep'a sei sanak, sarei kap'tir arna v'nen hua sanak. Ipani ti p'ama av'aran kalak al nut ren. Laha, p'ela p'kl vivilnan.

¹⁰ Sarei, m'ertu, la imlen kana ha, ipalei. Mamihien ipatavkar m'ertu ivr a kana, kavr ti a, “?A Mlin Eia, iv'i Atuam, hin ip'i?” P'elei m'a m'atak. Hilaha, apapasi dav'a ti ipanep'a sera nalv arna navanel.

¹¹ Arna napn a ti apahlurr naml hua lilam, arna napn lera, apavrp'ep'a v'nenam, ipav'a kaiarr nut v'iv'a arna v'anu nakl.

¹² Arna napn lera, apavrama asnm, apavdan Asiria, kavdan arna v'anu lilil, la avhuet ha. Apavdan arna v'anu hua lil, kavdan asn Naui Lil, ipatudina hin a p'ak nata ipamk, kadav'a kaier nata a tv'eliel na v'anu. Aau, ipatudina hin arna ptha lil ipamk, kadav'a kaier ptha lil a tv'eliel nen.

¹³ V'eti v'anu ipama kastu uaki, sanar arm'ertu avlak aranan, aau, sena nava sei avani nakl.

Atua ipamhmah an a Isrel

¹⁴ Pamhmah anr arm'ertuam m'a napilaktam, avv'i sivsivam, kavv'i a natm, la avlak kavamkma al lili ha. Avlak a p't nut na v'anu a Karmel, v'eti pam'ahu a ti apavhan tim'ah arna nut a Pesan m'ei a Kiliat, ipanep'a nut avani arna naran itauamu.

¹⁵ Laha, Atua iv'ana, kavr ti a, “Kana p'ev'iv'en sei anr, apavtah ani ipastudau. Aau, ipanep'a sera naran na ti kvruh arna v'anu a Itsip.”

¹⁶ Laha, arm'ertu na v'anu uraur apavlei kavmamih sena nut huar. Apavtuda lm'ar arna pnr, a ti apavtavkarr. Akavrn si kinkin m'a drlr.

¹⁷ Apavhalim'a neiev' inep'a nut nmat iani inap'ei. Apavv'el arna nadep' dan al tah (la avlak a nln ha), aau, apavnep'a sera nmat la avlak al nadep' ha. Apavdedrn an a Mlin Eia, iv'i Atuam'em', aau, apavdedrn sanam.

¹⁸ ?Hin ak iv'i Atua kanap'ah, nakm la kmhmah a m'ertu arna si stuan ha, aau, nakm la kav'el kasiv' si stu duanar arm'ertuam avani ha? A Mlin Eia iauada nl reran ikahiris naran, sena ti irn ip'as a ti iparn istu a m'ertu.

¹⁹ Atua iparn istu a kam'em' uam, ipani ti si stu lilam'em' ipav'a a nadep'. Nakm, Atua, pasranr si stuam'em' udlani, apavrav'a auei kavier nut auei dau na nata.

²⁰ Nakm patu v'nen dau an a Sikup, katu p'kl na ti aparn istu a natei an a Epraham. Sena ti nakm, Atua, ktturan sera si lera anr a tetiam'em', itudina hin arna naran itauamu.