Kulusi 3 - V'nen P'as iv'i Turanien Trtarep' m'a Turanien M'dah

Pavv'ahur sei iter eia, mavv'ahur sei a nadep'

¹ Sena si lera, ipavr ti kam'i ktvthal sarei m'ei a Kristu, pavtala a sei iter eia, arna nut a Kristu ilak arna m'ldaun Atua.

² Pavv'ahur sei iter eia, mavv'ahur sei a nadep'.

³ Sena ti kam'i ktvram'a sarei. Hilaha, Atua itutuan silv'ienam'i, sena ti kvp'lt m'ei a Kristu.

⁴ Naran apalei a Kristu la iv'i silv'ienad ha, apala ti kam'i pavp'lt m'ei arna si p'sp'asan.

⁵ Sena si lera pavrpep'n p'kl stu na nadep' la p'akm'i irni ha, iv'i p'kl na ti dui ien si stu m'a tav'et, m'ertu avv'ahur si stu nakl, avrn nam'er par a sei, kavrn nam'er a si stu, kavrn nam'er a sia tv'alr, inep'a ti avpatei aitul.

⁶ Sena si udlani lera, nln Atua iparer anr m'ertu udlani avluvn a v'nen huan.

⁷ Tituei, kam'i kvan si stu lera, naran kvsapa p'kl stu lera arna silv'ienam'i.

⁸ V'eti hilaha, pavsran si stu udlani lera, iv'i nl rer, v'lv'elien, v'ahien stu, v'nen stu ivrur tv'elm'i, lslsien la iendan asn pnm'i ha.

⁹ Mavhp'hap'il m'a kam'i, sena ti ktvsran sera silv'ien tarep' m'a pari stuan.

¹⁰ Katvua sera silv'ien m'daham'i la Atua iani ti ima kam'dah ha, kani ti kvrndau Atua la ien kam'i ha, kani ti kvrama kavnep'a sera m'lkn.

¹¹ Arna silv'ien m'dah lera, m'ertu a Kris v'aha m'ertu a Isrel ihei ml, m'ertu avan p'au anr, v'aha m'ertu ahavan p'au anr, ihei ml, v'anudl v'aha m'ertu na lili ihei ml, m'ertu na m'akarien v'aha m'ertu dau ihei ml, v'eti a Kristu iv'i si udlani kalak a nl si udlani.

P'kl na silv'ien m'dah

¹² Atua itv'li sera kam'i, kvv'i m'ertu p'asan kavv'i m'ertu ilap'as a kam'i istudau. Sena si lera, pavua silv'ien m'daham'i. Asnm'i, tv'aln iparn istu a tv'aln kamhmah ani, v'ahienam'i ipater a nadep' kav'len kap'arei.

¹³ Pavv'hv'ahur kam'i kavmhmah a kam'i, ipavr ti kvv'ah ti tv'elm'i kinkin avan si stu kinkin a kam'i, inep'a nut a Kristu itmhmah sarei a kam'i inap'ei.

¹⁴ V'eti eia na si udlani lera, kam'i pavlap'sp'as a kam'i. Si lera iani ti pavp'lt mamh arna p'kl p'as.

¹⁵ Nrn ti tamatan Atua ipav'i mlin arna nlm'i, sena ti Hin iv'ara a kam'i sanan, a ti pavp'lt arna p'akn a Kristu iamk. Ipel, pavvr ip'as an Atua.

¹⁶ Nrn ti v'nenan a Kristu ipater a nlm'i ipastudau, arna ti pavrndu si udlani. Pavv'iv'en sei a tv'elm'i kavv'ana m'ei a ti ipap'tir, kavhai an a Mlin Lilad arna vtmienan Atua arna nlm'i udlani. Pavhai a npin arna Paivul, m'a npin ivrur Atua.

¹⁷ Si udlani pavani, arna v'nenam'i v'aha arna pariam'i, nrn ti pavani arna nahan a Mlin Lilad, a Iesu, kavvr ip'as an Atua iv'i a Tatei, sanan a Kristu.

Nl nam'ela m'ertuan a Kristu

¹⁸ Artav'et, pavlak a nv' a naum'i. Iviviln a ti pavan si lera, sena ti kvp'lt m'ei a Mlin Lilad.

¹⁹ Ardu, pavlap'as an a naum'i, nlm'i imaprr.

²⁰ Armardel, pavsapa v'nenar a tetiam'i m'er a uniam'i arna si udlani, sena ti a Mlin Lilad irn ip'as a si lera istudau.

²¹ Artatei, mavtp' a netm'i a ti nlr iparer, imahei ti apavrn istu par a nlr.

²² Arm'ertu na m'akarien, pavan si udlani armlinam'i arna nadep' ka avvri. Mavan si lera naran avla kam'i uaki, a ti hir apavrn ipap'as ani, v'eti pavrn ipap'as uaki kavan parei, kavdedrn an Atua.

²³ Si udlani pavani, pavrn ipap'as a nlm'i, inep'a ti kvani sanan a Mlin Lilad, iav'i sena m'ertu.

²⁴ Sena ti kvrndu ti a Mlin Lilad ipul kam'i, katu kam'i si udlani ittudedp' sarei a ti ipav'i nkam'i, sena ti kvm'akaran a Mlin Lilad, a Kristu.

²⁵ V'eti m'ertu ien si stu, hin ipalev' sei ipaviviln a si stu iani, sena ti Atua iav'ah nah m'ertu.