Isrel 9 - V'nen P'as iv'i Turanien Trtarep' m'a Turanien M'dah

Nmah tamatan Atua arna nadep' ka

¹ Aau, nvrdaui, arna turanien itauamu, Atua itu v'nen hua iv'iv'en navanel na ti m'ertu apavpatei, katu nmah tamatan, iv'i nki na nadep'.

² Sena ti avan nmah kanuis na tamatan Atua. Nut iru iter a nln. Nki itauamu avvr ti iv'i Nutet. Arna nut lera, lait iter, m'a tiv', m'a p'ret avtaui arna nahn Atua nakl.

³ Tv'el nmah, la tv'el kalik itukari ha, avvr ti iv'i Nutet na Nutet.

⁴ Arna nut lera si iamk iak avani a kul kaval sida p'as a nln, m'a pukiset na turanienan Atua, la avtu kul aranan arna nut udlani ha. Al pukiset lera, putel iamk iter, iv'i kul, avtu mana a nln, m'a napilaktan a Erun la issvt ha, m'a nav'et aulul a turanienan Atua aranan.

⁵ Eia arna pukiset avtu ensel iru, avvr ti arv'i serupim na si p'sp'asan Atua. Nil heiar ip'lt eia na napl p'asan Atua na ti irn istu a m'ertu, v'eti nkavvrur si udlani lera hilaha.

Arna turanien trtarep' Atua idav'iv'en navanel na ti p'vier Nutet na Nutet

⁶ Naran atvan sera si udlani inap'i lera, arpris avrav'a nakl al Nutet, kavan pariar.

⁷ V'eti arna tv'el Nutet, pris lil uaki iv'a atlera iv'amk uaki arna pai udlani. V'eti iahv'a atlera ipavr ti iaua di si slm kan uvrin sena si stuan m'a si stuar m'ertu udlani, la avani v'eti ahavrndaui ha.

⁸ Arna si lera, M'im'iln P'as iv'iv'en ti Atua idav'iv'en mamh navanel na ti p'vier Nutet na Nutet, naran nmah kanuis na tamatan Atua idater uam.

⁹ Si lera inep'a v'nen ivrur hilaha. Iv'iv'en ti sei avtau an Atua m'a sakrivais udlani, iarndu ti ipamhmah a m'ertu iani, kani ipaviviln arna nahn Atua arna v'ahienan.

¹⁰ Si udlani lera ivrur sei m'ertu apavhani m'a sei apavm'ni m'a nut apavsila si ururaur inap'ei, m'a v'nen hua na sei a nadep', la Atua itau anr ha, ipaier naran Atua ipavav si udlani ipama kaviviln udlani.

A Kristu ilev'la m'ertu arna si stuar a din uaki

¹¹ V'eti a Kristu ima kav'i Pris Lil sena si p'as ipama uam. Laha, iv'a al nmah kanuis na tamatan, la ilil kap'as mau kasiv' nki itauamu. Nmah kanuis na tamat lera ahavani a lm'a m'ertu, iav'i sei a nadep' laha.

¹² Iaua di nani m'a di lvna pluk kadav'a al Nutet na Nutet, v'eti iua din uaki, kadav'a eim iv'amk, kulla nakd ikahiris naran, a din.

¹³ Tituei, avisen di pluk m'a di nani m'a tih prapar na pluk, kavsila p'ak m'ertu aranan a ti apavviviln arna nahn Atua.

¹⁴ V'eti a Kristu, la si stu kinkin ihei aranan ha, itu din asn Atua arna nut hua na M'im'iln P'as ilak ikahiris naran. Hin irndu ti ipasila kam'i mau arna nlm'i, a ti pavln pariam'i, la ulien nen iv'i m'ien ha, kavan parian Atua, la isilv' ha.

¹⁵ Sena si lera, a Kristu iv'i v'nen na turanien m'dah, a ti ipulla m'ertu la Atua iv'ara anr ha, arna m'ienen, sena si stu avani arna turanien itauamu, a ti apavlev' sia turanienan dav'a ikahiris naran.

M'ienen a Iesu iani ti turanien m'dah ipap'tir

¹⁶ Ipavr ti m'ertu kinkin ituran ani a ti sian ipav'i nka m'ertu uraur naran ipam'a, irn ti m'ertu nen ipam'a ipatauamu. Sarei, sian ipav'i nka m'ertu uraur la ituran ani ha.

¹⁷ Sena ti turanien lera ikdatu hin naran m'ertu ituran ani idsilv' uam. Ipap'tir uaki naran m'ertu nen ipam'a.

¹⁸ Turanien itauamu inap'i lera. Irn ti di si slm ipararev' a ti turanien lera ipap'tir.

¹⁹ Sena ti naran a Musis itvrp'ep'a sera v'nen udlani iter arna v'nen huan Atua anr m'ertu, ilev' di lvna pluk m'a di nani, kalev' nauei, m'a nila p'ak sivsiv aani im'iel, m'a ru nai iamk nahan iv'i isup, kavisani arna puk m'a m'ertu udlani.

²⁰ Kavr ti a, “Ki laha iv'i nadei na turanien, la Atua ittu sarei a kam'i ha.”

²¹ Kavisen di si slm arna nmah kanuis na tamatan Atua, m'a dis na tamatan Atua udlani iter al nmah kanuis na nmah tamatan Atua.

²² Aau, v'nen huan a Musis ivr ti nut pa ti si udlani irn ti apasilei a di si slm. Ipavr ti di slm iararev', Atua ialev'la si stu.

A Kristu itu p'akn iv'amk uaki a ti ipalev'la si stuar m'ertu ipastudau

²³ Sena si lera, irn ti apasila m'lk na sia nut eia a di si slm lera. V'eti si dau na nut eia, irn ti apasilei a di si kinkin ip'as kasiv'i.

²⁴ Sena ti a Kristu iahv'a al nutet m'ertu avani uaki. Nutet lera iv'i m'lk na si dau. V'eti Hin iv'a al nut eia dau, kaua m'lnad hilaha arna nahn Atua.

²⁵ V'eti iahv'a a ti ipatu din dav'a dav'a inep'a nut pris lil iv'a al Nutet na Nutet arna pai udlani inap'ei, kaua di si uraur.

²⁶ Sena ti ipavr ti ipanap'i lera, irn ti iparn istu dav'a naran na ap'u ier dika. V'eti hilaha, naran nut pa ti nadep' ipahiris, ima kap'tir iv'amk uaki a ti ipatu din, kalev'la si stu.

²⁷ Atua itaui ti m'ertu apavram'a ipav'amk uaki, sarei ipav'ana hua m'er.

²⁸ A Kristu inap'i lera. Itu p'akn iv'amk uaki a ti ipalev'la si stuar m'ertu ipastudau. Sarei, ipama ml ipav'i v'aru nen, iav'i ti ipalev'la si stu, v'eti ipalev'la m'ertu la avtrahi ha.