Luk 6 - V'nen P'as iv'i Turanien Trtarep' m'a Turanien M'dah

A Iesu iv'i Mlin na Sapat

¹ Laha, arna tv'el Sapat ml, iv'el katpeia al pitvet na uit. Laha, arm'ertuan avsva navan kavvavi arna lm'ar kavhani.

² V'eti Varisi kinkin avvr anr kavvr ti a, “?Inap'i hin kvan sei v'nen hua ivrkari a ti m'ertu ipani arna Sapat?”

³ V'eti a Iesu ivrpranr kavr ti a, “Nsarei kam'i kaavlei arna Paivul sei hin a Divt m'er m'ertu avlak m'ei avani, naran avrn nam'er.

⁴ Nsarei kaavrndu ti iv'a al nmahan Atua kalev' p'ret ataui arna nahn Atua nakl, kavsvsen ki a m'ertuan kavhani. P'ret lera iaviviln a ti m'ertu unanut apavhani, v'eti arpris uaki apavhani.”

⁵ Laha, ivr anr kavr ti a, “Kana nv'i Net M'ertu kav'i Mlin na Sapat.”

A Iesu ien mamh m'ertu arna Sapat

⁶ Arna Sapat kinkin uraur iv'a al nmah tamat kav'iv'en sei anr. Dui iamk ilak atlera, m'ldu lm'an im'a.

⁷ Laha, dui na v'nen hua m'er arvarisi avp'ei a Iesu arna ti apavvr ti ien si stu, ipavr ti hin ipamhmah ani arna Sapat.

⁸ V'eti hin irndu v'ahienar, kavr a dui lm'an im'a hara, kavr ti a, “Pilaph kap'tir atlaha arna p't nut nam'em'.” Laha, ilaph kap'tir atlera.

⁹ Laha, a Iesu ivr anr kavr ti a, “Kana nrn p'emiman si ipamk a kam'i. ?Iviviln a ti m'ertu apavan si p'as arna Sapat v'aha apavan si stu? ?Iviviln a ti apavmhmah a m'ertu v'aha apavkap'nr?”

¹⁰ Laha, ip'atalu anr udlani kavr ani, kavr ti a, “Palmlm lm'am.” Hin ien sei ivri, laha lm'an ima kap'as ml kanep'a tv'aln.

¹¹ V'eti hir nlr irer ani istudau kavvrvr a hir kavvrur sei apavan an a Iesu.

M'ertuan a Iesu arnal lman iru (12)

¹² Arna napn kinkin iamk, a Iesu iv'el kadav'a arna ptha a ti ipatu tamat, kalak katu tamat asn Atua arna lihat p'arei iamk.

¹³ Sarei, naran neiel itpeia, iv'ara anr m'ertuan avrama asnn, kav'lair nki arnal lman iru katu nahar anr ml avv'i apusel.

¹⁴ A Saimun, la itu nahan uraur ani iv'i a P'ita ha, m'a tv'aln, iv'i Adru, a Sim'is m'ei a Sun, a P'iliv', a Patulumiu,

¹⁵ A Matiu, a Tumas, a Sim'is, iv'i a natn Alvias, a Saimun, avr ti iv'i a Silutis,

¹⁶ A Sutas, iv'i a natn a Sim'is, m'ei a Sutas Iskariut, iv'i dui itau a Iesu al lm'ar m'ertu avlep'lei.

A Iesu ien mamh m'ertu inelnal

¹⁷ Laha, hir m'er m'ertuan avsiris kavrama kavp'tir arna nut iv'i m'lden. M'ertuan avstudau avlak atlera m'er nelnal avstudau avandan arna nut a Sutia m'ei a Serusalem, kavandan arna nut a Taia m'ei a Saitun, iter asn p'ak nata. Avrama a ti apavrn v'nenan kavrn ti ipamhmah anr arna m'etienar.

¹⁸ Laha, imhmah anr m'ertu m'im'iln stu iutakm anr.

¹⁹ Nelnal udlani avrn ti apavier p'akn, sena ti nut hua iendan asnn kamhmah anr udlani.

M'ertu la apavrn ipap'as ha

²⁰ Laha, ip'a m'ertuan kavr ti a, “Kam'i siam'i ihei, pavrn ipap'as uam, sena ti v'anuan Atua iv'i nkam'i.

²¹ Kam'i la kvrn nam'er hilaha, pavrn ipap'as uam, sena ti pavrapd. Kam'i la kvtakal hilaha, pavrn ipap'as uam, sena ti pavvtma.

²² Naran m'ertu apavlep'la kam'i kavtnah kam'i kavsip'len kam'i kavkasr naham'i inep'a ti istu, sena Kana la nv'i Net M'ertu ha, kam'i pavrn ipap'as.

²³ Arna naran nen, pavrn ipap'as kavsilu. Pavrni, ulienam'i ipalil arna nut eia, sena ti tituei a tetiar atvutakm sarei anr arpruvet inap'i lera.

A Iesu ivrp'ep'a der ipatu hin

²⁴ V'eti nrn istu a kam'i la siam'i istudau ha, sena ti ktvlev' sera si p'sp'asam'i udlani.

²⁵ Usa, nrn istu a kam'i la kvrapd hilaha, sena ti pavrn nam'er. Usa, nrn istu a kam'i la kvvtma hilaha, sena ti pavtakal kavvalau.

²⁶ Usa, nrn istu a kam'i, naran m'ertu udlani apavvr ti kvp'as, sena ti tituei a tetiar avani inap'i lera anr m'ertu la avhap'il kavvr ti avv'i pruvet ha.

Pavlap'as a m'ertu imlen kam'i

²⁷ V'eti Kana nvr a kam'i la kvrn v'nenak ha, kavr ti a, Pavlap'as a m'ertu avmlen kam'i kavan si p'as anr m'ertu avlep'la kam'i.

²⁸ Pavmhmah a m'ertu avvr v'nen stu a kam'i, kavtu tamat sena m'ertu avanp'ilen kam'i.

²⁹ Ipavr ti m'ertu kinkin ipusah arna pla nham, pav'hlp'lah ipusa tv'eliel, v'aha ipavr ti m'ertu kinkin ipauala sat na m'lam, pam'ahu a ti ipaua satam aranan ml.

³⁰ M'ertu udlani ikra sei asnm, patau ani, v'aha ipavr ti m'ertu kinkin ipauala siam kinkin, mamimani ml.

³¹ Si udlani kvrn ti m'ertu uraur apavani a kam'i, kam'i pavan anr ipanap'i lera.

³² ?Ipavr ti kvlap'as a m'ertu avlap'as a kam'i uaki, kvan si p'as arna v'ata? Sena ti m'ertu stu avlap'as a m'ertu la avlap'as anr ha.

³³ ?V'aha ipavr ti kvan si p'as anr m'ertu atvan sera si p'as a kam'i, kvan si p'as arna v'ata? Sena ti m'ertu stu hir avani inap'i lera.

³⁴ ?V'aha ipavr ti pavtu sei a m'ertu uraur kavv'ah ti apavtu m'lnen ml, kvan si p'as arna v'ata? Sena ti m'ertu stu avtu sei a m'ertu uraur a ti apavlev' m'lnen ml.

³⁵ V'eti kam'i pavlap'as a m'ertu avlep'la kam'i, kavan si p'as, kavtu sei a m'ertu, v'eti mavv'ah ti pavlev' m'lnen ml. Inap'i lera ulienam'i ipalil, pavv'i a natn a Mlin Eia dau. Sena ti Hin ien si p'as a m'ertu ahavvr ip'as ani, m'er m'ertu stu.

³⁶ Sena si lera pavrn istu a m'ertu uraur ipanap'ei a Tetiam'i la irn istu a m'ertu nakl ha.

Mavv'ana hua m'a m'ertu

³⁷ Mavv'ana hua m'a m'ertu, a ti Atua imav'ana hua m'a kam'i. Mavv'ana hua m'a m'ertu kavvr ti ien si stu, a ti Atua imav'ana hua m'a kam'i kavr ti kvan si stu. Pavmhmah a m'ertu uraur sena si stu avan a kam'i, a ti Atua ipamhmah a kam'i sena si stuam'i.

³⁸ Pavtu sei anr m'ertu uraur, dav'a Atua ipatu sei a kam'i. Laha, apani natenam'i ipalini, kanen mamahi, kadul ani a ti ipalini dav'a dav'a karsrs aut. Sena ti nut kvtina m'ertu uraur inap'ei, Atua ipatina kam'i ipanap'i lera.”

³⁹ Laha, isran v'nen kinkin asnr kavr ti a, “?M'etapis irndu ti ipav'ev'a m'etapis, v'aha hir arru aparrs al tah?

⁴⁰ M'ertu ialil kasiv' tisan, v'eti naran iparndu si udlani tisan iv'iv'en ani, hin ipanep'a tisan uaki.

⁴¹ ?Inap'i hin kp'a tk nai iter al m'eta tv'alm, v'eti kaala nai lil iter al m'atam?

⁴² ?V'aha inap'i hin parndu ti pavr a tv'alm kavr ti a, ‘Tv'alk, pam'ahu a ti p'elev'la tk nai iter al m'atam,’ v'eti nakm mkala nai lil iter al m'atam? U, nakm kp'ip'en lamuru, palev'la nai lil iter al m'atam ipatauamu, sarei parndu ti paklau ipap'as a ti palev'la tk nai iter al m'eta tv'alm.

Pardu m'ertu arna nava pariar

⁴³ Sena ti nai p'as ikatu navan ikstu, v'aha nai stu ikatu navan ikp'as.

⁴⁴ Sena ti aparndu nai udlani arna navan. Sena ti akasva nava nap'ak arna makau lun iak, v'aha akasva krep arna hrhrid.

⁴⁵ M'ertu p'as la v'ahienan ilini a si p'as ha, ipan si p'as, v'eti m'ertu stu la v'ahienan ilini a si stu ha, ipan pari stu. Sena ti m'ertu ivrp'ep'a si udlani v'ahienan ilini ani.

Pahl nmaham arna nav'et

⁴⁶ ?Inap'i hin kvvr a Kana, ‘Mlin, Mlin,’ v'eti kaavan sei nvri?

⁴⁷ Ipavr ti m'ertu kinkin ipama asnk karn v'nenak kani, Kana p'ev'iv'en a kam'i nut hin inap'ei.

⁴⁸ Hin inep'a m'ertu iamk ihl nmah, kahl tah p'arei na nakalamu nen dav'a ispada nav'et. Laha, uiniv' iv'el kararev' kahl nmah lera ihuadau, v'eti iadulani, sena ti ip'tir arna nav'et.

⁴⁹ V'eti m'ertu la irn v'nenak ha, v'eti iahani, hin inep'a m'ertu iamk ihl nmah arna nadep', v'eti iahah nakalamu nen ipahua. Laha, uiniv' iv'el kararev' kahl nmah lera ihuadau, iv'amk m'a ti irs kastu udlani.”