Isrel 7 - V'nen P'as iv'i Turanien Trtarep' m'a Turanien M'dah

Nl nam'elan a Melkisetek

¹ Sena ti a Melkisetek lera iv'i mlin lil a Selem kav'i prisan Atua Eia Dau. Hin ilei a Epraham arna navanel naran itrp sera mlin lilil karn ti ipav'a a utan. Laha, a Melkisetek imhmah ani.

² Laha, arna si udlani ilav'i asnr mlin lera, a Epraham ilev' nki iamk arna nki inal katau an a Melkisetek. Nahan aulera, avavi, iv'i mlin na p'kl viviln, kav'i mlin a Selem, iv'i mlin na tamat.

³ Arna Paivul, a tetian ihei, a unian ihei, nl nam'elan ihei. Iavrur naran iak v'aha naran im'a, v'eti Paivul iv'iv'ani ti hin inap'ei a Natn Atua, iv'i pris dav'a ikahiris naran.

⁴ Hilaha nrn ti pavv'ahur aulera nut ilil inap'ei. Hin a Epraham, iv'i a tetiar m'ertu a Isrel udlani, ilev' nki iamk arna nki inal arna si udlani ilav'i asnr armlin, katau ani.

⁵ Nvrdaui, dui avlak arna nl nam'elan a Livai, la atu pari na pris anr ha, hir avlev' nki iamk arna nki inal asnr m'ertu a Isrel udlani pr, inep'a nut v'nen huan Atua ivri inap'ei. Hir avlev' si lera asnr tv'alr uaki, v'eti hir udlani avlak arna nl nam'elan a Epraham uaki.

⁶ V'eti dui lera, la ahavspani a nl nam'elan a Epraham ha, hin ilev' nki iamk arna nki inal asn a Epraham, kamhmah an a Epraham la turanienan Atua iter aranan ha.

⁷ V'eti nakd nvrndu mamahi ti m'ertu la imhmah a m'ertu uraur ha, ilil kasiv' m'ertu imhmah ani.

⁸ Ardu a Livai, la apavram'a prki, hir avlev' ki iamk arna nki inal, v'eti hilaha nvla ti hin a Melkisetek, la Paivul iv'iv'en ti isilv' dav'a ha, hin ilev' nki iamk arna nki inal.

⁹ Aau, inep'a ti nvr ti a Livai, la ilev' nki iamk arna nki inal nakl ha, hin ilev' nki iamk arna nki inal katau an a Melkisetek, naran a Epraham iani.

¹⁰ Sena ti hin inep'a ti idlak uam al p'akn a tetian naran a Melkisetek ilei a Epraham.

Dui uraur ml ipap'tir kav'i Pris arna nl nam'elan a Melkisetek

¹¹ Tituei m'ertu a Isrel avlev' v'nen huan Atua asnr pris la avlak arna nl nam'elan a Livai. ?Imvr ti m'ertu amvp'as sena pariar pris arna nl nam'elan a Livai, sena v'ata dui uraur ml ipalak arna nl nam'elan a Melkisetek? ?Ikav'i nl nam'elan a Erun ml sena v'ata?

¹² Sena ti ipavr ti nl nam'elan a pris ipuraur pr, irn ti v'nen hua ipuraur pr.

¹³ Sena ti a Mlin Lilad, la Paivul laha ivruri ha, ilak arna nl nam'el uraur. V'eti dui avlak arna nl nam'el lera ahavan sakrivais naran kinkin.

¹⁴ Nakd nvrndu mamh ti a Mlin Lilad ilak arna nl nam'elan a Suta. V'eti a Musis iavrur nl nam'el lera naran kinkin, naran ivrur pariar pris.

¹⁵ V'eti hilaha nvrndu mamh si udlani lera mau, sena ti Pris uraur ip'tir, inap'ei a Melkisetek.

¹⁶ Hin iahma kav'i Pris sena ti ilak arna nl nam'el la v'nen huan Atua ivruri ha. Ihei. Hin ima kav'i Pris arna nut huan a silv'ien ikahiris naran.

¹⁷ Sena ti Atua ivr ti a, “Nakm kv'i Pris dav'a ikahiris naran, kalak arna nl nam'elan a Melkisetek.”

¹⁸ Aau, Atua itlev'la sera v'nen hua ip'tir itauamu, sena ti iahua, ikamhmah a m'ertu kinkin.

¹⁹ Sena ti v'nen hua iamhmah a si kinkin a ti ipaviviln. V'eti hilaha Atua itu turanien la ip'as mau ha, a ti p'vtrahi, kavlak mima asnn.

A Iesu iv'i Pris Lil ikahiris naran

²⁰ Naran Atua itaui ti a Iesu ima kav'i Pris, Hin ivrdaui arna nahan.

²¹ Tituei ahavvri ihua kavvrdaui arna nahan Atua a ti m'ertu kinkin apavrama kavv'i pris. V'eti Atua ivri ihua kavrdaui kavr ani, kavr ti a, “A Mlin Eia ivrdaui, ikavav v'ahienan, kavr ti a, ‘Nakm kv'i Pris dav'a ikahiris naran, kalak arna nl nam'elan a Melkisetek.’ ”

²² Si lera iv'iv'en ti turanien, la a Iesu iani ip'tir ha, ip'as kasiv' turanien uraur.

²³ Tituei arpris avstudau, sena ti ahavlak dav'a, avram'a.

²⁴ V'eti Hin a Iesu iua paria pris dav'a ikahiris naran, sena ti ikahm'a.

²⁵ Sena si lera, Hin irndu ti ipalev'la m'ertu udlani avp'lt m'ei kavrama asn Atua, dav'a ikahiris naran, sena ti Hin isilv' iel katu tamat asn Atua sanar.

²⁶ Sena ti Hin iviviln a ti ipav'i Pris Lilad, sena ti Hin ip'as nakl, si stu ihei asnn naran kinkin, iasapa p'kl stu naran kinkin, iap'lt m'er m'ertu stu arna si stuar naran kinkin. Laha, Atua iani ti ilak eia, kasiv' si udlani arna nut eia.

²⁷ Hin ikahan sakrivais ml arna napn udlani, inep'a nut pris lilil lera avani inap'ei tituei. Sena ti hir avan sakrivais sena si stuar itauamu, sarei, sena si stuar m'ertu udlani. V'eti a Iesu ien si lera iv'amk uaki naran ien sakrivais katu Hin an Atua.

²⁸ Sena ti v'nen huan a Musis iani ti dui la ahavhua, avrama kavv'i pris lil, v'eti v'nenan Atua, la ivrdaui itauatah a v'nen huan a Musis ha, iani ti a Natn ima kav'i Pris Lil dav'a ikahiris naran.