Kulusi 1 - V'nen P'as iv'i Turanien Trtarep' m'a Turanien M'dah

A Pul ivr ip'as anr m'ertu p'asan Atua avlak a Kulusi

¹ Kana nv'i a Pul kav'i apuselan a Iesu Kristu, sena ti Atua irni. Kam'em' m'ei a Timuti, iv'i tv'ald,

² Nrtep'a ruplet laha iv'alet asnm'i kvv'i m'ertu p'asan Atua kvlak a Kulusi, kavv'i tv'elm'em' aranan a Kristu, kavp'tir ihua. Nrn ti Atua, iv'i a Tetiad, m'ei a Mlin Lilad a Iesu Kristu, apartu vtmien m'a tamat a kam'i.

A Pul ivr ip'as an Atua sena v'ahienar m'a vtmienar

³ Nvvr ip'as an Atua iv'i a Tetian a Mlin Lilad a Iesu Kristu, kavtu tamat sanam'i iel.

⁴ Sena ti ntvrn sera v'nen ivrur nut kvv'ah a Kristu Iesu inap'ei, kavrn ti kvlap'as anr m'ertuan Atua udlani istudau.

⁵ Sena ti kvtrah si udlani la Atua ittudedp' sarei sanam'i arna nut eia ha. Si lera iv'i sei kvrni tituei naran kvrn v'nen dau na v'nen p'as.

⁶ V'nen p'as lera ier kam'i kaier m'ertu arna nadep' udlani katu navan, inep'a nut itu navan asnm'i inap'ei, naran kvrn v'nen p'as itauamu kavrndu vtmienan Atua arna v'nen dau dav'a ier dika.

⁷ Hin a Epavras, iv'i dui nvlap'as ani kap'lt m'a kam'em' arna m'akarienan Atua, itv'iv'en sera si lera a kam'i. Hin iv'i dui na m'akarienan a Kristu asnm'i, kap'tir ihua.

⁸ Hin itvr sarei a kam'em' kavrur vtmienam'i arna M'im'iln P'as.

Hin a Kristu iv'i pt sas kav'i plen

⁹ Sena si lera, arna napn nvrn si lera itauamu dav'a ier dika, kam'em' nvtu tamat nakl sanam'i, kavrn ti kam'i pavrndu mamh sei Atua irni. Nvrn ti M'im'iln P'as ipani ti pavrndu mamh navanel p'as kavrndu sei ipastudau.

¹⁰ A ti kam'i pavsapa navanel a Mlin Lilad iparn ipap'as ani, a ti nava pari p'asam'i ipaiak nakl, a ti pavrndau Atua ipalil mau nakl.

¹¹ Nrn ti Atua ipani ti pavhua ipahuadau arna nut huan, la ilil kap'as ha, a ti v'ahienam'i ipap'arei, pavp'tir ipahua kavrn ipap'as ipastudau.

¹² Kavvr ip'as an a Tatei nakl, la iani ti nvp'lt m'er m'ertu p'asan udlani arna nut ren ha, kavlev' si p'sp'asan Atua.

¹³ Hin ilev'la nakd arna nut hua na m'alk katu nakd arna v'anuan a Natn la ilap'as ani ha.

¹⁴ Hin iulla nakd a din, kamhmah a nakd arna si stuad.

¹⁵ Hin iv'i m'lkn Atua la aharndu ti apalei ha, kav'i titiamu na si udlani ap'u.

¹⁶ Sena ti Hin ien si udlani iter arna nut eia m'a si udlani iter arna nadep'. Ien sei m'ertu avlei kan sei m'ertu ahavlei. Ien mlinar ensel m'a v'anuar, m'er ensel lil m'er kavmanar. Hin ien si udlani kan si udlani sena Hin uaki.

¹⁷ Hin iak itauamu a si udlani, kauada si udlani kani ti avp'tir.

¹⁸ Hin iv'i pt sas, iv'i p'akn. Hin iv'i plen, kav'i pla m'ertu avthal ml arna m'ien, a ti Hin ipalil kasiv' si udlani.

A Kristu iani ti si udlani imam'alet ml asnn

¹⁹ Sena ti Atua irn ip'as a ti si p'sp'as udlani ipater aranan a Kristu.

²⁰ Laha, naran ien tamat arna din la irarev' arna su lamu ha, iani ti si udlani imam'alet ml asnn. Aau, Hin iani ti si udlani arna nadep' m'a si udlani eia ipamam'alet ml asnn.

²¹ Tituei, kam'i kvv'i v'anudl arna nahn Atua, kavmlani arna v'ahienam'i m'a pari stuam'i, v'eti hilaha, a Kristu iani ti kvramam'alet ml asnn.

²² Sena ti ima kaua p'ak m'ertu kadam'a a ti ipani ti kam'i pavp'tir arna nahn kavp'as udlani, a ti pavm'dah, a ti m'ertu akavpasla si stu kinkin asnm'i.

²³ Ipanap'i lera, ipavr ti kam'i pavv'ah Atua nakl, kavp'tir mamh kavhua, a ti mkavln v'ahien p'asam'i, v'eti pavtrah turanienan Atua arna v'nen p'as. V'nen p'as lera ktvrn sarei. Atvrp'ep'a sarei anr m'ertu udlani arna nadep'. Kana nv'i a Pul, nv'i m'ertu na m'akariena si lera.

Nen parei sena sas arna nut huan a Kristu

²⁴ Hilaha kana nrn ip'as sena der ier kana sanam'i, karn istu arna p'akk sena pna deran a Kristu la iter uam ha, sena p'akn a Kristu, iv'i sas.

²⁵ Atua itaui ti kana p'ev'i m'ertu na m'akariena sas a ti p'emhmah a kam'i, a ti p'evrp'ep'a mamh v'nen p'as udlani.

²⁶ Iv'i v'nen Atua itutuani tituei dav'a katutuani a nah m'ertu m'er nl nam'elar avlak tituei, v'eti hilaha iv'iv'en anr m'ertu p'asan arna nut m'auar.

²⁷ Atua irn ip'as a ti ipav'iv'en anr v'anudl si p'sp'as na v'nen tutuah lera. V'nen tutuah lera iv'i ti a Kristu ilak a nlm'i, kani ti kvtrah si p'sp'asan.

²⁸ Nvvrp'ep'a nahan kavv'ana m'er m'ertu udlani, kavv'iv'en anr m'ertu udlani a ti apavrndu si udlani, a ti p'vtup'sev' m'ertu udlani a ti apavp'tir kavviviln udlani aranan a Kristu Iesu.

²⁹ Sena si lera, nen parei kam'akar arna nut huan a Kristu la im'akar ihuadau arna nlk ha.