Kulusi 2 - V'nen P'as iv'i Turanien Trtarep' m'a Turanien M'dah

Pavv'ah kam'i. Imahei ti m'ertu kinkin ipahuda kam'i arna v'ahien stua m'ertu

¹ Aau, nrn ti kam'i pavrndu mamh pari hua nani sanam'i m'a hir a Lautisia, m'er nelnal udlani la adavmula nahk naran kinkin,

² a ti apavrn ipap'as arna nlr, sena ti avp'lt kavlap'sp'as a hir. Nrn ti apavrndu mamh nut Atua iuadar arna v'ahien p'as inap'ei, kavrndu v'nen tutuahan Atua, iv'i v'nen tutuahar a Tatei m'ei a Kristu.

³ V'ahien p'sp'as udlani m'a v'nen tutuah udlani iter asn a Kristu.

⁴ Nvr si lera a ti m'ertu kinkin imasner kam'i a v'nen la m'ertu apavv'ah ti iv'i v'nen dau ha.

⁵ Kana nalak m'a kam'i arna p'akk, v'eti nlak m'a kam'i arna v'ahienak, karn ip'as istudau, sena ti nla ti kam'i kvsapa mamh navanel kavp'tir ihua arna v'ahien p'asan a Kristu.

⁶ Sena si lera, nrn ti kam'i pavsapei a Kristu Iesu, iv'i a Mlin Lilad, inep'a nut kvlav'i inap'ei,

⁷ kavuadei ipahua arna v'ahienam'i, inep'a nut uar nai iauada nadep' inap'ei, kavp'tir inep'a nut nmah ip'tir arna nadep' inap'ei, inep'a nut atv'iv'en sarei a kam'i itnap'ei, kavvr ip'as an Atua ipastudau ipel.

⁸ Kam'i pavv'ah kam'i, imahei ti m'ertu kinkin ipahuda kam'i arna v'ahien stua m'ertu, m'ei arna hap'ilien iv'i si kaka uaki. V'nen lera isapa p'klr a pupuar uaki, iv'i p'kl na nadep', iahandan asn a Kristu.

⁹ Sena ti si p'sp'asan Atua udlani iter a nl p'akn a Kristu.

¹⁰ Silv'ienam'i ilini a si p'sp'as sena ti kvp'lt m'ei. Hin iv'i pt ensel lil udlani m'a pt kavmanar.

Kvp'lt m'ei a Kristu naran avan paptais a kam'i

¹¹ Inep'a ti atvan sera p'au a kam'i. Ahavtr kam'i a lm'a m'ertu, v'eti inep'a ti atvan sera p'au a kam'i sena ti kvp'lt m'ei a Kristu, sena ti ktvsran sera p'kl stu na ti kvsapa si stu p'akm'i irni uaki.

¹² Naran avan paptais a kam'i, inep'a ti avtin kam'i m'ei a Kristu, laha kvthal ml m'ei, sena ti kvv'ah nut huan Atua la iani ti ithal ml arna m'ien.

¹³ Tituei, kam'i ktvram'a sena kvan si stu stuam'i kavram'a sena ti ahavan p'au arna p'akm'i. V'eti Atua iani ti kvsilv' ml m'ei a Kristu, kamhmah a kam'i arna si stuam'i udlani.

¹⁴ Kavalua sei atulul sarei ani arna v'nen hua, la iv'ana hua m'a nakd kutakm a nakd ha, kalev'lei kaluei arna su lamu.

¹⁵ Kalev'la su naurar ensel stu m'a kavmanar kani ti apavmamih, kav'iv'ani arna nah nelnal a ti itutakm sarei anr.

¹⁶ Sena si lera, mavm'ahu a ti m'ertu kinkin ipav'ana hua m'a kam'i sena m'it kvhani, nauei kvm'ni, v'aha napn na tim'ah kinkin, v'aha tim'ah na nal m'dah, v'aha napnet kinkin.

¹⁷ Si lera udlani iv'i m'lk sei ipama, v'eti a Kristu iv'i p'akn dau.

¹⁸ Mavm'ahu a ti m'ertu kinkin ipalev'la ulienam'i naran irn ip'as a v'ahien stu iv'a a nadep', v'eti ihap'il uaki, kavr ti pavtu tamat asnr ensel, kap'tir kavr sei hin ialei, kukl hin arna v'ahienan iv'i p'kl na nadep' uaki,

¹⁹ v'eti iauada ptn, iv'i a Kristu. M'ertuan a Kristu avv'i pna p'akn. Hin imsnanr, kani ti unt nen iuada mamh p'akn, kani ti p'akn ip'lt mamh kadama kalil mau, sena ti Atua iani ti ilil.

²⁰ ?Sena si lera, ipavr ti kam'i ktvram'a sarei m'ei a Kristu, katvln sera p'kl na nadep', inap'i hin kvsapa p'kl na nadep' uam, kavuada v'nen hua istudau, kavvr ti a,

²¹ “Mauadei, mahandinei, maiari?”

²² Si lera udlani ipahiris uaki naran avandinei. Iv'i v'nen huar m'a v'ahienar m'ertu uaki.

²³ Aau, m'ertu avv'ah ti si lera udlani isapa v'ahien p'as, sena ti avv'ah ti avpatei Atua istudau aranan kani ti v'ahienar iv'a a nadep' kutakm a p'akr. V'eti si lera iaan si iamk. Iani ti m'ertu avsapa sei p'akr irni uaki.