Kulusi 4 - V'nen P'as iv'i Turanien Trtarep' m'a Turanien M'dah

¹ Kam'i la kvv'i mlin na parei ha, pavtau anr m'ertu na m'akarienam'i sei ipaviviln a pariar, sena ti kvrndu ti kam'i Mlin na pariam'i iak arna nut eia.

P'kl p'asar Kristin udlani

² Pavtu tamat nakl kavrasp' aranan kavvr ip'as an Atua.

³ Kavtu tamat sena kam'em' ml, a ti Atua ipaiela liu kinkin a ti p'vrndu ti p'vvrp'ep'a v'nen p'as, kavvr v'nen tutuahan a Kristu, la np'resin sanan ha,

⁴ a ti p'evrp'ep'ei arna nut m'auar, ipanep'a nut iviviln a ti p'evri ipanap'ei.

⁵ Pavv'ahur mamh navanel pavsapei, sena m'ertu avlak av'aran, kavan sei iviviln a naran nen nakl.

⁶ V'nenam'i ipalini a vtmien nakl, inep'a ti ilalm a sul, a ti pavrndu mamh nut pavvrpren m'ertu udlani ipanap'ei.

A Pul m'er tv'aln avvr ip'as anr

⁷ Hin a Tikikas ipavrp'ep'a nut nlak inap'ei asnm'i. Hin iv'i tv'ald nvlap'as ani, kav'i dui ien mamh parian a Mlin Lilad nakl kap'lt m'a kana nrv'i m'ertu na m'akarienan a Mlin Lilad.

⁸ Kana ntap'ei ipav'alet asnm'i a ti hin iparndu nut kvlak inap'ei, kamhmah a kam'i arna nlm'i.

⁹ A Unisimas, iv'i tv'ald la nvlap'as ani ha, kan parian ip'as nakl, hin ipasapei. Iv'i dui a utam'i. Hir arru aparvrp'ep'a si udlani itu hin atlaha asnm'i.

¹⁰ Hin Aristakas la nrp'resin m'ei ha, ivr ip'as a kam'i m'ei a Mak, iv'i a mrin a Panapas. Kam'i ktvrn sera v'nen ivruri. Nrn ti pavlav'i ipavr ti ipama asnm'i.

¹¹ Hin a Iesu, la tv'el nahan iv'i a Sastas ha, ivr ip'as a kam'i. Hir artl uaki avv'i m'ertu a Isrel la avp'lt m'a kana arna pari na v'anuan Atua ha. Avani ti nrn ip'as istudau.

¹² Hin a Epavras, iv'i dui a utam'i kav'i m'ertu na m'akarienan a Kristu, ivr ip'as a kam'i. Hin im'akar ani arna tamatan sanam'i nakl, arna ti pavp'tir kavp'as kavviviln kavsapa sei Atua irni.

¹³ Nrndu ti p'evrp'ep'a ti iv'ahur kam'i istudau, m'a hir avlak arna nut a Lautisia, m'a hir avlak a nut a Irapulis.

¹⁴ Hir a Luk, iv'i tukta nvlap'as ani, m'ei a Timas, arvr ip'as a kam'i.

¹⁵ Pavvr ip'as anr tv'ald avlak a Lautisia, m'ei a Nimvas, m'er m'ertu udlani avp'lt m'a sas al nmahan ha.

Nrn ti vtmienan Atua ipater asm'i

¹⁶ Nrn ti kam'i, naran ktvv'ana sarei arna ruplet laha asn nelnal, pavani ti apav'ana aranan arna sasar m'ertu a Lautisia. Laha, nrn ti kam'i pavv'ana arna ruplet ipadan a Lautisia.

¹⁷ Pavvr an Arkipas, “Nakm pam'akar ipap'as arna parei la a Mlin Lilad itau anh ha, a ti pahiris ani.”

¹⁸ Kana nulul a v'nen lera asnm'i, kavr ip'as a kam'i, nv'i a Pul. Nrn ti pavv'ahur ti nlak al p'resin. Nrn ti vtmienan Atua ipater asnm'i. Amen.