Luk 12 - V'nen P'as iv'i Turanien Trtarep' m'a Turanien M'dah

Pav'ah m'ertu avp'ip'en lamuru

¹ Arna naran lera m'ertu avstudau avp'lt atlera kavsinsin hir kavpspas tlr. Laha, ivr anr arm'ertuan itauamu kavr ti a, “Pavv'ahur kam'i sena iisar Varisi, sena ti avp'ip'en lamuru uaki.

² Sena ti si udlani atnpakar sarei, apav'iv'ani, si udlani attutuan sarei, aparndaui.

³ Sena si lera, si udlani ktvvr sarei al m'alk, aparni ren, sei kvnanau ani asn drlnar m'ertu eim al nmah, apavrp'ep'ei eia arna drl nmah.

A Iesu iv'iv'en ti p'vdedrn an Atua

⁴ Nvr a kam'i kvv'i tv'alk, Mavdedrn a m'ertu avrp p'ak natei uaki, v'eti itauatah akavan si kinkin ml.

⁵ V'eti Kana p'ev'iv'en a kam'i hin ak pavdedrn ani. Pavdedrn an Atua la irndu ti iparp m'ertu, sarei kasrani al nep'v'en ha. Aau, nvr a kam'i, pavdedrn ani.

⁶ Uliena m'anh papa ilm' iv'i nav'et iru, v'eti Atua ikavnapn a ki ipamk.

⁷ Nvrdaui, Atua itspan sera nil ptm'i udlani. Sena si lera, mavdedrn. Ulienam'i ilil kasiv' uliena m'anh papa istudau.

⁸ Nvr a kam'i ml, Ipavr ti m'ertu kinkin ipavrp'ep'a Kana arna nah m'ertu, Kana, nv'i Net M'ertu, p'evrp'ep'ei arna nahr enselan Atua.

⁹ V'eti ipavr ti m'ertu kinkin ipap'ep'n Kana arna nah m'ertu, Kana p'ep'ep'ni arna nah enselan Atua.

¹⁰ M'ertu ipavr v'nen kinkin ipamlen Kana, nv'i Net M'ertu, Atua ipamhmah ani arna si stu lera, v'eti m'ertu ipasip'len M'im'iln P'as, Atua ikamhmah ani arna si stu lera.

¹¹ V'eti naran apalev' kam'i kauirv'a kam'i asnr dui lilil na sasar ardu a Isrel, m'er armlin, m'er kavman, mavv'ahur nut pavvrpranr ipanap'ei, v'aha v'nen pavvr anr.

¹² Sena ti M'im'iln P'as ipav'iv'en a kam'i arna napn lera v'nen pavvri.”

A Iesu isran v'nen kavrur m'ertu sian istuduet

¹³ Dav'a, naran m'ertu avnelnal, hir kinkin iamk ivr ani, kavr ti a, “Tisa, pavr a tv'alk kavr ti ipatupr sian a tetiam'em' la itam'a sarei ha, katu kana nki iv'i nkak.”

¹⁴ V'eti ivr ani, kavr ti a, “!Dui! ?Ak itaui ti Kana p'ev'i Dui na ti ipav'ana hua m'a m'ertu, katupr sian a tetiam'i?”

¹⁵ Sarei, ivr anr kavr ti a, “Pavv'ah kam'i. Mavrn nam'er a sia tv'elm'i, sena ti ipavr ti m'ertu sian istudau, silv'ienan ikap'tir aranan.”

¹⁶ Laha, isran v'nen asnr kavr ti a, “Dui iamk sian istudau, pitvetan ilini a tim'ah.

¹⁷ Laha, iv'hv'ahi arna nln kavr ti a, ‘?P'en v'ata? Sena ti m'lna tim'ah nak ialil ml.’

¹⁸ Kavr ti a, ‘P'en si laha. P'etrla nmah na tim'ah udlani kahluri ml apavlil mau, katu tim'ah m'a siak udlani a nln.

¹⁹ Sarei, p'evr a kana kavr ti a, “!Dui! Hilaha kttu sera siam istudau iviviln a pai ipastudau. Parnrnh kahatat kam'nm'n karn ip'as.” ’

²⁰ V'eti Atua ivr ani, kavr ti a, ‘Dui, nakm ptm ihei, sena ti arna lihat laha nrn ti m'im'ilm ipam'alet ml dama asnk. Sarei, si la kttup'lten sarei ha, ipav'i nkan ak?’

²¹ M'ertu la itup'lten sian kav'ahur hin uaki, v'eti sian ihei arna nahn Atua, hin ipanap'i lera.”

Mavv'ahur par a sei

²² Laha, kavr anr m'ertuan kavr ti a, “Mavv'ahur silv'ienam'i kavv'ah ti a, ‘?P'vhan v'ata?’ V'aha mavv'ahur p'akm'i kavv'ah ti a, ‘?P'vua klus v'ata?’

²³ Sena ti silv'ienam'i ilil mau isiv' tim'ah, p'akm'i ilil mau isiv' klus.

²⁴ Pavv'ahurr trvn, hir ahavsran m'et na sei, ahavhl sei al pitvet, nmah apavtu suadar a nln ihei, tratrar ihei, v'eti Atua imsnanr iel. Kam'i kvlil kavsiv' m'anh istudau.

²⁵ Hin ak na kam'i irndu ti ipani ti silv'ienan ipap'arei mau ipasusupa naran iv'ahuri karn istu ani?

²⁶ ?Sena si lera, ipavr ti kaavrndu ti pavan sei isusupa ipanap'i lera, kvv'ahur si uraur sena v'ata?

²⁷ Pavv'ahur plaua, nut isi inap'ei. Ahavm'akar, ahavli klusar, v'eti Kana nvr a kam'i ti hin a Sulumun, arna si p'sp'asan udlani, iaua klus p'as inep'a plaua lera kinkin iamk.

²⁸ Sena si lera, ipavr ti Atua ipatu klus ip'as inap'i lera arna plaua la isi dika al lili, v'eti m'ih apasrani al nep'v'en ha, hin ipatu klus a kam'i mau. U, v'ahienam'i isusupadau.

²⁹ Kam'i mavv'ahur parndau a sei pavhani, v'aha sei pavm'ni. Mavrn istu ani.

³⁰ Sena ti v'anudl udlani arna nadep' avtala a si udlani lera nakl, v'eti a Tetiam'i irndu ti kvrn si lera nakl.

³¹ V'eti kam'i pavtala a v'anuan Atua, laha ipatu si udlani lahara a kam'i ml.

³² Mavdedrn, sivsivak. Kam'i kvdakar, v'eti a Tetiam'i irn ip'as a ti ipatu v'anuan a kam'i.

³³ Pavulul a siam'i kavtuvn a ki a m'ertu siar ihei. Pavnen si p'as la ikastu ha al natenam'i, ipav'i si p'sp'as ikahiris, iter a nut eia. Arna nut lera, m'ertu na v'nv'nahien ikahma, kakrus ikautakm a si kinkin.

³⁴ Sena ti nut si p'sp'asam'i iter, iv'i nut v'ahienam'i ipater nakl.

Dui na m'akarien iru, tv'aln ip'as, tv'aln istu

³⁵ Pavv'uda klusam'i ipahua kavtu nap' a laitam'i.

³⁶ Kavnep'a m'ertu avtrah mlinar ipadan asn lheien, a ti, naran ipama kaspspa liu, apaviela liu ipalahml.

³⁷ M'ertu na m'akarien la apavrasp' naran a mlinar ipama ha, hir apavrn ipap'as. Nvrdaui, nvr a kam'i, hin ipav'uda klusan kavr anr a ti apavlak asn tiv', laha kadav'a katu tim'ah anr.

³⁸ Ipavr ti ipama p't lihat, v'aha naran ntu ititer, kala ti avrasp' uam, hir apavrn ipap'as.

³⁹ V'eti pavrndu mamh si laha, imvr ti mlin na nmah imrndu naran dui na v'nv'nahien imama, imp'aus nut nen. Ikam'ahu a ti ipatrpr nmah kadav'a eim.

⁴⁰ Sena si lera, kam'i pavandedp' kam'i, sena ti Kana, nv'i Net M'ertu, p'ama arna naran pavv'ah ti nkahma.”

⁴¹ Sarei, a P'ita ivr ani, kavr ti a, “?Mlin, ksran v'nen lera sena kam'em', v'aha sena m'ertu udlani?”

⁴² A Mlinad ivr ti a, “Dui na m'akarien la ptn iak kap'aur sian a mlinan ip'as ha, a mlinan ipataui a ti ipav'i mlinar m'ertu na m'akarienan udlani, a ti ipatu tim'ah nar anr ipaviviln a naran nen.

⁴³ M'ertu na m'akarien la ipan si lera ha naran a mlinan ipama, iparn ipap'as ipastudau.

⁴⁴ Nvrdaui nvr a kam'i, hin ipani ti ipav'i mlin na si udlanian.

⁴⁵ V'eti ipavr ti dui na m'akarien lera ipav'hv'ahi arna nln kav'ah ti a, ‘A mlinak ikahma lei,’ sarei, karp dui m'a tav'et na m'akarien uraur, kan tim'ah kahatat par kam'nm'n kakasmn ptn,

⁴⁶ Mlina dui na m'akarien lera ipama arna napn ipamk naran iav'ahuri, arna m'etaneiel iarndaui, katrp'ni kataui ipav'a arna nut m'ertu ahavv'ah Atua avlak.

⁴⁷ Laha, dui na m'akarien la itrndu sera v'ahienan a mlinan ha, v'eti iandedp' hin, iaan sei irni, aparpi ipastudau.

⁴⁸ V'eti m'ertu iarndu v'ahienan a mlinan kan sei iviviln a ti aparpi sanan, aparpi ipasusupa. Sena ti m'ertu atu sei istudau ani, aparn ti apalev' sei ipastudau asnn, v'aha m'ertu atu sei istudau al lm'an, aparn ti apalev' sei ipastudau mau asnn.

A Kristu itupr m'ertu

⁴⁹ Kana nma a ti p'euirma nep'v'en arna nadep'. U, m'ern imp'as imstudau imvr ti imtav'en sarei.

⁵⁰ Akan paptais a Kana pr. U, nrni istudau a ti ipav'siau.

⁵¹ ?Kvv'ah ti nma a ti p'euirma tamat arna nadep'? Nvr a kam'i, ikahei, v'eti p'etupr m'ertu.

⁵² V'eti itudina hin hilaha, m'ertu aparlm' apavlak al nmah ipamk, apavtupr hir. Nki apartl apavmlen nki aparru, v'aha nki aparru aparmlen nki apartl.

⁵³ Tatei ipamlen a natn dui, a natn dui ipamlen a tetian. Unei ipamlen a natn tav'et, a natn tav'et ipamlen a unian. A rinan ipamlen a v'lian, a v'lian ipamlen a rinan.”

Parndu mamh naran na sei

⁵⁴ Laha, ivr anr nelnal kavr ti a, “Naran pavla ti p'knaran iak katpeia arna Ues, kvvri ilahml kavvr ti a, ‘Nu ipau ra.’ Dav'a itu hin inap'i lera.

⁵⁵ V'aha naran pavla ti nalen itvtv dan a Saut, kvvr ti a, ‘Nut ipavuv ra.’ Dav'a itu hin inap'i lera.

⁵⁶ Kam'i kvp'ip'en lamuru. Kvrndu mamh sei p'knaran m'a nadep' iv'iv'ani. ?V'eti inap'i hin kaavrndu sei naran laha iv'iv'ani?

Pan tamat m'a m'ertu imlanh

⁵⁷ ?Inap'i hin kam'i kaavrndu sei iviviln?

⁵⁸ Inep'a ti, naran parv'el m'a m'ertu ipamk imlanh, a ti parv'a arna kut, pamhmahdinei ani sanan, naran kdrv'el uam arna navanel. Imahei ti ipani ti pav'a arna nah kut, sarei kut ipatauh al lm'a ptm'iel, laha ptm'iel ipasranh al p'resin.

⁵⁹ Nvrdaui nvr anh, mkaln p'resin lera dav'a ipaier pul sera kaunam udlani.”