Luk 3 - V'nen P'as iv'i Turanien Trtarep' m'a Turanien M'dah

A Sun Paptais iendedp' alan a Iesu

¹ Naran a Taipirias itv'i sera kavman lil a Rum pai inal lman italm' (15), hin a Punsias Pailat iv'i kavman a Sutia. Arna nut a Kalili, a Erut iv'i kavman. Tv'aln, nahan iv'i a P'iliv', iv'i kavman arna nut Aituria m'ei a Trakunaitis. Hin a Lisanias iv'i kavman arna nut Apilin.

² Arna pai lera, naran Anas m'ei a Kaiavas arv'i pris lil, v'nenan Atua ima asn a Sun, iv'i a natn a Sakaraia, arna nut kaka.

³ Hin iv'a arna v'anu udlani iter a p'ak nauei a Surtan, kavr ti a, Pavvav nlm'i kavpaptais, a ti Atua ipalev'la si stuam'i.

⁴ Inep'a nut pruvet, nahan iv'i Aisaia, itulul sarei ani inap'ei, kavr ti a, “Dui iamk iv'ana eia arna nut kaka kavr ti a, ‘Pavandedp' navanelan a Mlin Lil Kavan alan ipaviviln mamh.

⁵ Apatinkar m'ihual udlani, Ptha m'a mrnut udlani apani ti ipav'i m'lden, Si udlani ihapr apani ti ipaviviln, Laha, nut udlani m'ihual papa iak apani ti ipav'i m'lden.

⁶ Laha, m'ertu udlani apavla ti Atua ilev'la m'ertuan.’ ”

A Sun ivrp'ep'a v'nen p'as anr nelnal

⁷ Laha, ivr anr nelnal avrama a ti ipan paptais anr, kavr ti a, “U, kam'i kvv'i net nmat. ?Hin ak ivr a kam'i a ti pavruh asn nl reran Atua la ipama ha?

⁸ Sena si lera, pavv'iv'en nava silv'ienam'i a ti ktvvav sera nlm'i, mavvrdinei a kam'i kavvr ti a, ‘A Epraham iv'i a tetiam'em'.’ Sena ti kana nvr a kam'i a ti Atua irndu ti ipan nav'et laha apavrama kavv'i a natn a Epraham.

⁹ Hilaha tamiuk itater sarei asnr uar nai. Sena si lera nai udlani navan iap'as apatrusi kasrani al nep'v'en.”

¹⁰ Laha, nelnal avmiman ani kavvr ti a, “?Hilaha p'van v'ata?”

¹¹ Ivrpranr kavr ti a, “M'ertu satan iru, ipatu ki ipamk a tv'aln la nkan ihei ha, m'ertu tim'ah nan iak, ipani ipanap'i lera.”

¹² Laha, dui na takis ml avrama a ti ipan paptais anr, kavvr ani kavvr ti a, “?Tisa, p'van v'ata ml?”

¹³ Ivr anr kavr ti a, “Mavlev' takis ipasiv' nki kavman ivr ti pavlav'i.”

¹⁴ Inap'i lera ml, m'rnur kinkin avmiman ani kavvr ti a, “?Kam'em' p'van v'ata ml?” Ivrpranr kavr ti a, “Mavanp'ilen m'ertu kinkin, kavhap'il kavvr ti avan si stu kinkin. Pavrn ipap'as uaki a ulienam'i.”

¹⁵ Laha, nelnal avv'rn kavv'hv'ahi arna nlr a ti a Sun iv'i a Kristu v'aha ihei.

¹⁶ V'eti a Sun ivrp'ep'ei anr udlani, kavr ti a, “Kana nen paptais a kam'i a nauei, v'eti Dui iamk ipama ipalil kasiv' kana. Kana nalil a ti p'ululla sitrav na susan. Hin ipan paptais a kam'i a M'im'iln P'as m'a nep'v'en.

¹⁷ Hin iua savel na uit aan p'ret ani, kasran uit nen eia a ti nalen ipatvla heia m'at nen, sarei kanen m'at nen kataui al nmah nen, kal heian al nep'v'en ikahiris naran.”

¹⁸ Laha, iv'ana ml m'er nelnal kavrur sei istudau kavrp'ep'a v'nen p'as anr.

¹⁹ V'eti a Sun iv'ana hua m'ei a Erut, iv'i mlin na nut iv'a, sena ti a Erut iualei a Erutias, iv'i a nau tv'aln, nahan iv'i a P'iliv', kav'ana hua m'ei ml sena si stu uraur udlani a Erut iani.

²⁰ Laha, ien si stu uraur aranan ml kap'leskar a Sun al p'resin.

A Sun ien paptais an a Iesu

²¹ Naran iten sera paptais anr m'ertu udlani, ien paptais an a Iesu ml. Naran nen, a Iesu itu tamat, nut eia iela hin.

²² Laha, M'im'iln P'as ima a nadep' kadap's aranan kanep'a sera navimar. Laha, nadl iamk idan eia kavr ti a, “Nakm kv'i a Natk. Nlap'as anh karn ip'as anh istudau.”

Nl nam'elan a Iesu Kristu

²³ Arna naran nen a Iesu paian ihih ineltl (30). Av'ah ti iv'i a natn a Susev', hin iv'i a natn a Eli.

²⁴ Hin iv'i a natn a Matat, hin iv'i a natn a Livai, hin iv'i a natn a Melki, hin iv'i a natn a Sana, hin iv'i a natn a Susev',

²⁵ Hin iv'i a natn a Matataias, hin iv'i a natn a Emus, hin iv'i a natn a Neiam, hin iv'i a natn a Esli, hin iv'i a natn a Nakai.

²⁶ Hin iv'i a natn a Mat, hin iv'i a natn a Matataias, hin iv'i a natn a Semai, hin iv'i a natn a Susev', hin iv'i a natn a Suta.

²⁷ Hin iv'i a natn a Suana, hin iv'i a natn a Resa, hin iv'i a natn a Serupapel, hin iv'i a natn a Salatiel, hin iv'i a natn a Neri.

²⁸ Hin iv'i a natn a Melki, hin iv'i a natn Ati, hin iv'i a natn a Kusam, hin iv'i a natn a Eimutam, hin iv'i a natn a Er.

²⁹ Hin iv'i a natn a Susua, hin iv'i a natn a Eliesa, hin iv'i a natn a Surim, hin iv'i a natn a Matat, hin iv' a natn a Livai.

³⁰ Hin iv'i a natn a Simiun, hin iv'i a natn a Susev', hin iv'i a natn a Sunan, hin iv'i a natn a Eliakim.

³¹ Hin iv'i a natn a Melea, hin iv'i a natn a Menam, hin iv'i a natn a Matata, hin iv'i a natn a Netan, hin iv'i a natn a Divt.

³² Hin iv'i a natn a Sesi, hin iv'i a natn a Uvet, hin iv'i a natn a Puas, hin iv'i a natn a Salmun, hin iv'i a natn a Nasun,

³³ Hin iv'i a natn Aminatap, hin iv'i a natn Aram, hin iv'i a natn a Esrum, hin iv'i a natn a Peres, hin iv'i a natn a Suta.

³⁴ Hin iv'i a natn a Sikup, hin iv'i a natn Aisak, hin iv'i a natn a Epraham, hin iv'i a natn a Tera, hin iv'i a natn a Nahur.

³⁵ Hin iv'i a natn a Seruk, hin iv'i a natn a Riu, hin iv'i a natn a Pelek, hin iv'i a natn a Hipa, hin iv'i a natn a Sala.

³⁶ Hin iv'i a natn a Kainan, hin iv'i a natn Arvaksat, hin iv'i a natn a Sem, hin iv'i a natn a Nua, hin iv'i a natn a Lameh.

³⁷ Hin iv'i a natn a Metusala, hin iv'i a natn a Inuk, hin iv'i a natn a Saret, hin iv'i a natn a Malelel, hin iv'i a natn a Kainan.

³⁸ Hin iv'i a natn a Inus, hin iv'i a natn a Set, hin iv'i a natn Atam, hin iv'i a natn Atua.