Isrel 8 - V'nen P'as iv'i Turanien Trtarep' m'a Turanien M'dah

A Iesu iv'i Pris Lil na turanien m'dah

¹ Pla si udlani nvvri hilaha. Nviak a Pris Lil inap'i lera. Hin ilak arna m'ldaun Atua, la ilak arna napl p'asan Mlin Lil arna nut eia ha.

² Hin ien paria pris lil arna nutetan Atua, kani arna nmah kanuisduan Atua, la a Mlin Lilad ihli, iav'i m'ertu ihli.

³ Sena ti Atua itaui ti pris lil udlani apavtu uvrin kavan sakrivais. Sena si lera, Hin iktu si kinkin an Atua pr.

⁴ Sena ti idvr ti Hin idlak arna nadep', idav'i pris ml, sena ti pris nen aviak a ti apavtuvn a sei asn Atua, inep'a nut v'nen huan a Musis ivri inap'ei.

⁵ Pariar iv'iv'en m'lk sei iter eia, inep'a nut Atua ivr an a Musis inap'ei, naran irn ti ipan nmah kanuis na tamatan Atua, sena ti ivr ti a, “Nakm pav'ahur mamh ti pan si udlani ipanep'a nut nv'iv'en anh inap'ei arna ptha.”

⁶ V'eti hilaha, Hin a Iesu parian ilil mau aranan, inep'a nut Hin iv'i V'nen na turanien ip'as mau isiv' nki itauamu. Turanien lera ip'tir arna v'nen Atua ituran ani, ip'as kasiv' nki tituei.

Turanien m'dah ip'as mau isiv' turanien trtarep'

⁷ Sena ti ipavr ti turanien itauamu iviviln a ti ipalev'la m'ertu, Atua imarn tv'aln ml.

⁸ V'eti ila ti turanien lera iaviviln ani, kavr ti a, “A Mlin Eia ivr ti a, Pavrni, napn nen ipama ti p'en turanien m'dah m'er nl nam'elar Isrel m'er nl nam'elar a Suta.

⁹ Ikanep'a turanien nani m'er a tetiar, la nani m'er arna napn nuada lm'ar ha, kav'av'ar avruh arna nut a Itsip, sena ti ahavuada turanienak lera. Sena si lera, Kana nav'ahurr ml, a Mlin Eia ivri.

¹⁰ Sena ti hilaha p'en turanien laha m'er nl nam'elar m'ertu a Isrel. A Mlin Eia ivr ti a, Ipatauatah a napn lera, Kana p'etu v'nen huak al v'ahienar, kulul ani arna nlr. Laha, Kana p'ev'i Atuar, hir apavv'i m'ertuak.

¹¹ Arna naran lera, m'ertu udlani ikavr a m'ertu ilak mima asnn, v'aha tv'aln ikavr a tv'aln, kavr ti a, ‘Parndau a Mlin Eia.’ Sena ti hir udlani apavrndu Kana, m'ertu isusupa aranar udlani, dav'a ier m'ertu ilil.

¹² Sena ti Kana p'emhmah anr arna p'kl stuar m'a si stuar m'a si udlani avluvn a v'nen huak aranan. Kana nkav'ahuri ml.”

¹³ Naran ivr “turanien m'dah,” iani ti nki itauamu ima katrtarep'. V'eti sei ima katrtarep' dav'a kastu, ikap'arei ipahiris udlani.